Tu Lekisi Epokolo Lutõi Ndeci Kristu A Linga

“[Kuati utõi], ame nda yula oluali.”​—⁠YOA. 16:⁠33.

1. Yesu wa lekisa ndati epokolo ku Suku?

YESU KRISTU, olonjanja viosi wa linga ocipango ca Suku. Lalimue eteke a lekisile esino ku Isiaye wokilu. (Yoa. 4:34; Va Hev. 7:​26) Pole, ka ca lelukile oku lekisa epokolo, omo liovitangi a liyaka lavio palo posi. Tunde kefetikilo liupange wa Yesu palo posi, ovanyãli vaye, oku kongelamo Satana, va yonguile oku u pitisa voloseteko vialua, oco a liwekepo oku lekisa epokolo. (Mat. 4:​1-11; Luka 20:​20-​25) Ovanyãli vaco, va kokela Yesu esakalalo lialua kuenda esumuo. Noke yoku u valela kuti, vo ponda. (Mat. 26:​37, 38; Luka 22:44; Yoa. 19:​1, 17, 18) Ndaño wa tala ohali yalua palo posi, pole, “wa pokola toke kokufa.”​—⁠Tanga Va Filipoi 2:⁠8.

2, 3. Epokolo Yesu a lekisa poku liyaka lovitangi, li tu longisa nye?

² Ovitangi Yesu a liyaka lavio palo posi, vio longisa oku lekisa epokolo kovina viosi. (Va Hev. 5:⁠8) Eye wa kũlĩhĩle okuti, oku fendela Yehova, kua kuatele esilivilo lia velapo okuti, ovina vikuavo ci sule. Osimbu Yesu keyile palo posi, wa kuata ukamba wocili la Yehova Suku vokuenda kuanyamo alua kilu, kuenda wa kala ‘omesele Yaye.’ (Olosap. 8:​30) Ndaño lovitangi Yesu a liyaka lavio eci a kala palo posi, ekolelo a lekisa lieca uvangi wokuti, wa pandikisa calua. Yesu, Omõla wa Suku, wa kula kespiritu. Ulandu waye u tu longisa nye?

³ Ndaño Yesu wa lipua, ka setekele oku pandikisa longusu yaye muẽle. Pole, wa likutilila ku Suku, oco amameko lepokolo. (Tanga Va Heveru 5:⁠7.) Tu sukilavo oku lekisa umbombe poku likutilila. Omo liaco, upostolo Paulu wa lungula Akristão hati: “Upi ongangu ku Kristu Yesu. Kali lutima ndowu eye a kala lawo.” Eye “wa liketisa, kuenje wa pokola toke kokufa.” (Va Fil. 2:​5-8) Ongangu Yesu a lekisa, yeca uvangi wokuti, tu pondolavo oku pandikisa, ndaño tu kasi voluali lulo lua vĩha. Ocili okuti, Yesu wa lipuile, oco hẽ, nye ci popiwa catiamẽla kokuetu tua piñala ekandu?

Tu Pondola Oku Lekisa Epokolo Ndaño ka Tualipuile

4. Elianjo lioku nõla ovina tu yongola oku linga li lomboloka nye kokuetu?

⁴ Eci Suku a lulika Adama la Heva, va loñolohele calua, kuenda va kuata elianjo lioku nõla ovina va yongola oku linga. Omo okuti tumãla vavo, tu kuetevo elianjo lioku nõla ovina tu yongola oku linga. Olondaka evi vi lomboloka nye? Vi lomboloka okuti, tu pondola oku nõla oku linga ovina via sunguluka ale vievi ka via sungulukile. Momo Suku wa tu ĩha elianjo li tu kuatisa oku nõla nda tu pokola kokuaye, ale tu lekisa esino. Ndaño tu kuete elianjo liaco, pole, tu sukila oku lekisa olondunge kovina viosi tu yongola oku linga. Citava okuti, tu nõla onjila yi tuala komuenyo, ale kolofa. Olonjanja vimue, vakuetu va kongeliwavo vonjila tua nõla.

