Apulilo a Tambuluiwa

◼ Nda manji umue ukãi wa tunda la manji ulume kupange woku kunda, o sukila hẽ oku futa elesu poku songola elilongiso Liembimbiliya?

Nda manji umue ukãi wa tunda la manji ulume kupange woku kunda, o sukila oku futa elesu poku songola elilongiso Liembimbiliya. (1 Va Kor. 11:3-10) Utala Wondavululi 15 Yevambi Linene wo 2002 kemẽla 27, kelimi Lioputu u lombolola ndoco: “Eyi onepa yimue yatiamẽla kelilongiso, momo manji ukãi o kasi oku songola. Vepuluvi liaco, elilongiso Liembimbiliya li linga onepa yeliangiliyo liekongelo. Nda manji ukãi una wa papatisiwa o kasi oku songola elilongiso kumue la manji ulume wa papatisiwavo, o sukila oku futa elesu.” Onumbi yaco yi kuamiwavo eci manji ukãi wa papatisiwa a songola elilongiso Liembimbiliya kumue la manji umue ulume okuti ka papatisiwile. Cimuamue haico ci lingiwa poku songola elilongiso Liembimbiliya konjo yondonge, puvelo, ale kovitumãlo vikuavo.

Pole, nda elilongiso liaco Liembimbiliya ka lia tumbikiwile handi, manji ukãi ka sukila oku futa elesu nda o kasi la manji umue ulume. Handi vali, ka sukilavo oku futa elesu poku linga apasu oku fetika elilongiso liembimbiliya ale poku kũlĩhĩsa ocipama cimue velivulu lia sokiyiwila oku fetika alilongiso Embimbiliya. Omo okuti oku tumbika alilongiso Embimbiliya cambata otembo kuenda ci sukila oku linga apasu olonjanja vialua, vamanji akãi va sukila oku lekisa esunguluko kuenda oku kũlĩhisa nda vapuluvi aco ci sukila oku futa elesu.