Momo Lie Wa Litumbikila Ku Yehova?

“Uteke wetaili kua nukulukila ungelo wa Suku yange u ndi vumba.”​—⁠OVIL. 27:⁠23.

1. Ananga api omanu va yongola oku papatisiwa va sukila oku eca, kuenda eci ci votola apulilo api?

“VONDUKO yocilumba ca Yesu Kristu, wa li kekembela akandu ove kuenje wa litumbika ku Yehova oco o linge ocipango Caye?” Eli, limue pokati kapulilo avali, a siata oku tambuluiwa lava va ka papatisiwa kesulilo liohundo yepapatiso. Momo lie Akristão va sukilila oku litumbika ku Yehova? Elitumbiko lietu ku Suku li tu kuatisa ndati? Momo lie omunu una ka fendela Suku ka taviwila laye, osimbu ka litumbikile kokuaye? Oco tu kuate elomboloko liapulilo a-a, tete tu konomuisi eci ci lomboloka elitumbiko.

2. Nye ci lomboloka omunu oku litumbika ku Yehova?

² Nye ci lomboloka omunu oku litumbika ku Suku? Kũlĩhisa ndomo upostolo Paulu a lombolola ukamba a kuata la Suku. Eye wa tukula Yehova hati, “Suku yange u ndi vumba” kovaso yomanu valua, a linga lavo ungende vonaviyu yina ya kala kohele. (Tanga Ovilinga 27:​22-24.) Akristão vocili, va tiamẽla ku Yehova, pole oluali luosi “lu kasi povaka eliapu.” (1 Yoa. 5:​19) Akristão va tiamẽla lika ku Yehova eci omunu lomunu a linga ohutililo yelitumbiko lutima wa sunguluka. Poku litumbika, omunu o linga ohuminyo lutima waye wosi. Kuenje o papatisiwa vovava.

3. Epapatiso lia Yesu lia kuata elomboloko lie, kuenda olondonge viaye vi kuama ndati ongangu yaco?

³ Yesu wa eca ongangu yiwa, eci a nõlapo oku linga ocipango ca Suku. Omo okuti eye wa citiwila vepata lia Isareli lina lia li tumbikile ale ku Suku, ka sukilile vali oku linga elitumbiko. Ocili okuti, toke kepapatiso liaye, wa sukilile oku linga ovina via kisikiwile Vocihandeleko. Ndomo ca lekisiwa Vondaka ya Suku eye wa popia hati: “A Suku, ndeya oku linga ocipango cove.” (Va Hev. 10:7; Luka 3:​21) Epapatiso lia Yesu, lia kala ocindekaise celitumbiko liaye ku Suku oco a lingi ocipango ca Isiaye. Olondonge via Yesu vi setukula ongangu yaye eci omunu lomunu a litumbika oco a papatisiwe. Pole, omunu poku papatisiwa vovava, o lekisa komanu okuti wa litumbika ale ku Suku vohutililo.

Ndomo Elitumbiko li tu Kuatisa

4. Ukamba wa kala pokati ka Daviti la Yonatão u tu longisa nye catiamẽla koku linga ohuminyo?

⁴ Elitumbiko lietu ku Suku, li kuete esilivilo. Olio lia velapo ohuminyo yosi omunu a linga. Oku linga elitumbiko ku tu kuatisa ndati? Ndocindekaise, tu konomuisi ndomo ohuminyo omanu va linga la vakuavo yi pondola oku va nenẽla onima. Ocindekaise catete, ukamba. Oco o kuate ukamba lomunu umue, ove o sukila oku tava ocikele coku kala ekamba liomunu waco. Omu mua kongela oku linga ohuminyo yoku tata ekamba liove. Ukamba umue wa velapo wa tukuiwa Vembimbiliya, wowu wa kala pokati ka Daviti la Yonatão. Ovo va linga ocisila omunu lukuavo. (Tanga 1 Samuele 17:57; 18:​1, 3.) Ndaño okuti ukamba wavo wa velelepo cocili, oco va amameko lukamba waco, ca sukilile okuti omunu lomunu amamako oku tata ukuavo.​—⁠Olosap. 17:17; 18:⁠24.

5. Oco upika a kale la cime caye otembo yosi wa sukilile oku linga nye?

⁵ Ocihandeleko Suku a ecele ku va Isareli, ca tukula ocina cikuavo ca enda oku kuatisa omanu poku linga ohuminyo. Nda okuti upika wa yonguile oku kala la cime caye otembo yosi omo o sola calua, wa sukilile oku lisila laye ocisila. Ocihandeleko caco ci popia ndoco: “Nda upika eye muẽle o popia hati, Ndi sole cime cange lukãi wange lomãla vange, si tundipo ndomamãle, nda oco, cime caye u tuala ku Suku, u tualavo puvelo pamue kocikuli kuenje cime caye u tombola ketũi liaye lociketelo; noke o vumba ño hũ.”​—⁠Etu. 21:​5, 6.

