Ove hẽ o Pondola Oku Enda ko Makedonia?
UPOSTOLO Paulu eci a kala kolupale luo Torasi ko Asia Menor, wa kuata ocinjonde cimue. Vocinjonde caco wa mola ulume umue u Makedonia wa pinga kokuaye hati: “Yokila ko Makedonia oco o tu kuatise.” Noke liocinjonde caco, Paulu kumue lakamba vaye va limbuka okuti, ‘Suku wa va tuma oku kundila olondaka viwa’ ko Makedonia. Nye ceyililako? Volupale luo Filipoi ko Makedonia, va sangamo ukãi umue o tukuiwa hati, Ludia. Kuenje, eye kumue la vakuanjo yaye, va tava kolondaka viwa. Vakuavo va kala ko Roma volupale luo Makedonia, va tavavo kesapulo liaco.—Ovil. 16:9-15.
Koloneke vilo, Olombangi via Yehova via siatavo oku lekisa ombili yaco. Valua va siata oku ilukila kovitumãlo vina ku sukila ekuatiso liakundi Vusoma. Kũlĩhĩsa ulandu wa manji umue o tukuiwa hati, Lisa. Eye wa yonguile oku tiamisila lika utima kupange woku kunda. Omo liaco, wa tunda ko Kanada kuenje wa enda kofeka yo Kenia. Manji Trevor la Emily va tunda kofeka yo Kanada, kuenje va enda kofeka yo Malawi locimãho coku vokiya upange wavo woku kunda. Manji Paul la Maggie va tunda kofeka yo Inglaterra, eci va liwekapo oku talavaya kupange woku sanda eteku omo lioku kuka, va nõlapo oku vokiya upange wavo woku kunda. Kuenje, va enda kofeka yimue yi kasi Konano yo Afrika. Ove hẽ, o kuetevo onjongole yoku ci linga? Anga hẽ, o pondolavo oku ilukila kofeka yikuavo locimãho coku vokiya upange wove woku kunda? Nda oco, olonumbi vipi Viembimbiliya kuenda vikuavo vi ku kuatisa oku ci linga?
Kũlĩhĩsa Ekalo Liove
Catete, o sukila oku kũlĩhĩsa onjongole yove. Yesu wa popia hati, ocihandeleko ca velapo ceci: “Sola Ñala Suku yove lutima wove wosi lomuenyo wove wosi lolondunge viove viosi.” Oco omunu a kundile vocikanjo cikuavo, o sukila oku sola Suku kuenda oku kuata onjongole yoku tẽlisa ocikundi coku longisa omanu oco va linge olondonge. Yesu wamisako hati: “Cavali ca lisoka laco, ceci, okuti, ‘Sola u o lisungue love [ale vakuene,] ndeci o lisole ove muẽle.’” Tu lekisa ocisola cetu komanu, poku kuata onjongole yoku va kuatisa. (Mat. 22:36-39; 28:19, 20) Voku ilukila kofeka yikuavo, locimãho coku kunda olondaka viwa, mua kongela oku lieca olumue, kuenda ovina vikuavo. Momo ka ci sokisiwa loku linga ungende woku enda kolomapalo. Ocisola oco ci ku vetiya oku ci linga. Manji Remco lukãi waye Suzanne vo kofeka yo Holanda okuti cilo va ilukila kofeka yo Namibia kuna va kasi oku kundila olondaka viwa, va lombolola hati: “Ocisola oco ci kasi oku tu kuatisa oku amamako lupange waco.”
Manji umue o nyula akongelo vimbo o tukuiwa hati, Willie, kofeka yo Namibia, wa popia hati: “Vamanji va kasi oku kundila kovikanjo violofeka vikuavo, ka veyile locisimĩlo coku kuatisiwa la vamanji vofeka yaco. Pole, veya lonjongole yoku kuatisa vamanji vakuafeka yaco kupange woku kunda.”
Noke yoku kũlĩhĩsa onjongole yove, lipula ndoco: ‘Anga hẽ ndi pondola oku kuatisa omanu vocikanjo cofeka yikuavo? Nda loñoloha kupange woku kunda? Elimi lipi ndi tẽla oku vangula? Anga hẽ, ndi pondola oku lilongisa elimi likuavo?’ Konomuisa lutate ondaka yaco lepata liove. Pinga ekuatiso kakulu vekongelo. Likutilila ku Yehova catiamẽla kondaka yaco. Nda wa ci linga, ci ku kuatisa oku limbuka nda o pondola oku ilukila vocikanjo cofeka yikuavo.—Tanga pokakasia losapi hati: “Kũlĩhĩsa Ekalo Liove.”
