‘Tu Eci Olombanjaile Vietu ku Yehova’

ECI omunu umue a ku linga ohenda, ove o lekisa ndati olopandu? Kũlĩhĩsa ndomo vakesongo kolohoka via va Isareli va lekisa olopandu noke yoku yula va Midiane. Uyaki waco, weya oku lingiwa noke yeci va Isareli va lueyisiwa oku fendela Baale ya Peore. Suku wa eca eyulo komanu vaye, kuenje ci soka 12.000 viasualali vo ko Isareli, va litepela lomanu vakuavo ovina va punda kuyaki waco. Ndomo ca lekisiwa volonumbi via Yehova, asualali va eca onepa yovina vimue va punda kovitunda kuenda ku va Isareli vakuavo, kuenje onepa yikuavo va yeca ku va Lewi.—Ate. 31:1-5, 25-30.

Ocili okuti vakesongo kolohoka va yonguile oku linga vali ovina vialua. Noke va sapuila Mose vati: “Etu tuakuenje vove tua tenda ava va ile letu kovita kuenje ka kua kambele umue.” Ovo va lumba ku Yehova ulu kuenda ovina vikuavo via posoka. Kuenje va kongola eci ci soka 190 kolokilu viulu.—Ate. 31:49-54.

Ndeci ca pita kosimbu, koloneke vilo, omanu valua va vetiyiwavo oku lekisa olopandu kovina Yehova a va lingaila. Pole, afendeli va Suku, havoko lika va siata oku lekisa olopandu viaco. Konomuisa ulandu wulume umue ukuakuendisa okalela, wa ambatele ocimunga Colombangi via Yehova kohongele yolofeka ya lingiwila volupale luo Bolonya, kofeka yo Italia kunyamo wo 2009. Omo okuti wa endisa ciwa kuenda wa lekisa umbombe, vosi va endela vokalela kaco, vo sonehela okokanda kolopandu loku vokiya kolombongo viopasasi yavo kuenda va wĩha elivulu Embimbiliya li longisa Nye? Ulume waco wa tambulula hati: “Ngeca olopandu kukanda kuenda elivulu wa nyĩhi, pole olombongo via endela vukanda waco ndi vi tiuwiya kokuene ndombanjaile oco vu amamiko lupange wene. Ndaño Simbangiko ya Yehova, ndi yongola oku eca ombanjaile yaco momo nda limbuka okuti ene vu vetiyiwa locisola.”

Nda ove o sole ovina Yehova a ku lingaila, onjila yimue yoku lekisa olopandu, oku eca olombanjaile kupange woku kunda u lingiwa Lolombangi via Yehova koluali luosi. (Mat. 24:14) Vokakasia ka kuãimo mu sangiwa olonumbi vimue vi lekisa ndomo vamue va siata oku eca olombanjaile.

[Okakasia kemẽla 20]

CECI UTIMA WETU U TU VETIYA OKU ECA OVINA TU KUETE

Valua pokati Kolombangi via Yehova olohukũi, vakuavo va siata oku liyaka lovitangi vioku sanga olombongo. Omo liaco, poku eca olombanjaile vioku kuatisa kupange woku kunda Usoma, tu sukila oku yuvula ocisimĩlo cokuti, olombanjaile vietu ka vi kuete esilivilo. Eci Yesu a mõla ukãi ocimbumba haeye ohukũi wa kapa ombanjaile yaye vokasia yo vonembele, ko pembuile. Eye, wa popia hati: “Ndu sapuili siti, Ocili ocimbumba eci, haico osuke, ca imbamo ca lua, vosi vakuavo ci sule. Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.” (Luka 21:1-4) Ndaño okuti ukãi wa lumbile ombanjaile yitito, haimo wa eca ovina a kuatele lutima waye wosi.

Vamanji vosi va sukila oku linga esokiyo lioku eca olombanjaile viavo vekongelo. Eci Akristão vo ko Yudea va sukilile ekuatiso, vamanji ko Korindo va yonguile oku eca ekuatiso, va tambula onumbi yiwa kupostolo Paulu. Eye wa soneha hati: “Kondaka yovilumba vioku kuatisa olosandu, ene lingi ndeci nda lombolola ale kakongelo o ko Galatia. Eteke liatete [kosemana] ene vosi, omunu omunu a [seleke] cimue ndomo a sumũlũha, okuti eci njiya ka va vetiya vali oku kongola.”—1 Va Kor. 16:1, 2.

Ocili okuti, omanu va siata oku seleka olombongo vioku tetulula ovitangi viavo. Cimuamue haico Olombangi via Yehova vi lingainga poku seleka olombongo vioku kuatisa kefendelo liocili. Omo liaco, vamanji voluali luosi va siata oku eca olombanjaile oco vi kuatise koku kunda Usoma. Ovo va ci linga poku sokiya olombongo omunu lomunu a yongola oku eca olosãi viosi. Omanu vamue va siatavo oku eca olombanjaile vioku kuatisa kupange woku kunda. Omo liaco, va kuete esanju lialua poku limbuka okuti, va kasi oku eca lutima wosi ovina va kuete.

Vamanji ko Filiale va tumaisa kakongelo ovikanda violopandu, noke yoku tambula olombanjaile via vamanji.

Ovo, va sanjuka calua poku tambula olombanjaile via siata oku eciwa la vosi, oco vi kuatise kupange woku kunda olondaka viwa viusoma wa Suku. Olombanjaile viaco vi kuatisa olomisionaliu vi kasi kolofeka vialua. Vi kuatisavo koku landa olomakina vioku panga alivulu oco a tumiwe kakongelo. Handi vali, olombanjaile viaco vi kuatisa vamanji va nyula akongelo vimbo kuenda vofeka, oco va pamise vamanji konepa yespiritu. (Va Rom. 1:11, 12) Vamanji va litumbika kupange wakundi votembo yosi, va kuatisiwavo lolombanjaile viaco.

Vamanji va fetika tete oku eca olombanjaile viavo oco vi kuatise koku amamako lefendelo liocili, va tambula asumũlũho alua omo lioku sivaya Yehova lovina va kuete. Hesanjukuolio va kuata! Cimuamue haico ci pondola oku pita letu okuti, nda tua kuatisa kupange woku kunda u kasi oku lingiwa voluali luosi, tu ka tambula asumũlũho alua. Omo liaco, tu amamiko oku lekisa onjongole yoku eca ovina tu kuete.

Omanu kuenda vamanji va sangiwa vakongelo okuti va yongola oku eca olombanjaile, va pondola oku vi tuma ko

Associação das Testemunhas de Jeová, Rua Talatona n.°1—Luanda Sul, Caixa Postal 6877 Luanda—Angola