Tu Vu Yoleli Omo Wa Nõli Onjila Ya Velapo Yomuenyo!
“Nda tu kasi lomuenyo, tu u muila ku Yehova, nda tu fa, tu fila ku Yehova.”—VA ROM. 14:8, NW.
1. Yesu wa longisa nye catiamẽla konjila ya velapo yomuenyo?
YEHOVA o yongola okuti tu endela vonjila ya velapo yomuenyo. Omanu va pondola oku endela volonjila vialua, pole kuli lika onjila yimosi ya velapo. Ka kuli ocina ca velapo nda haku kapako Ondaka ya Suku loku lilongisila Komõlaye, Yesu Kristu. Yesu wa longisa oloñame viaye oku fendela Suku lespiritu locili kuenda wa va ĩha ocikundi coku longisa omanu oco va linge olondonge. (Mat. 28:19, 20; Yoa. 4:24) Oku kapako alongiso a Yesu ci sanjuisa Yehova kuenda ci nena asumũlũho.
2. Kocita catete omanu va tambulula ndati esapulo Liusoma, kuenda nye ci lomboloka ondaka “Vakuanjila”?
2 “Vana va yongola oku kuata omuenyo ko pui,” eci va tava kuenje va papatisiwa, tu va sapuila lesanju lialua tuti, “Tu vu yoleli omo wa nõli onjila ya velapo yomuenyo!” (Ovil. 13:48, NW) Kocita catete, omanu valua vo kolofeka viñi viñi, va tava kocili kuenda va lekisa kowiñi elitumbiko liavo ku Suku poku papatisiwa. (Ovil. 2:41) Olondonge viatete, via tukuiwile hati “Vakuanjila.” (Ovil. 9:2; 19:23) Ondaka yaco ya sunguluka, momo vosi va linga olondonge via Kristu, va tiamisilile omuenyo wavo koku kolela Yesu Kristu kuenda oku kuama ongangu yaye.—1 Pet. 2:21.
3. Momo lie omanu va Yehova va papatisiwila, kuenda omanu vañami va papatisiwa vokuenda kuanyamo ekũi a sulako?
3 Koloneke vilo via sulako upange woku longisa omanu oco va linge olondonge, wa li vokiya calua kuenda u kasi oku lingiwila kueci ci pitãhala 230 kolofeka. Vokuenda kuanyamo ekũi konyima, ci soka 2.700.000, komanu va nõla oku vumba Yehova kuenda va papatisiwa ndocindekaise celitumbiko liavo. Eci ci lomboloka okuti osemana losemana ku papatisiwa eci ci pitãhala 5.000 komanu! Omunu o nõla oku papatisiwa omo liocisola a kuetele Suku, ukũlĩhiso Wovisonehua, kuenda oku kolela ovina a lilongisa. Epapatiso ocina ca velapo vomuenyo wetu, momo olio efetikilo lioku kuata ukamba la Yehova. Handi vali, epapatiso ocindekaise cekolelo liokuti Suku o ka tu kuatisa oku u vumba lepandi ndeci a kuatisa afendeli vaye kosimbu oku endela volonjila viaye.—Isa. 30:21.
Momo Lie Epapatiso li Kuetele Esilivilo?
4, 5. Tukula asumũlũho amue eyilila koku papatisiwa.
4 Omo ove o kuete ukũlĩhiso wa Suku, pamue wa linga ale apongoloko komuenyo wove, kuenje wa linga ukundi ka papatisiwile. Apongoloko aco a pandiyiwa. Pole, momo lie ku litumbikila ku Suku vohutililo oco o papatisiwe? Poku lilongisa Embimbiliya, wa limbuka okuti o sukila oku linga ovina vi sanjuisa Yehova, okuti oku litumbika ño kesanju liove muẽle loku sandiliya ovokuasi hacoko. (Tanga Osamo 148:11-13; Luka 12:15) Oco hẽ, asumũlũho api eyilila koku papatisiwa?
5 Omo ove Wukristão umue wa papatisiwa, omuenyo wove u kuete ocimãho ca velapo. O kuete esanju omo o kasi oku linga ocipango ca Suku. (Va Rom. 12:1, 2) Espiritu sandu lia Yehova, li ka ku kuatisa oku kuata ovituwa viwa, ndeci, ombembua kuenda ekolelo. (Va Gal. 5:22, 23) Suku o ka tambulula olohutililo viove kuenda o ka sumũlũisa epandi liove lioku ambata omuenyo u litava Londaka yaye. O ka sanjukila oku linga upange woku kunda kuenda o ka limbuka okuti oku ambata omuenyo u sanjuisa Suku ci pamisa elavoko liove liomuenyo ko pui. Oku litumbika loku papatisiwa, ocindekaise cokuti o yongola oku linga Ombangi ya Yehova.—Isa. 43:10-12.