5. Ovitangi vipi tua siata oku liyaka lavio, kuenda tu pondola ndati oku vi yula?

⁵ Ka calelukile oku lekisa epokolo, omo liekambo lioku lipua tua piñala kolonjali vietu. Olonjanja vimue, ka calelukile oku pokola kolonumbi via Suku. Paulu, wa liyaka lovitangi viaco. Eye wa soneha hati: “Vovimatamata vietimba liange, [muli] ovihandeleko vikuavo vi liyaka lovihandeleko vi kasi vutima wange, oco nda pandekelua lovihandeleko viaco viekandu, vina vi kasi vovimatamata vietimba liange.” (Va Rom. 7:​23) Ocili okuti, omanu vamue nda ka va tali ohali va pokola, pole, eci va pita lovitangi ka va lekisa vali epokolo. Nye tu sukila oku linga nda epokolo lietu li setekiwa ‘loloñeyi vietimba kuenda ovina tu lete lovaso’? Ekambo lietu lioku lipua, olio lia siata oku tu vetiya oku kuata oloñeyi vietimba, loloñeyi viovaso. Momo, “espiritu lioluali,” li kuete unene walua, kuenda li pondola oku tu yapula. (1 Yoa. 2:16; 1 Va Kor. 2:​12) Pole, osimbu ka tua fetikile oku liyaka leyonjo limue, tu sukila oku ‘pongiya utima wetu,’ oco tuamameko loku pokola ku Yehova, ndaño lovitangi. (Osa. 78:⁠8) Embimbiliya lieyuka ovolandu alua a vana va tamalãla kovitangi, omo lioku pongiya ovitima viavo.​—⁠Esera 7:10; Dan. 1:⁠8.

6, 7. Lombolola ndomo elilongiso lio pokolika li pondola oku tu kuatisa oku nõla onjila ya sunguluka.

⁶ Oku lilongisa Embimbiliya, loku tanga alivulu a sandekiwa lukuenje wa lunguka, ci tu kuatisa oku pongiya utima wetu. Sokolola ndeci okuti, koñolosi yina wa siata oku linga elilongiso liove pokolika, wa sangiwa locitangi cimue ndeci: Ove wa likutilila ku Yehova, loku pinga ekuatiso liespiritu sandu oco o pokole kovina wa lilongisa Vondaka yaye. Koñolosi yeteke likuavo, wa sokiya oku tala osinema yimue vo Televisãu. Momo wa yeva okuti, yika lekisa ovina viwa. Pole, wa kũlĩha okuti, osinema yaco, yi lekisavo ovina viukahonga, kuenda ungangala.

⁷ Oco o yuvule ovina viaco, o sukila oku pokola kelungulo lia Paulu kelivulu lia Va Efeso 5:​3, kuna a popia hati: “Ene, ndaño oku vangula evi vi tiama kukahonga levĩho lovilivelo vĩvi, ko ka vi vanguli, momo havioko olosandu vi vangola.” O sukilavo oku pokola kelungulo Paulu a eca kelivulu lia Va Filipoi 4:⁠8. (Tanga.) Osimbu o sokolola kelungulo liaco, lipula ndoco: ‘Nda nda tala ovina via vĩha, ndi kuãi hẽ, ongangu ya Yesu yoku pokola ku Suku’? Nye o sukila oku linga? O tava hẽ, oku tala osinema yaco?

8. Momo lie tu sukila oku kapako olonumbi via Yehova oco tu teyuile ekalo lietu kespiritu?

⁸ Omo okuti, tua siata oku pamisiwa lolonumbi via Yehova, pamue tu sima okuti, ndaño tua tala ovitalukilo vi lekisa ungangala, kuenda ukahonga, ka tu yapuisiwa. Pole, tu sukila oku liteyuila etu muẽle, kuenda omãla vetu, kalonjanjo violuali lulo lua Satana. Olonoño vimue, via siata oku sanda onjila yoku teyuila olokombutador viavo, oco ka vika nyõliwe. Omo liaco, tu sukila oku lavulula, oco tu li ‘teyuile katutu’ a Satana.​—⁠Va Efe. 6:⁠11.