Vocikanjo o Sukila Oku Kundila
Vocinjonde Paulu a kuata, wa lalekiwa oku ka kundila ko Makedonia. Koloneke vilo, Yehova ka tu songuila vali lovikomo. Pole, lekuatiso Liutala ulo Wondavululi kuenda alivulu akuavo, afendeli va Suku va siata oku kũlĩha ovikanjo vialua vi sukila ekuatiso. Omo liaco, soneha ovikanjo vimue vi sukila ekuatiso. Nda ku pondola oku lilongisa elimi likuavo, ale oku ilukila kofeka yikuavo, sokolola oku kundila vocikanjo cofeka yove, muna va vangula elimi liove. Noke kũlĩhĩsa ovina vimue ndeci: Ukanda wuvangi wecelela oku kala vofeka yikuavo, ocendelo, ekalo liofeka yaco, ondando yovikulia, kuenda kũlĩhĩsavo nda vofeka yaco mu talala calua ale muli owuya walua. Sapelavo la vamanji vana va ilukila kolofeka vikuavo. Ci linga lekuatiso liohutililo oco o nõle onjila ya sunguluka o yongola oku kuama. Ivaluka okuti, Paulu lakamba vaye “va tatekiwa lespiritu sandu oku kundila ondaka [ko] Asia.” Ndaño va yonguile oku enda ko Bitunia pole, “espiritu lia Yesu ka lia tavele” oku ci linga. Cimuamue haico o sukila oku linga, poku kũlĩhĩsa ocikanjo o yongola oku kuatisa.—Ovil. 16:6-10.
Cilo wa kũlĩha olonjila vimue o pondola oku kuama. Nda o yongola oku ka kundila kofeka yikuavo, sonehela kofiliale Yolombangi Via Yehova yo kofeka o yongola oku enda. Lombolola ovikele viove vekongelo lovopange wa enda oku linga kosimbu kuenda koloneke vilo. Pulisa nda caleluka oku landa ovina ale ka calelukile, nda o pondola oku feta onjo oka kala, oku tatiwa kosipitali, kuenda upange woku sanda eteku. Noke eca ukanda waco kakulu vekongelo vakuacisoko cupange. Ovo vaka sonehavo ukanda weca uvangi watiamẽla kokuove kuenda oku u tuma kofiliale yofeka o yongola oku enda. Etambululo li tunda kofiliale yofeka yaco, li ku kuatisa oku nõla nda o yongola oku enda kofeka yaco ale sio.
Manji Willie, wa tukuiwa kefetikilo liocipama cilo, wa popia hati: “Vamanji vana va siata oku ilukila kofeka yikuavo, osimbu ka va ci lingile, tete va nyula ofeka yaco, oco va kũlĩhĩse ekalo liaco nda ci tava oku iluka ale sio. Manji umue lukãi waye va limbuka okuti, ka va pondola oku ilukila kocitumãlo ci kasi ocipãla. Omo liaco, va nõlapo oku kala volupale lumue lutito mua sukilile ekuatiso okuti, ekalo liolupale luaco, li va ecelela oku linga upange wavo lesanju.”
Oku Liyaka Lovitangi Viokaliye
Voku ilukila kofeka yikuavo, mua kongela oku liyaka lovitangi vialua. Manji Lisa wa tukuiwa kefetikilo liocipama cilo, wa popia hati: “Omunu o pondola oku kuata ongeva yalua, omo lioku kala ulika.” Nye co kuatisa oku yula ocitangi caco? Wa ci linga poku likolisilako oku kuata ukamba la vamanji vekongelo a ilukila. Wa likolisilako oku kũlĩha olonduko via vamanji vosi. Wa tẽlisa ocimãho caco, poku pitila selo Vonjango Yusoma, oco a sapele lavamanji osimbu ohongele ka ya fetikile, kuenda kesulilo liohongele. Manji Lisa wa enda oku talavaya la vamanji kupange woku kunda, loku va laleka konjo yaye, oco a linge ukamba lavo. Eye wa popia hati: “Sia sumuile omo lialikolisilo nda linga. Yehova wa siata oku ndi sumũlũisa calua.”
Manji Paul lukãi waye Maggie eci va limbuka okuti omãla vavo va kula, va siapo onjo yavo muna va kala ci soka 30 kanyamo. Eye wa popia hati: “Ca lelukile oku siapo ovikuata. Pole, ka ca lelukile oku siapo epata lietu. Tua lila calua. Kuenje, tua livela loku sima ndoco: ‘Ka tua nõlele onjila yiwa.’ Pole, tua kolela Yehova. Oku kuata akamba vokaliye ca tu kuatisa oku amamako lonjila tua nõla.”
Manji Greg lukãi waye Crystal kofeka yo Kanada, va nõlapo oku ilukila kofeka yo Namibia, momo va vangula elimi Liongelesi li vanguiwa vofeka yavo. Noke va limbuka esilivilo lioku lilongisa elimi likuavo liofeka yaco. Ovo va popia hati: “Olonjanja vimue tua enda oku sumua calua. Pole, tua fetika lika oku kũlĩha ciwa ovituwa viomanu vaco, noke yoku lilongisa elimi likuavo liofeka. Oku kuata ukamba la vamanji, ca tu kuatisa oku lilongisa ovituwa viokaliye.”