6. Eci tu papatisiwa tu ka kũlĩhiwa ndati?
6 Eci tu litumbika ku Suku kuenda tu papatisiwa, tu kũlĩhiwa okuti tua tiamẽla ku Yehova. Upostolo Paulu wa soneha hati: “Lomue kokuetu o likasilili, lomue o lifila. Momo nda tu kasi lomuenyo, tu u muila ku Yehova, nda tu fa, tu fila ku Yehova. Oco, ndaño tu kasi lomuenyo, ndaño tu fa, lopo tuvamãle va Yehova.” (Va Rom. 14:7, 8, NW) Suku wa tu kapako omo wa tu ĩha elianjo lioku nõla. Nda tu kakatela oku endela vonjila yomuenyo omo lioku sola Suku, tu ka sanjuisa utima waye. (Olosap. 27:11) Epapatiso ocindekaise celitumbiko lietu ku Suku poku lekisa okuti Yehova eye Ombiali yetu. Ocindekaisevo cokuti tua tiamẽla kokuaye loku teyuila uviali waye. (Ovil. 5:29, 32) Yehova o kasi konele yetu. (Tanga Osamo 118:6.) Epapatiso li tu ĩha epuluvi lioku tambula asumũlũho alua kespiritu cilo muẽle kuenda kotembo yi laika oku iya.
Esumũlũho Lioku Kala Vongongela ya Vamanji
7-9. (a) Ohuminyo yipi Yesu a eca ku vana va siapo ovina viayo omo lioku u kuama? (b) Ohuminyo ya Yesu, yi sangiwa kelivulu lia Marko 10:29, 30, yi kasi oku tẽlisiwa ndati koloneke vilo?
7 Uposto Petulu wa sapuila Yesu hati: “Tala, tua sia ovina viosi ha tu ku kuama, oco hẽ, tu mola nye?” (Mat. 19:27) Petulu wa yonguile oku kũlĩha onima eye kumue lolondonge vikuavo via Yesu va laikele oku tambula kovaso yoloneke. Ovo va liecele olumue koku linga upange woku kunda Usoma. (Mat. 4:18-22) Yesu wa likuminya oku eca nye kokuavo?
8 Ndomo ca lekisiwa kulandu ukuavo wa sonehiwa la Marko, Yesu wa likuminyile okuti olondonge viaye vi linga onepa vongongela ya vamanji kespiritu. Eye wa popia hati: “Ka kuli u o sia onjo, pamue vamanjaye, pamue vamukãi vaye, pamue inaye pamue isiaye, pamue omãla, pamue ovapia, okuti o vi sia mekonda liange kuenda mekonda liondaka yiwa, yu ka moli cilo eci ca soka locita colonjanja, ci kale olonjo pamue vamanjaye, ci kale vamukãi vaye, la vainaye, lomãla pamue ovapia. Komuenyo ulo o vi mola kumue lakangiso, kuenje komuenyo wiyako o mola omuenyo ko pui.” (Mar. 10:29, 30) Akristão vo kocita catete, ndeci Ludia, Akuila, Prisila la Gaio, va ecele “olonjo” kuenda veya oku kala vongongela ya ‘vamanji alume lakãi,’ ndeci Yesu a va likuminyile kolondonge viaye.—Ovil. 16:14, 15; 18:2-4; 3 Yoa. 1, 5-8.
9 Eci Yesu a popele, ci kasi oku tẽlisiwavo koloneke vilo. “Ovapia” ovitumãlo vina olondonge viaye ndeci, olomisionaliu, vakuepata lio ko Betele lolondingupange vio kolofeka viñi viñi va kasi oku lingila upange Wusoma, okuti va sia ovina viavo konyima. Vamanji valua, alume lakãi vana va siapo olonjo viavo va siata oku yeva esanju li tunda koku leluisa omuenyo kuenda va limbuka ndomo Yehova a va tata omo lioku litumbika kupange waye. (Ovil. 20:35) Afendeli vosi va Yehova okuti va papatisiwa va pondola oku kuata asumũlũho a tunda koku ‘sandiliya tete usoma wa Suku lesunga liaye’ omo va panga onepa kogongela ya vamanji Akristão koluali luosi.—Mat. 6:33.
Tilila “Vociwundilo ca Fũ”
10, 11. Nye ci lomboloka “ocivundilo ca Fũ,” kuenda tu pondola oku kalamo ndati?
10 Elitumbiko lepapatiso li nenavo esumũlũho likuavo okuti, oku tunga “vociwundilo ca Fũ.” (Tanga Osamo 91:1.) Ocivundilo, ocitumãlo cimue cocindekaise haico ca koka, muna tu teyuilua kovina vi kapa kohele ekalo lietu kespiritu. “Ocivundilo,” caco, ka ca kũlĩhiwile lomanu vana va kuete upeke wespiritu haivo ka va kolelele Suku. Poku ambata omuenyo u litava lelitumbiko lietu loku kolela Yehova, tu pondola oku popia tuti: “[Yehova] eye ocikolo cange, haeye ombonge yange. Eye Suku yange, ndu kolela.” (Osa. 91:2) Yehova Suku, o linga ocitililo cetu. (Osa. 91:9) Anga hẽ kuli vali ocitumãlo cikuavo ca lisoka laco?
