Kuendi, Ka Longisi Omanu Loku Va Papatisa
‘Kuendi, ka tavisi omanu volofeka viosi oco va linge olondonge. Va papatisi. Va longisi oku linga ovina viosi ndo kundiki.’—MATEO 28:19, 20.
1. Ohuminyo yipi va Isareli va lingile ku Yehova eci va kala Komunda Sinai?
CISOKA 3.500 kanyamo konyima, va Isareli va lingile ocisila la Yehova. Eci va kala Komunda Sinai, va likuminyile hati: “Cosi Yehova a popia tu ci linga.” Okupisa keteke liaco, va Isareli va linga omanu va litumbika ku Suku okuti va ‘tiamẽla kokuaye.’ (Etundilo 19:5, 8; 24:3) Ovo tunde osimbu va kala oku lavoka eteyuilo lia Yehova kuenda oku kala anyamo alua ‘vofeka yi tumõha asenjele lowiki.’—Ovisila 20:24.
2. Koloneke vilo ukamba upi omanu va pondola oku kuata la Yehova?
2 Ndomo ukualosamo Asafe a ci popia, va Isareli ‘ka va lavele ocisila ca Suku, kuenda va likala oku endela vovihandeleko viaye.’ (Osamo 78:10) Ovo ka va tẽlisile ohuminyo yina vakukululu yavo va lingile la Yehova. Kuenje, va pumba ukamba wavo la Yehova. (Ukundi 5:4; Mateo 23:37, 38) Omo liaco, Suku ‘watiamisila utima waye ku vakualofeka oco a nõle omanu vamue va tukuiwa londuko yaye.’ (Ovilinga 15:14) Koloneke vilo via sulako, Yehova o kasi oku ongolola “owiñi wakahandangala okuti, oku va tenda lomue o ci tela. Va tunda kolofeka viosi . . . okuti omanu vakuapata osi kuenda vakualimi osi.” Ovo va limbuka okuti, ‘epopelo li tunda lika ku Suku yetu, u wa tumala kocalo kuenda ku Kameme.’—Esituluilo 7:9, 10.
3. Nye omunu a sukila oku linga oco a kuate ukamba la Yehova?
3 Oco omunu atiamẽle kocisoko comanu va Suku o sukila oku litumbika ku Yehova kuenda oku papatisiwa. Elitumbiko lepapatiso, vi eca uvangi woku pokola kolondaka Yesu a sapuila olondonge viaye hati: “Kuendi, ka tavisi [omanu volofeka] viosi oco va linge olondonge. Va papatisili vonduko ya Tate la Mõla, kuenda espiritu sandu. Va longisi oku linga ovina viosi ndo kundiki. Kuenje ame ñasi [kumue] lene oloneke viosi toke kesulilo lioluali.” (Mateo 28:19, 20) Eci Mose a tangela va Isareli “elivulu liovisila,” ovo va yevelela lutate. (Etundilo 24:3, 7, 8) Kuenje, va kũlĩhĩle ciwa ocikele va kuatele kovaso a Yehova. Cimuamue haico ci kasi oku pita koloneke vilo. Osimbu omunu ka papatisiwile, o sukila oku kuata ukũlĩhĩso wocipango ca Yehova ci sangiwa Vembimbiliya.
4. Nye omunu a sukila oku linga oco a papatisiwe? (Kongelamo atosi a sangiwa pokakasi kemẽla lilo)
4 Yesu wa yonguile okuti, osimbu olondonge viaye ka via papatisiwile, vi kuata ukũlĩhĩso u pamisa ekolelo liavo. Eye ka sapuilile lika olondonge viaye oco vi tavise omanu. Pole, wa vi sapuila oco vi ‘longisevo omanu oku pokola kovina viosi a handeleka.’ (Mateo 7:24, 25; Va Efeso 3:17-19) Omanu vana va yongola oku papatisiwa, pamue va sukila lika oku lilongisa Embimbiliya vokuenda kuolosãi vimue. Vakuavo va sukila oku lilongisa ci soka unyamo umosi ale avali, oco va kuate elomboloko lioku litumbika kuavo ku Yehova. Keteke liepapatiso, ovo va tambulula apulilo avali. Yesu wa popia hati, oku popia kuene ku linge kuocili. ‘Nda oco, oco, nda hacoko, hacoko.’ Omo liaco, tu sukila oku kuata elomboloko liapulilo aco avali epapatiso.—Mateo 5:37.