9. Momo lie oloneke viosi tu sukilila oku pokola ku Yehova?

⁹ Oloneke viosi, tu sukila oku kũlĩhĩsa nda ovina tu linga vi sanjuisa Yehova ale sio. Oco tu popeliwe tu sukila oku pokola ku Suku, kuenda kolonumbi viaye viesunga. Nda tua kuama ongangu ya Kristu yoku pokola “toke kokufa,” tu lekisa okuti, tu kuete ekolelo liocili. Nda tua ci linga, Yehova oka tu sumũlũisa. Yesu wa likuminya hati: “U o pandakaisa toke kesulilo eye o popeliwa.” (Mat. 24:​13) Omo liaco, tu sukila oku kuata utõi, ndeci Yesu a linga.​—⁠Osa. 31:⁠24.

Yesu Eye Ongangu ya Velapo Yoku Lekisa Utõi

10. Ovitangi vipi tu pondola oku liyaka lavio, kuenda nye tu sukila oku linga oco ka tuka yapuisiwe?

¹⁰ Omo okuti, tua ñualiwa lomanu vakuavituwa via vĩha, tu sukila oku kuata utõi woku pandikisa oco ka tuka yapuisiwe lavo. Akristão va siata oku liyaka lovitangi viatiamẽla koku lekisa ovituwa viwa, koku linga ukamba, ekambo liolombongo, kuenda elambalalo liatavo. Nda ka va pandikisile, va yapuka vonjila ya Yehova. Vamanji valua, va siata oku lambalaliwa lepata. Kolofeka vimue, kolosikola va siata oku longisa okuti, ovina vi kasi voluali via tukuluka ño, kuenje, elongiso liaco lia siata oku vetiya omanu oku sima okuti, ka kuli Suku. Omo liaco, ka tuka eceleli oku yapuisiwa lovina viaco. Pole, tu sukila oku tamãlala kuenda oku li teyuila kelongiso liaco. Ongangu ya Yesu yi lekisa ndomo tu pondola oku ci linga.

11. Oku sokolola ovina Yesu a linga, ci tu ĩha ndati utõi?

¹¹ Yesu wa sapuila olondonge viaye hati: “Voluali vu sakalaisua, puãi [kuati utõi], ame nda yula oluali.” (Yoa. 16:​33) Eye wa enda oku tamãlala kayonjo oluali, kuenda ka ecelele okuti, omanu vo tateka oku tẽlisa upange waye woku kunda. Momo wa pokola kolonumbi viefendelo liocili, kuenda wa lekisa ovituwa viwa. Omo liaco, tu sukila oku kuama ongangu yaye. Vohutililo Yesu a linga, wa popia eci catiamẽla kolondonge viaye hati: “Ovo havakualualiko ndeci ame siukualualiko.” (Yoa. 17:​16) Oku lilongisa catiamẽla kongangu ya Yesu yoku lekisa utõi, kuenda oku sokolola ovina a linga, ci tu vetiya oku kuata utõi woku litepa loluali.

Tu Kuami Ongangu ya Yesu Yoku Lekisa Epokolo

12-14. Lombolola ndomo Yesu a lekisa utõi.

¹² Yesu wa lekisa utõi kupange waye woku kunda. Unene waye woku kala Omõla wa Suku, wo kuatisa oku pua usumba. Kuenje, “wa iñila vonembele ya Suku. Wa tundisamo vosi va landa lava va landasaila vonembele. Wa leñula olomesa via vakuakutolokala olombongo lolomangu via vakuakulandisa olopomba.” (Mat. 21:​12) Eci asualali veyile oku kuata Yesu kuteke womuenyo waye wa sulako palo posi, eye wa kuata utõi woku teyuila olondonge viaye, kuenje wa popia hati: “Nda ame vu sanda, alume ava va ende.” (Yoa. 18:⁠8) Noke, wa sapuila Petulu oco a kape osipata vocilalo cayo, momo ka kolelele kovimãleho viomanu, pole, wa kolelele ku Yehova.​—⁠Yoa. 18:⁠11.