6, 7. Oku linga ohuminyo ca enda oku kuatisa ndati omanu kosimbu? (b) Eci ci lekisa nye catiamẽla kukamba tu kuete la Yehova?

⁶ Olohuela, ocina cikuavo ci sukila oku linga ohuminyo ya velapo lomunu umue. Ohuminyo yaco ka yi kasi nduvangi womĩlu. Nda okuti omanu vavali va kasi pamosi pole ka va sonehisa uvangi wolohuela viavo, ka va pondola oku kolapo loku kuata esanju ovo muẽle kuenda omãla vavo. Nda omanu vavali va linga ohuminyo yoku sumbila olohuela viavo, eci ku iya ovitangi, ovo va kakatela kolonumbi Viovisonehua kuenda va vi tetulula locisola.​—⁠Mat. 19:​5, 6; 1 Va Kor. 13:​7, 8; Va Hev. 13:⁠4.

⁷ Kosimbu, omanu poku linga olomĩlu pamue poku iñila kupange, va enda oku soneha uvangi wohuminyo. (Mat. 20:​1, 2, 8) Koloneke vilo, oku ci linga ci kuete esilivilo lialua. Nda osimbu ka tua iñilile kupange ale poku linga omĩlu lomunu ukuavo, tete tu soneha uvangi wohuminyo lomunu waco pamue locisoko cimue cupange, ci pondola oku tu kuatisa. Nda okuti voku linga ukamba, olohuela, kuenda oku iñila kupange, ci sukila uvangi wohuminyo, ohuminyo yelitumbiko vukamba wove la Yehova, ya velapo vali okuti olohuminyo vikuavo ci sule! Tu konomuisi ndomo omanu kosimbu va enda oku kuatisiwa poku litumbika ku Yehova Suku, kuenda ndomo elitumbiko liaco lia velelepo olohuminyo viosi.

Ndomo Oku Litumbika ku Suku Kua Kuatisa va Isareli

8. Oku litumbika ku Suku kua lombolokele nye ku va Isareli?

⁸ Va Isareli vosi, va litumbikile ku Yehova poku linga ocisila la Suku. Yehova wa va ongoluila ocipepi Lomunda Sinai, yu wa popia lavo hati: “Nda wu yeva ocili kondaka yange, loku tata ocisila cange, ene muẽle vu nõliwa pokati kolofeka viosi oku linga omanu vange muẽle.” Kuenje omanu vosi va kumbuluila kumuamue, vati: “Cosi Yehova a popia tu ci linga.” (Etu. 19:​4-8) Ohuminyo yelitumbiko va Isareli va lingile ya velelepo ovina vikuavo. Ya lombolokele oku tiamẽla ku Yehova, kuenje Yehova wa va tendele ‘ndomanu vaye muẽle.’

9. Va Isareli va kuatisiwa ndati poku litumbika ku Suku?

⁹ Va Isareli va kuatisiwa calua omo lioku tiamẽla ku Yehova. Eye wa li kakatela kokuavo kuenda wa va tata locisola nda isia o tata omõlaye. Suku wa sapuila va Isareli hati: “Ukãi nga, ivala omõlaye o nyama okuti ka lingi ohenda omõla wovimo liaye? Oco muẽle, ci tava okuti ava va ivala, ame, puãi siu ku ivala.” (Isa. 49:​15) Yehova wa eca kokuavo Ocihandeleko ca va songuila, wa va lungowaile lovaprofeto, kuenda wa va teyuila lovangelo. Ukualosamo umue wa soneha ndoco: “O sapuila Yakoba ondaka yaye. O lombolola ku Isareli ovisila viaye lovihõlo viaye. Layimue vali ofeka a linga ndoco.” (Osa. 147:​19, 20; tanga Osamo 34:​7, 19; 48:14.) Ndeci kosimbu Yehova a tata ofeka ya tiamẽlele kokuaye, koloneke vilo, eye o tatavo vana va litumbika kokuaye.

Esunga Lieci Omunu Lomunu a Litumbikila ku Suku

10, 11. Anga hẽ etu tua citiwila vepata lia Suku? Ci lombolola.