Oku Likekembela Kuenda Elitumbiko
5. Epulilo liatete liepapatiso, lisitulula ovina vipi vivali vi kuete esilivilo?
5 Epulilo liatete liepapatiso li pula nda omunu wa likekembela akandu aye kuenda wa litumbika ku Yehova oco a linge ocipango caye. Epulilo eli li situlula ovina vivali vi kuete esilivilo omunu a sukila oku linga osimbu handi ka papatisiwile. Ovina viaco vievi: Oku likekembela kuenda oku litumbika.
6, 7. (a) Momo lie omanu vana va yongola oku papatisiwa va sukilila oku likekembela? (b) Apongoloko api omunu a sukila oku linga noke yoku likekembela?
6 Momo lie omunu a sukilila oku likekembela osimbu handi ka papatisiwile? Upostolo Paulu wa popia hati: “Letuvo tua kaile vakuesino eci tua lingaile oloñeyi vietimba.” (Va Efeso 2:3) Osimbu handi ka tua kuatele ukũlĩhĩso wocipango ca Suku, tua enda oku tẽlisa lika oloñei violuali. Satana osuku yoluali, eye wa kala usongui wetu. (2 Va Korindo 4:4) Cilo omo lioku kũlĩha ocipango ca Suku, tua nõlapo okuti, ‘ka tu endaenda vali loloñeyi violuali. Pole, tu linga lika ocipango Caye.’—1 Petulu 4:2.
7 Onjila tua nõla ndeti yoku pokola kolonumbi via Yehova, yi nena asumũlũho alua. Handi vali, yi tu ĩhavo epuluvi lioku kuata ukamba la Yehova. Ukamba waco soma Daviti wa u tukula hati, oku iñila ‘vombalaka ya Suku’ kuenda oku tumala ‘komunda yaye yi kola.’ (Osamo 15:1) Yehova ka laleka olondingaĩvi. Eye, o laleka lika omanu vana okuti ‘omuenyo wavo wa pua eko haivo va lingainga esunga. Kuenda vutima wavo mu tunda olondaka viocili.’ (Osamo 15:2) Osimbu ka tua lilongisile ondaka ya Suku tu ambatele omuenyo umue ka wa sungulukile. Omo liaco, oco tu kapeko Ondaka ya Suku, tu sukila oku linga apongoloko komuenyo wetu. (1 Va Korindo 6:9-11; Va Kolosai 3:5-10) Oku likekembela kuenda onjongole yoku sanjuisa Yehova, ovio vi tu vetiya oku linga apongoloko aco. Noke tu siapo omuenyo woluali okuti, tu amamako oku linga ovina vi sanjuisa Yehova.—Ovilinga 3:19.
8. Ndamupi tu litumbika ku Yehova? Elitumbiko liaco litiamisiwila ndati kepapatiso?
8 Onepa yavali yepulilo liatete liepapatiso, yi pula ava vaka papatisiwa nda va litumbika ku Yehova oco va linge ocipango caye. Elitumbiko li kuete esilivilo komunu o yongola oku papatisiwa. Eye o ci linga vohutililo loku lekisa onjongole yaye ku Yehova yoku litumbika kokuaye vonduko ya Kristu. (Va Roma 14:7, 8; 2 Va Korindo 5:15) Noke, Yehova o linga Cime cetu loku sanjukila oku linga ocipango Caye, ndeci Yesu a linga. (Osamo 40:8; Va Efeso 6:6) Ohuminyo yaco, yi lingiwa lika onjanja yimosi ku Yehova pokolika. Omo okuti, elitumbiko li lingiwa lika pokolika, eteke liepapatiso, lieca uvangi komanu okuti, tua litumbika ku Yehova. Kuenda tua nolapo oku linga ocipango Caye.—Va Roma 10:10.
