Apulilo Valingiwa Lavakuakutanga

Anga hẽ manji ukãi poku pitiya ohundo yimue kelimi lioku ilaika ndeci, vekongelo, kolohongele vimbo, ale viofeka, o sukila oku futa elesu?

Nda ukãi Ukristão o tẽlisa ocikele cimue ca eciwa kulume waye ale ku vamanji alume va kasi vekongelo, o sukila oku futa elesu. Ocituwa caco ci likuata lonumbi yupostolo Paulu wa popia hati: “Ukãi wosi o likutilila, pamue imba owanji wuprofeto, lo kutue ka futileko, o sepuisa utue waye,” momo “utue wukãi ulume.” (1 Va Kor. 11:​3-​10) Nda manji ukãi o futa elesu poku linga ovopange aco, o lekisa esumbilo keliangiliyo lia Suku vekongelo Liakristão.​—⁠1 Tim. 2:​11, 12.a

Vapuluvi api ukãi Ukristão a pitiya ohundo yimue kelimi lioku ilaika yi lingiwa la manji ulume? Osimbu ohundo yi kasi oku lingiwa, manji ukãi o kuete lika ocikele coku pitiya ulandu waco kolonjeveleli. Momo manji ulume o linga ohundo, eye o kasi oku pitiya elongiso liaco kolonjeveleli. Pole, oku pitiya ohundo kelimi lioku ilaika, ca litepa loku yi pitiya kelimi li popiwa lolondaka. Momo kalimi ana a popiwa lolondaka, olonjeveleli vi pondola oku mõla manji o linga ohundo, kuenda oku yevelela manji ukuavo o kasi oku yi pitiya kelimi likuavo. Vamanji akãi va pitiya ohundo kelimi li popiwa lolondaka, ka va kapiwako calua lolonjeveleli. Pole, va litepa la vamanji va pitiya ohundo kelimi lioku ilaika. Olonjanja vimue vamanji akãi va pitiya ohundo kelimi li popiwa lolondaka, citava okuti va tumãla, ale va talama loku tulukila manji o linga ohundo, pole, ka va tulukila kolonjeveleli. Omo liaco, ka va sukila oku futa elesu poku pitiya ohundo kelimi li popiwa lolondaka.

Omo liuloño wa siata oku kuamiwa poku linga olohundo kelimi lioku ilaika, olonjeveleli vi pondola oku mola manji ukãi o kasi oku pitiya ohundo yaco. Ovo citava okuti va muila manji ukãi vomakina yoviluvialuvia osimbu okuti, manji ulume o kasi oku linga ohundo yaco, pamue ka muiwa lolonjeveleli. Omo liaco, ca sunguluka okuti manji ukãi o pitiya ohundo yimue kelimi lioku ilaika, o kapako ocikele caye, kuenda o lekisa esumbilo poku futa elesu.

Omo lieliangiliyo liokaliye, vamanji akãi va pitiya ndati olondaka kelimi lioku ilaika kovipama Viosikola Yupange Wakristão, kovindekaise, poku eca atambululo vokuenda Kuelilongiso Liembimbiliya Vekongelo, Kohongele Yupange, kuenda Kelilongiso Liutala Wondavululi? Anga hẽ manji ukãi poku pitiya ovipama viaco kelimi lioku ilaika o sukila oku futa elesu? Citava okuti olonjanja vimue ka sukila oku futa elesu, momo olonjeveleli via kũlĩha okuti hayeko o kasi oku songola ohongele. Cimuamue haico a sukila oku linga kapuluvi amue ndeci, poku pitiya etambululo lia umue pokati kolonjeveleli, oku pitiya ovipama via vamanji akãi, ale ovindekaise. Pole, poku pitiya olohundo via vamanji alume kolohongele, oku pitiya Elilongiso Liutala Wondavululi, Elilongiso Liembimbiliya Vekongelo, ale poku songola ocisungo, manji ukãi o sukila oku futa elesu. Momo vokuenda kuohongele, eye o pitiya ulandu waco ku vamanji alume, akãi, omãla, kuenda akulu vekongelo. Omo liaco, o sukila oku futa elesu vokuenda kuohongele.

[Atosi pombuelo yamẽla]