Sanjukila Oku Eca Lutima Wosi

CATIAMẼLA koku eca, upostolo Paulu wa soneha hati: “Omunu omunu a ece ndeci a panga kutima waye; ha locikukuiko pamue omo a kisikiwa, momo Suku o sole u eca lesanju.” (2 Va Kor. 9:⁠7) Yehova ka kisika omunu oku eca ekuatiso kefendelo liocili. Eye ecelela okuti afendeli vaye va lekisa elitumbiko liavo poku eca lutima wosi ovina va kuete kuenda va ci linga lesanju. Tunde kosimbu, afendeli vaye va siata oku eca olombanjaile viavo lesanju. Tu konomuisi ovolandu atatu.

Eci Yehova a yovola va Isareli Kegito, wa va sapuila oco va tunge otavernakulu. Omo okuti upange waco wa sukilile ovikuata, va Isareli va vetiyiwa oku eca olombanjaile. Omo liaco, ‘omunu lomunu pokati kavo wa vetiyiwa’ oku nena ovina a kuete ndeci: ulu, opalata, ovina vioku posuisa, kuenda vikuavo. Omo okuti, omanu va eca olombanjaile vialua, noke kua lingiwa esapulo lioku liwekapo oku eca olombanjaile.​—⁠Etu. 35:​5, 21; 36:​6, 7.

Vokuenda kuotembo eci kua lingiwa esokiyo lioku tunga onembele, afendeli va Suku va lekisavo onjongole yoku kuatisa efendelo liocili. Soma Daviti wa eca olombanjaile vialua vioku kuatisa upange waco, kuenda wa laleka vakuavo oku ci linga. Omanu va ci linga lesanju. Momo olombanjaile viulu kuenda viopalata via pitahãlele 100 kolohuluwa violondolare kolombongo viotembo yilo! Omanu va sanjukile calua poku eca olombanjaile viavo ku Yehova.​—⁠1 Asa. 29:​3-9; 2 Asa. 5:⁠1.

Olondonge viatete via Yesu Kristu, via lekisavo ocituwa coku eca olombanjaile lesanju. Kunyamo wa 33, keteke lio Pendekoste kua papatisiwa 3.000 komanu. Valua pokati kavo ka va kalele vo Yerusalãi, momo va tundile kolofeka vikuavo. Oco omanu va kala volupale vokuenda kuotembo yimue va kuatisiwe oku pamisa ekolelo liavo, vamanji va sukilile oku kongola olombanjaile vimue violombongo. Vamue va landisa ovikuata viavo, kuenje va nena olombongo viaco kovapostolo oco vi kuatise omanu vaco. Yehova wa sanjukile calua poku limbuka ekolelo locisola va lekisa!​—⁠Ovil. 2:​41-47.

Koloneke vilo, Akristão va kasi oku amamako oku kuatisa efendelo liocili poku eca olombanjaile viavo lesanju, otembo yavo, longusu yavo, kuenda olombongo. Okakasia ka kuãimo, ka lekisa ndomo o pondola oku ci lingavo.

[Okakasia kemẽla 18]

Ceci Utima Wetu U Tu Vetiya Oku Eca Ovina Tu Kuete

Valua pokati Kolombangi Via Yehova olohukũi, vakuavo va siata oku liyaka lovitangi vioku sanga olombongo. Omo liaco, poku eca olombanjaile vioku kuatisa kupange woku kunda Usoma, tu sukila oku yuvula ocisimĩlo cokuti, olombanjaile vietu ka vi kuete esilivilo. Eci Yesu a mõla ukãi ocimbumba haeye ohukũi wa kapa ombanjaile yaye vokasia vonembele, ko pembuile. Pole, wa popia hati: “Ndu sapuili siti, Ocili ocimbumba eci, haico osuke, ca imbamo ca lua, vosi vakuavo ci sule. Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.” (Luka 21:​1-4) Ndaño wa eca ombanjaile yitito, pole wa eca ovina a kuatele.

Vamanji vosi va sukila oku linga esokiyo lioku eca olombanjaile vekongelo. Eci Akristão vo ko Yudea va sukilile ekuatiso, vamanji ko Korindo va yonguile oku eca ekuatiso, va tambula onumbi yiwa kupostolo Paulu. Eye wa soneha hati: “Kondaka yovilumba vioku kuatisa olosandu, ene lingi ndeci nda lombolola ale kakongelo o ko Galatia. Eteke liatete [kosemana] ene vosi, omunu omunu a [seleke] cimue ndomo a sumũlũha, okuti eci njiya ka va vetiya vali oku kongola.”​—⁠1 Va Kor. 16:​1, 2.

Ocili okuti, omanu va siata oku seleka olombongo vioku tetulula ovitangi viavo. Cimuamue haico Olombangi Via Yehova via siata oku linga okuti, vi seleka olombongo vioku kuatisa kefendelo liocili. Omo liaco, vamanji voluali luosi va siata oku eca olombanjaile oco vi kuatise koku kunda Usoma. Va ci linga poku sokiya olombongo omunu lomunu a yongola oku eca olosãi viosi. Omanu vamue va siatavo oku eca olombanjaile vioku kuatisa kupange woku kunda. Omo liaco, va siata oku kuata esanju lialua poku limbuka okuti, va kasi oku eca ovina va kuete.

Vamanji ko Filiale va siata oku tuma kakongelo ovikanda violopandu, noke yoku tambula olombanjaile via vamanji.

Ovo, va sanjuka calua poku tambula olombanjaile via siata oku eciwa la vosi, oco vi kuatise kupange woku kunda olondaka viwa viusoma wa Suku. Olombanjaile viaco via siata oku kuatisa olomisionaliu vi kasi kolofeka vialua. Via siatavo oku kuatisa koku landa olomakina vioku panga alivulu oco a tumiwe kakongelo. Olombanjaile viaco via siatavo oku kuatisa vamanji va nyula akongelo vimbo kuenda vofeka, oco va kuatise vamanji oku pama kespiritu. (Va Rom. 1:​11, 12) Vamanji va litumbika kupange wakundi votembo yosi, va siatavo oku kuatisiwa lolombanjaile viaco.

Vamanji va fetika tete oku eca olombanjaile viavo oco vi kuatise koku amamako lefendelo liocili, va tambula asumũlũho alua omo lioku sivaya Yehova lovina va kuete. Hesanjukuolio va kuata! Cimuamue haico ci pondola oku pita letu okuti, nda tua kuatisa kupange woku kunda u kasi oku lingiwa voluali luosi, tuka tambula asumũlũho alua. Omo liaco, tu amamiko oku lekisa onjongole yoku eca ovina tu kuete.