9, 10. (a) Voku linga ocipango ca Suku mua kongela nye? (b) Asualali voko Alemanya va limbuka ndati oku litumbika kuetu ku Yehova?
9 Nye ca kongeliwa voku kuama ongangu ya Yesu yoku linga ocipango ca Suku? Yesu wa sapuila olondonge viaye hati: ‘Nda umue o yongola oku ñuama, kaka litende vali eye muẽle. A tikule uti waye kuenje a ñuame.’ (Mateo 16:24) Vocinimbu eci Cembimbiliya, Yesu wa tukula ovina vitatu tu sukila oku linga. Catete, tu sukila oku yuvula ‘oku litenda etu muẽle.’ Ondaka eyi yi lomboloka oku yuvula oloñei vi tuala kekandu okuti, tu kuama lika elungulo liondaka ya Suku lolonumbi viaye. Cavali, tu tikula uti wetu. Koloneke via Yesu, uti, wa kala ocindekaise coku kutisiwa osõi kuenda oku talisiwa ohali. Etu Tuakristão tu tava okuti olonjanja vimue tu tala ohali omo lioku kunda olondaka viwa. (2 Timoteo 1:8) Citava okuti tu pembuiwa loluali ndeci Yesu a kutisiwa osõi. Pole, tu sanjuka calua poku kũlĩha okuti, tu kasi oku linga ocipango ca Yehova. (Va Heveru 12:2) Kuenje, tu kuama lika Yesu.—Osamo 73:26; 119:44; 145:2.
10 Ovanyali vamue va siatavo oku limbuka okuti, Olombangi via Yehova, via nolapo lika oku vumba Yehova. Kocitumãlo cimue ci tukuiwa hati Buchenwald ko Alemanya, kuna omanu va talisiwila ohali, Olombangi via Yehova vina via likala oku nyõla ekolelo liavo, via sukilile oku soneha olonduko viavo vukanda umue. Vukanda waco muli ohuminyo ya popia hati: ‘Ame toke cilo, nda likuminya oku amamako oku kala Ombangi ya Yehova. Lalimue eteke ndi nyõla ohuminyo nda linga la Yehova.’ Omanu vosi va litumbika ku Yehova, va siata oku kuama ocituwa cimuamue.—Ovilinga 5:32.
Lilekisa Okuti Umbangi ya Yehova
11. Omunu wa papatisiwa o tambula asumũlũho api?
11 Epulilo liavali liepapatiso, li pula omunu oka papatisiwa nda o kuete elomboloko liepapatiso liaco. Momo epapatiso li lomboloka oku linga Ombangi ya Yehova. Noke yepapatiso, eye o linga ondingupange yambata onduko ya Yehova. Oku ambata onduko yaco, ci nena asumũlũho alua kuenda ci tu ĩha ocikele cinene. Handi vali, cecelela okuti, omunu wa papatisiwa o kuata elavoko lieyovo ka li pui nda wamamako oku lekisa ekolelo ku Yehova.—Mateo 24:13.
12. Ocikele cipi ca kongela voku ambata onduko ya Yehova?
12 Oku ambata onduko ya Yehova, esumũlũho limue lia velapo. Uprofeto Mika wa popia hati: “Olofeka viosi viendela, ofeka vonduko ya suku yayo, ofeka vonduko ya suku yayo, etu puãi tu endela ño hũ, oloneke ka vi pui, vonduko ya Yehova Suku yetu.” (Mika 4:5) Esumũlũho liaco li tu ĩha ocikele kovaso a Yehova. Omo liaco, tu sukila oku kuata ovituwa vieca esumbilo konduko yaco. Paulu wa ivaluisa Akristão ko Roma, hati, nda umue ka lingi eci a kasi oku kunda, onduko ya Suku yi “tombiwa” kuenda ka yi sumbiwa.—Va Roma 2:21-24.