Vamanji vofeka yaco, va siata oku lekisa eliketiso kuenda esunguluko. Manji Jenny ivaluka epata limue lia ilukila kofeka yo Irlanda, kuna a kulila. Eye wa popia hati: “Ovo va kuata ocituwa coku yekisa akombe. Veya lonjongole yoku vumba, pole, ka veyile locisimĩlo coku vumbiwa. Va kala vakuambili kupange woku kunda haivo va sanjuka kuenje nda seteka oku kuama ongangu yavo.” Manji Jenny lulume waye, cilo va kasi oku talavaya kupange wumisionaliu kofeka yo Gambia.
Esumũlũho Lia Yehova “li Muisa Ukuasi”
Paulu wa kuata asumũlũho alua ko Makedonia! Eci pa pita anyamo ekũi, wa sonehela vamanji ko Filipoi hati: “Njimba olopandu ku Suku yange olonjanja viosi eci ndu wivaluki.”—Va Fil. 1:3.
Manji Trevor la Emily, vana va kuatisa kupange woku kunda kofeka yo Malawi, osimbu ka va lalekiwile oco va pindisiwe Kosikola yo Gileada, va kuatavo asumũlũho alua. Ovo va popia hati: “Olonjanja vimue tua enda oku sokolola nda tua nõla onjila ya sunguluka, pole, tua kuata esanju lialua kupange waco. Tua linga ukamba la vakuetu, kuenda tua limbuka esumũlũho li tunda ku Yehova.” Manji Greg la Crystal, va tukuiwa kefetikilo liocipama cilo, va popia hati: “Upange tua nõlapo oku linga, wa velapo okuti ovina vikuavo vi sule.”
Kuli vamanji valua okuti ekalo liavo ka li va ecelela oku kundila olondaka viwa kofeka yikuavo. Vamue va pondola lika oku ilukila kocikanjo cikuavo vofeka yavo kuna ku sukila ekuatiso liakundi. Vakuavo va kuete ocimãho coku kuatisa ekongelo likuavo li kasi ocipepi locikanjo cavo. Pole, oku likolisilako oku vumba Yehova, oyo onjila yavelapo tu sukila oku kuama. (Va Kol. 3:23) Nda wa ci linga, oka limbuka oku tẽlisiwa kuolondaka viovisonehua vi popia hati: “Esumũluho lia Yehova li muisa ukuasi, hailio ka li vokiya vali ohali.”—Olosap. 10:22.
[Okakasia kemẽla 5]
Kũlĩhĩsa Ekalo Liove
Kũlĩhĩsa ekalo liove nda o pondola oku ilukila kofeka yikuavo ale sio. Konomuisa apulilo akuãimo, kuenje lekuatiso liohutililo, kũlĩhĩsa nda citava oku ilukila kocikanjo cikuavo. Olonumbi vi sangiwa Vutala Wondavululi wa sandekiwa kosimbu, vi pondola oku ku kuatisa oku ci linga.
• Anga hẽ, nda tiamisila utima kovina viespiritu?—“Ovina vi Kuatisa Omunu Oku Kuata Esanju” (15 ya Mbalavipembe wo 1997, kemẽla 6, kelimi Lioputu)
• Anga hẽ, ndi kuete ombili yoku linga upange woku kunda?—“Ndomo o Kuata Esanju Kupange Wakundi Votembo Yosi” (15 ya Kupemba wo 1989, kemẽla 21, kelimi Lioputu)
• Anga hẽ, ndi pondola oku siapo epata liange lakamba vange?—“Ndomo tu Liyaka Lesumuo Omo Liongeva Poku Linga Upange wa Suku” (15 ya Kupemba wo 1994, kemẽla 28, kelimi Lioputu)
• Ndi pondola hẽ oku lilongisa elimi likuavo?—“Oku Talavaya Vekongelo va Vangula Elimi Liofeka Yikuavo” (15 Yelombo wo 2006, kemẽla 17, kelimi Lioputu)
• Anga hẽ, ndi pondola oku feta olombongo viange poku ilukila kocitumãlo cikuavo?—“Anga hẽ o Pondola Oku Kundila Vocikanjo Cofeka Yikuavo?” (15 ya Mbalavipembe wo 1999, kemẽla 23, kelimi Lioputu)
[Elitalatu kemẽla 6]
Oku lekisa eliketiso lesunguluko, ci kuatisa vamanji vofeka yaco
[Elitalatu kemẽla 7]
Vana veya oku kuatisa vocikanjo, va siata oku kuata esanju