¹³ Utõi Yesu a lekisa, wa situlula uhembi walongisi vesanda koloneke viaye, kuenda ovina va longisa. Eye wa va sapuila hati: “Ene a vakuavisonehua, lene a va Fariseo, wakuambambe, ngongo yene! Momo vu yikilako omanu usoma wokilu; vu tepa tepa . . . ovina via velapo viovihandeleko, ndeci esunga vekanga lohenda, kuenda ekolelo. . . . Vu yelaisa koñoño yokopo leyi yelonga puãi vokati mue yuka ocipululu lundiamololo.” (Mat. 23:​13, 23, 25) Olondonge via Yesu via sukilile oku kuata utõi ndeci eye a linga. Momo asongui vatavo esanda va kuatele ocimãho coku va lambalala kuenda oku ponda vamue pokati kavo.​—⁠Mat. 23:34; 24:⁠9.

¹⁴ Yesu wa kuatele utõi woku pisa olondele. Vepuluvi limue wa ñualehela lulume umue wa pama wa kuatiwa lolondele okuti, lomue wa tẽla oku u kuata, ndaño oku u kuta lalienge. Pole, Yesu wa kuata utõi woku tundisa olondele via kala oku lambalala ulume waco. (Mar. 5:​1-​13) Koloneke vilo, Suku ka siatele oku eca kafendeli vaye unene woku linga ovikomo viaco. Pole, kupange woku kunda, tua siatavo oku liyaka layonjo a Satana una o sole oku “tekavisa ovitima” viomanu oco ka vaka tave kovina tu longisa. (2 Va Kor. 4:⁠4) Koloneke vilo, tua siatavo oku yula ovitangi, ndeci ca pita la Yesu. Momo ovimãleho vietu, “havietimbako, puãi vi kuete unene wa Suku woku nyõla olombonge” okuti, vi pondola oku nyõla alongiso atavo esanda. (2 Va Kor. 10:⁠4) Oku kolela kovimãleho Suku a tu ĩha, ci tu kuatisa oku kuama ongangu ya Yesu.

15. Pi kua tiamẽlele utõi Yesu a lekisa?

¹⁵ Yesu ka lekisile utõi lonyeño, pole, wa u lekisa lekolelo. Tu sukila oku kuama ongangu yaye. (Mar. 4:​40) Tu pondola ndati oku kuata ekolelo liocili? Ongangu ya Yesu yi pondola oku tu songuila. Eye wa lekisa okuti, wa kuatele ukũlĩhĩso Wovisonehua kuenda wa pokola kovina a lilongisa. Yesu, ka yakele losipata yi letiwe, pole, wa yaka losipata yespiritu okuti, Ondaka ya Suku. Ovina viosi a longisa wa vi tiamisila Kovisonehua. Olonjanja vimue, wa enda oku popia hati: “Ca sonehiwa” Vondaka ya Suku.a

16. Tu pondola ndati oku kuata ekolelo lia pama?

¹⁶ Oco tu pandikise kovitangi, tu sukila oku pamisa ekolelo lietu, poku tanga Embimbiliya eteke leteke, loku endaenda kolohongele. Nda tua ci linga, ka tu yapuisiwa. (Va Rom. 10:​17) Tu sukilavo oku sokolola ovina tua lilongisa, oco vi pamise utima wetu. Nda tua pamisa ekolelo lietu, tu kuata utõi. (Tia. 2:​17) Omo liaco, tu sukila oku pinga espiritu sandu vohutililo oco li tu kuatise oku lekisa apako espiritu.​—⁠Va Gal. 5:⁠22.

17, 18. Manji umue ufeko wa lekisa ndati utõi kosikola?