13. Momo lie omanu va litumbika ku Yehova va kuetele ocikele coku eca uvangi watiamẽla kokuaye?
13 Eci omunu a linga Ombangi ya Yehova, o kuata ocikele coku kundila omanu catiamẽla ku Yehova. Eye wa lalekele va Isareli oco va linge olombangi viaye, vieca uvangi wunene Waye ka u pui. (Isaya 43:10-12, 21) Pole, ovo ka va tẽlisile ocikele caco. Kuenje Yehova wa va yanduluka. Koloneke vilo, Akristão vocili va sanjukila esumũlũho liavo lioku eca uvangi watiamẽla ku Yehova. Etu tu eca uvangi waco, omo liocisola tu u kuetele kuenda onjongole yoku sivaya onduko yaye. Omo lioku kũlĩha ocili catiamẽla ku Yehova kuenda kocipango caye, ka tu liwekapo oku sapula ovina viaco kuvakuetu. Etu, tu kuama ongangu yupostolo Paulu wa popia hati: ‘Ca ñundikiwa. Ngongo yange nda si kundi ondaka yiwa.’—1 Va Korindo 9:16.
14, 15. (a) Ocisoko ca Yehova ci tu kuatisa ndati oku amamako kespiritu? (b) Aliangiliyo api Yehova a siata oku sokiya oco a tu kuatise kespiritu?
14 Epulilo liavali liepapatiso livaluisa ava vaka papatisiwa ocikele vakuete coku pokola kolonumbi viocisoko ca Yehova. Etu ka tu kasi lika lietu koku vumba Yehova. Momo tu kuete ekuatiso lia vamanji voluali luosi. (1 Petulu 2:17; 1 Va Korindo 12:12, 13) Ocisoko ca Yehova ci kuete ocikele coku tu kuatisa oco tu amameko kespiritu. Oco ca siata oku angiliya alivulu a tu kuatisa oku amamako kukũlĩhĩso Wondaka ya Suku. Kuenda ca siatavo oku tu kuatisa eci tu liyaka lovitangi, loku pamisa ukamba wetu la Yehova. Ndeci onjali yi sakalala loku tekula ciwa omõla, “ukuenje wa lunguka,” wa siatavo oku angiliya okulia kuespiritu oco tu pamise ekolelo lietu.—Mateo 24:45-47; 1 Va Tesalonike 2:7, 8.
15 Kolohongele, tua siatavo oku tambula epindiso tu sukila oco tu amameko oku vumba Yehova. (Va Heveru 10:24, 25) Osikola Yupange Wakristão, yi tu longisa ndomo tu vangula lomanu. Ohongele Yupange, yi tu longisa uloño woku kundila omanu esapulo liusoma. Olohongele viaco, lelilongiso lio pokolika kuenda alivulu a lombolola olonumbi Viembimbiliya, vi tu kuatisa oku limbuka ndomo Yehova a kasi oku songuila ocisoko caye lespiritu sandu. Yehova vonduko yaliangiliyo aco, o tu kuatisa oku limbuka ovina vi tu yapula vekolelo. Kuenda o tu pindisa oco tu kale omanu va loñoloha koku kunda. Handi vali, o tu kuatisavo oco tuamameko oku lavulula konepa yespiritu.—Osamo 19:7, 8, 11; 1 Va Tesalonike 5:6, 11; 1 Timoteo 4:13.