¹⁰ Osimbu omunu a sokolola ndomo a litumbika oco a papatisiwe, pamue o lipula ndoco, ‘Momo lie si fendelela ño ndoco Suku okuti si litumbika vali kokuaye?’ Ocisimĩlo caco, tu ci limbukila poku kũlĩhisa ndomo ekalo lietu li kasi kovaso a Suku. Ivaluka okuti omo Adama a linga ekandu, vosi yetu ka tua citiwilile vepata lia Suku. (Va Rom. 3:23; 5:​12) Oku litumbika ku Suku, ocina cimue ci kuete esilivilo oco tu taviwe oku kala vepata liaye. Tu konomuisi esunga liaco.

¹¹ Lomue pokati ketu o pondola oku piñala ku isiaye omuenyo we lipua. (1 Tim. 6:​19) Etu ka tua citiwile ndomãla va Suku, omo ohueli yatete, ya linga ekandu kuenje ombuto yosi yomanu ya litepa la Isia ukuacisola, haeye Ululiki wetu. (Ci sokisa Lesinumuĩlo 32:⁠5.) Oku upisa opo, ocitumbulukila cosi comanu ca litepa la Yehova kuenda epata lia Suku.

12. (a) Omanu ka va lipuile va pondola oku tiamẽla ndati kepata lia Suku? (b) Osimbu ka tua papatisiwile ananga api tu sukila oku eca?

¹² Haimo lumue, omunu lomunu pokati ketu, o pondola oku pinga ku Suku oco tu taviwe oku tiamẽla kepata liafendeli vaye.a Omo okuti tuakuakandu, eci ci tẽliwa hẽ ndati? Uposotolo Paulu wa soneha ndoco: “Osimbu tua kaile ovanyali va Suku, tua inalisua kokuaye lokufa ku’Omõlaye, siti, cilo, omo tua inalisua ale, ci piãla vali oku popelua lomuenyo w’Omõlaco.” (Va Rom. 5:​10) Poku papatisiwa, tu pinga ku Suku lutima wetu wosi oco tu taviwe laye. (1 Pet. 3:​21) Pole, osimbu handi ka tua papatisiwile, tu sukila oku eca ananga amue. Tu sukila oku kũlĩha Suku, oku kolela kokuaye, oku likekembela akandu etu kuenda oku linga apongoloko komuenyo wetu. (Yoa. 17:3; Ovil. 3:19; Va Hev. 11:⁠6) Kuli vali ocina cikuavo tu sukila oku linga oco tu taviwe oku kala vepata lia Suku. Cipi ocina caco?

13. Momo lie ca sungulukila omunu oku linga ohuminyo yoku litumbika ku Suku oco a tiamẽle kepata liafendeli Vaye?

¹³ Omunu wa litepa ku Suku osimbu ka taviwile oku tiamẽla kepata liafendeli Vaye, tete o sukila oku linga ohuminyo ku Yehova. Oco o kuate elomboloko liaco, sokolola isia umue wa sumbiwa calua haeye o lekisa ohenda komõlosiwe, kuenje u tambula ha lingi onepa kepata liaye. Isia yaco, wa kũlĩhiwa ndomunu umue uwa. Pole, osimbu eye ka tambuile umalẽhe ndomõlaye, isia o yongola okuti umalẽhe u o linga ohuminyo yimue. Ulume o popia ndoco, “Oco hu tambule ndomõlange, te wa lekisa ocisola loku ndi sumbila nda isiove.” Isia o tambula lika umalẽhe ndomõla ukuepata liaye, nda omõlaco o tava oku linga ohuminyo vo kisika. Eci hẽ ka ca sungulukile? Cimuamue haico ci pita letu, okuti Yehova o tava lika omunu oku tiamẽla kepata liaye nda omunu waco o linga ohuminyo yoku litumbika kokuaye. Embimbiliya li popia hati: “Eci atimba ene kokuaye, ndocilumba ci kasi lomuenyo, poku litumbika, ho taviwa laye.” ​—⁠Va Rom. 12:​1, The New English Bible.

Elitumbiko Ocindekaise Cocisola Kuenda Ekolelo

14. Momo lie tu popela okuti elitumbiko ocindekaise cocisola?

¹⁴ Ohuminyo tu linga poku litumbika ku Suku, ocindekaise cocisola tu kuetele Yehova. Oyo yi sokisiwa lohuminyo yolohuela. Ukristão sandombua, o linga ohuminyo yoku kakatela loku sola ca piãla ndombua yaye, nda ku iya nye, nda ku iya nye. Ohuminyo yolohuela ya velapo okuti olohuminyo vikuavo omunu a linga vi sule. Ukristão sandombua wa kũlĩha ciwa okuti eye ka pondola oku kala la ndombua yaye nda ka lisila laye ocisila colohuela. Cimuamue haico ci pita letu, okuti ka tu pondola oku tiamẽla kepata liafendeli va Yehova nda ka tu lingi ohuminyo yelitumbiko lietu. Etu tua litumbika ku Suku, momo ndaño tuakuakandu, tu yongola oku tiamẽla loku kakatela kokuaye ndaño ku iya eci loco.​—⁠Mat. 22:⁠37.