¹⁷ Manji umue ufeko o tukuiwa hati, Kitty, wa lombolola ndomo ekolelo liocili lieca utõi woku pandikisa. Tunde vutila, wa kũlĩhĩle okuti, o sukila oku yuvula ‘osõi poku kundila olondaka viwa’ kosikola. Momo, wa yonguile oku kundila vana va tangela vosala yimuamue. (Va Rom. 1:​16) Unyamo lunyamo, wa enda oku seteka oku kundila vakuavo olondaka viwa, pole, ka kuatele utõi woku ci linga. Vokuenda kuotembo, weya oku ilukila kosikola yikuavo. Kuenje, wa popia hati: “Cilo, ndi sukila oku kuata utõi, oco ndi kundile vakuetu kosikola.” Manji Kitty, wa likutilila oco a kuate utõi, luloño, kuenda epuluvi lioku kunda olondaka viwa, ndeci Kristu a linga.

¹⁸ Keteke liatete kosikola a ilukila, ulongisi wa pinga oco olondonge vi tukule olonduko viavo, kuenda etavo liavo. Valua pokati kavo, va tukula etavo liavo. Pole, va lekisa okuti, ka va siatele oku pokola kolonumbi vietavo liavo. Manji Kitty, wa limbuka okuti, wa kuata epuluvi lioku likutilila catiamẽla kondaka yaco. Eci lia pitilapo epuluvi liaye, wa popia hati: “Ndimbangi ya Yehova, kuenda Embimbiliya olio lia siata oku ndi songuila kovina viosi ndi linga.” Osimbu a kala oku lombolola, vamue pokati kolondonge, va fetika oku sima okuti, etavo liaye ka li kuete esilivilo. Pole, vakuavo va yevelela lutate, noke vo linga apulilo amue. Kuenje, ulongisi wa popia hati, Kitty wa eca ongangu yiwa yoku teyuila ovina a lilongisa ketavo. Manji Kitty, o kuete esanju lialua omo lioku lilongisa ongangu ya Yesu yoku lekisa utõi.

Tu Lekisi Ekolelo Lutõi Ndeci Kristu a Linga

19. (a) Nye ca kongeliwa voku kuata ekolelo liocili? (b) Tu pondola ndati oku sanjuisa utima wa Yehova?

¹⁹ Olondonge via Yesu, via limbukavo okuti, ekolelo liavo, lia va kuatisa oku lekisa utõi. Ovo va pinga ku Yesu hati: “Tu vokiyeko ekolelo.” (Tanga Luka 17:​5, 6.) Voku kuata ekolelo liocili, ka mua kongelele lika oku tava okuti, kuli Suku. Mua kongela oku kuata ukamba wocili la Yehova, ndeci omõla a pondola oku kuata ukamba la isiaye ukuacisola. Salomone wa soneha hati: “Amõlange, nda utima wove wa lunguka, lamevo utima wange u sanjuka. Ocili, utima wange u yolela, eci omẽla wove u vangola evi via sunguluka.” (Olosap. 23:​15, 16) Cimuamue haico ci pondola oku pita letu okuti, nda tua pokola kolonumbi via Yehova viesunga, tu sanjuisa utima waye, kuenda tu vetiyiwa oku amamako loku lekisa utõi waco. Omo liaco, tu amamiko oku kuama ongangu ya Yesu, yoku lekisa utõi kolonumbi viesunga!

[Atosi pombuelo yamẽla]

O Tẽla Oku Lombolola?

• Nye ci tu kuatisa oku amamako lepokolo, ndaño ka tualipuile?

• Pi kua tiamẽla ekolelo liocili, kuenda li tu kuatisa ndati oku kuata utõi?

• Onima yipi tu pondola oku tambula, nda tua lekisa epandi ndeci Kristu a linga?

[Elitalatu kemẽla 13]

Anga hẽ, wa ‘pongiya utima wove’ oco o tamalãle kayonjo?

[Elitalatu kemẽla 15]

Tu pondola oku kuata utõi lekolelo ndeci Yesu a linga