Ceci ci tu Vetiya Oku Papatisiwa
16. Nye ci tu vetiya oku litumbika ku Yehova?
16 Apulilo avali epapatiso, a ivaluisa omanu vaka papatisiwa oco va kuate elomboloko liepapatiso kuenda ovikele viyililako. Nye ci va vetiya oku papatisiwa? Lomue wa tu sindiliya oku papatisiwa. Pole, Yehova eye wa tu kokela kokuaye. (Yoano 6:44) Omo okuti Suku ‘ocisola’ eye o viala oluali locisola. (1 Yoano 4:8) Etu tua linga akamba va Yehova omo okuti wa siata oku tu tata lovituwa viwa. Yehova wa tu ĩha Omõlaye wongunga oco tu kuate elavoko liomuenyo ko pui. (Yoano 3:16) Ovituwa viaye, vi tu vetiya oku tumbika omuenyo wetu kokuaye.—Olosapo 3:9; 2 Va Korindo 5:14, 15.
17. Kulie tua litumbika?
17 Etu ka tua litumbikile kupange umue womunu. Pole tua litumbika ku Yehova. Upange Yehova a eca komanu vaye, ci tava okuti u pongoloka. Pole, elitumbiko lietu ka li pongoloka. Upange Yehova a ecele ku Avirahama wa litepele lowu a ecele ku Yeremiya. (Efetikilo 13:17, 18; Yeremiya 1:6, 7) Pole, vosi yavo va tẽlisa ocikele va tambuile ku Yehova omo liocisola vo kuatela kuenda onjongole yoku linga ocipango caye. Koloneke vilo via sulako, omanu va Yehova, va siata oku likolisilako oku pokola kocikundi ca Yesu coku kunda olondaka viwa kuenda oku longisa omanu oco va linge olondonge. (Mateo 24:14; 28:19, 20) Oku linga upange waco lutima wetu wosi, ceca uvangi wocisola tu kuetele Yehova. Kuenda uvangi woku lekisa okuti, tua litumbika Kokuaye.—1 Yoano 5:3.
18, 19. (a) Uvangi upi tu eca kovaso yomanu keteke liepapatiso? (b) Nye tuka lilongisa vocipama cikuãimo?
18 Epapatiso li yulula onjila yoku tambula ovikele vi nena esanju. Pole, osimbu ka tua papatisiwile, tu sukila oku sokolola catiamẽla kondaka yaco. (Luka 14:26-33) Epapatiso lieca uvangi wokuti, tua nõlapo oku pitisa kovaso upange wa Yehova. (Luka 9:62) Eci tu papatisiwa tu situlula ohuminyo yetu kowiñi ndoco: “Suku eye Suku yetu oloneke vienda ño hũ. Eye o linga usongui wetu otembo ka yi pui.”—Osamo 48:14.
19 Vocipama cikuãimo, tuka konomuisa apulilo akuavo atiamẽla koku papatisiwa vovava. Kuli hẽ cimue ci tateka omunu oku papatisiwa? Omunu o sesamẽla oku papatisiwa lanyamo añami? Nye tu sukila oku linga oco tu lekise ovituwa viwa keteke liepapatiso?
O Tẽla Oku Lombolola Eci Tua Lilongisa?
• Momo lie Ukristão a sukilila oku likekembela osimbu ka papatisiwile?
• Nye ca kongela vepapatiso?
• Ocikele cipi ci tunda koku ambata onduko ya Yehova?
• Nye ci tu vetiya oku papatisiwa?
[Okakasia Lelitalatu kemẽla 20]
Apulilo Avali Epapatiso
Vonduko yocilumba ca Yesu Kristu, wa likekembela hẽ akandu ove kuenda wa litumbika ku Yehova oco o linge ocipango Caye?
Ove hẽ o kuete elomboloko liokuti oku litumbika kuove kuenda epapatiso liove, li lekisa okuti Umbangi ya Yehova, kuenda wa nõlapo oku tiamẽla kocisoko Caye cina ci kasi oku songuiwa lespiritu sandu?
[Elitalatu kemẽla 21]
Elitumbiko, li lomboloka ohuminyo omunu a linga ku Yehova vohutililo
[Elitalatu kemẽla 23]
Upange woku kunda, weca uvangi welitumbiko lietu ku Suku