15. Ndamupi elitumbiko ocindekaise cekolelo?

¹⁵ Elitumbiko lietu ku Suku, ocindekaise cekolelo tu u kuetele. Momo lie? Momo ekolelo tu kuetele Yehova li tu vetiya oku limbuka okuti oku kuata ukamba la Suku ci kuete esilivilo lialua. (Osa. 73:​28) Tu ci okuti, olonjanja vimue oku endaenda la Suku ka ca lelukile, momo tu kasi pokati “kocitumbulukila cilo cevĩho,” pole tua kolela okuti nda tu likolisilako, Suku o tu kuatisa oku ci linga. (Va Fil. 2:15; 4:​13) Tua kũlĩha okuti omo etu ka tua lipuile, eci tu lueya, Yehova o tu linga ohenda. (Tanga Osamo 103:​13, 14; Va Roma 7:​21-25.) Tua kolelavo okuti Yehova o ka sumũlũisa onjongole yetu yoku amamako oku kakatela kesunga.​—⁠Yovi 27:⁠5.

Oku Litumbika ku Suku ci Nena Esanju

16, 17. Momo lie oku litumbika ku Yehova ci nenẽla esanju liocili?

¹⁶ Oku li eca olumue poku litumbika ku Yehova, ci nena esanju liocili. Yesu wa tukula etosi limue lia velapo poku popia hati: “Esanju li tunda koku eca olio lia velapo, eli li tunda koku tambula li sule.” (Ovil. 20:​35, NW) Yesu wa yeva esanju li tunda koku eca eci a linga upange waye woku kunda palo posi. Olonjanja vialua, eye ka kuatele otembo yoku puyuka, pamue yoku lia, momo wa sakalaile loku kuatisa omanu oku sanga onjila yomuenyo. (Yoa. 4:​34) Yesu omo wa yonguile oku sanjuisa utima wa Isiaye, wa popia ndoco: “Ndingainga ño-o ovina viu sanjuisa.”​—⁠Yoa. 8:29; Olosap. 27:⁠11.

¹⁷ Yesu wa lekisa kolondonge viaye eci ci nena esanju liocili komuenyo, poku popia hati: “Umue nda o yongola oku ñuama, ka ka litende vali eye muẽle.” (Mat. 16:​24) Oku ci linga, ci tu vetiya oku amẽla ku Yehova. Anga hẽ etu tu yongola oku li eca olumue komunu una o pondola oku tu tata locisola?

18. Momo lie vana va ambata omuenyo u li tava lelitumbiko liavo ku Yehova, va kuetele esanju okuti ava va litumbika kovina vikuavo ci sule?

¹⁸ Elitumbiko lietu ku Yehova kuenda oku ambata omuenyo u litava lelitumbiko liaco, ci nena esanju lia piãla okuti ohuminyo tu linga lomunu umue pamue ovina vikuavo yi sule. Kuli omanu vana okuti va tumbika omuenyo wavo koku sandiliya lika ovokuasi, puãi ka va kuete esanju liocili. Pole, vosi vana va litumbika ku Yehova va sanga esanju ka li pui. (Mat. 6:​24) Esumũlũho lioku kala “olondingupange via Suku” li va ĩha esanju, momo ovo ka va litumbikile kupange umue, te oku litumbika lika ku Suku yetu ukualopandu. (1 Va Kor. 3:​9, NW) Ka kuli umue wa lisoka la Suku koku lekisa olopandu. Eye o ka tumbulula omanu vakuesunga okuti va linga vali amalẽhe, kuenda o ka va tata otembo yenda ño hũ.​—⁠Yovi 33:25; tanga Va Heveru 6:⁠10.

19. Vana va litumbika ku Yehova va kuete esumũlũho lie?

¹⁹ Elitumbiko liove li ku nenẽla ukamba wocili laye. Embimbiliya li popia ndoco: “Ameli ku Suku kuenje eye amela kokuene.” (Tia. 4:8; Osa. 25:​14) Vocipama ci kuãimo, tu ka konomuisa esunga lieci tu sukilila oku kolela konjila tua nõla yoku tiamẽla ku Yehova.

[Atosi pombuelo yamẽla]

O Tambulula Ndati?

• Nye ci lomboloka oku litumbika ku Suku?

• Oku litumbika ku Suku ku tu kuatisa ndati?

• Momo lie Akristão va sukilila oku litumbika ku Yehova?

[Elitalatu kemẽla 6]

Oku ambata omuenyo u li tava lelitumbiko lietu ci tu nenẽla esanju ka li pui