11 Omunu o tunga “vocivundilo” ca Yehova, o tambulavo esumũlũho lioku kuata ukamba uwa laye. Ukamba waco u fetikila kelitumbiko kuenda kepapatiso. Noke tu pamisa ukamba wetu la Suku poku lilongisa Embimbiliya pokolika, poku lingainga olohutililo, loku pokola kokuaye. (Tia. 4:8) Yesu eye wa velapo koku linga ukamba la Yehova, kuenda eye ka liwekelepo oku kolela Ululiki una okuti lalimue eteke a lueya. (Yoa. 8:29) Omo liaco, ka tu ka kuati atatahãi konjongole ya Yehova yoku tu kuatisa oku tẽlisa ohuminyo yelitumbiko tua linga. (Uku. 5:4) Ovina viespiritu Suku a pongiyila omanu vaye, vi lekisa ocisola a tu kuetele kuenda o yongola okuti tu U vumba.
Tua Sanjukila Ekalo Lietu Kespiritu
12, 13. (a) Ekalo liwa kespiritu li lomboloka nye? (b) Nye ci tu ĩha uloño woku kuatisa omanu vana va fetika ndopo oku likongela letu?
12 Elitumbiko lepapatiso li yululavo onjila yoku kuata ekalo liwa kespiritu. Ekalo liaco olio lika li kuatisa Akristão oku kuata ombembua la Yehova Suku kuenda omanu vakuavo. (Osa. 29:11; Isa. 54:13) Voluali ka muli ocitumãlo ci sokisiwa lekalo tu kuete kespiritu. Ekalo liaco lia siata oku muiwa kolohongele vinene kuna ku liongoluila vamanji va tunda kolofeka viñi viñi, vakualimi aiñi aiñi, lapata osi, haivo va likuetele ocisola, va kala lombembua kuenda omunga.
13 Ekalo lietu kespiritu lia litepa calua lekalo lioluali koloneke vilo. (Tanga Isaya 65:13, 14.) Poku kunda esapulo Liusoma, tu kuata esumũlũho lioku laleka omanu oku iñila vocitumãlo mu sangiwa ombembua yespiritu. Oku kuatisa vana va likongela letu ndopo vekongelo oco va pindisiwe kupange woku kunda, esumũlũho linene. Lekuatiso liakulu vekongelo pamue tu kuata esumũlũho lioku kuatisa omanu vamue, ndeci Akuila la Prisila va kuatisa Apolosi, “kuenje vo wimba onumbi ya velapo yonjila ya Suku.”—Ovil. 18:24-26.
Lilongisila ku Yesu
14, 15. Momo lie tu sukilila oku lilongisila ku Yesu?
14 Tu kuete esunga lioku amamako oku lilongisila ku Yesu. Eci handi Yesu keyile palo posi, wa talavaya kumue la Isiaye vokuenda kuolohuluwa violohulua kanyamo. (Olosap. 8:22, 30) Eye wa kũlĩhile okuti, eci ca velapo vali komuenyo, oku vumba Suku loku imbila ocili uvangi. (Yoa. 18:37) Nda Yesu wa lingile ovina vikuavo, nda ca lekisa okuti wa kuata ocipululu. Eye wa kũlĩhile okuti wa laikele oku pita voloseteko vialua toke kolofa. (Mat. 20:18, 19; Va Hev. 4:15) Omo liaco, wa tu sila Ongangu yiwa yoku kakatela kesunga.
15 Pana okuti Yesu wa papatisiwa, Satana wa seteka oku u tindula vonjila ya velapo yomuenyo, pole ka kuatele onima yiwa. (Mat. 4:1-11) Eci ci lekisa okuti Satana ndaño o seteka oku linga eci loco oco a tu yapuise, etu tu pondola oku kakatela kesunga. Eye o seteka oku yapuisa ca piãla vana va kuete onjongole yoku papatisiwa kuenda ava va papatisiwa ndopo. (1 Pet. 5:8) Elambalalo li pondola oku tunda ku vangandietu vana okuti ka va kũlĩhile ciwa Olombangi via Yehova. Pole, asipato a tu ĩha epuluvi lioku lekisa ovituwa viwa Viakristão ndeci, esumbilo kuenda utate woku vangula eci tu pulisiwa pamue poku eca uvangi. (1 Pet. 3:15) Eci ci pondola oku vetiya vana va tu yevelela.—1 Tim. 4:16.
Amamako Oku Endela Vonjila ya Velapo Yomuenyo!
16, 17. (a) Ovina vipi vitatu vi sukiliwa komuenyo via tukuiwa kelivulu Liesinumuĩlo 30:19, 20? (b) Yesu, Yoano kuenda Paulu va lekisa ndati esilivilo liolondaka via sonehiwa la Mose?
16 Eci kua kambele 1.500 kanyamo koku iya kua Yesu palo posi, Mose wa sapuila va Isareli oco va nõle onjila ya velapo yomuenyo. Eye wa popia hati: “Etaili mbilikiya ilu losi okuti vi linga olombangi vioku ku pisa omo nda ku kapela omuenyo lokufa kuenda esumũlũho lesiñalo. Oco, nõla omuenyo, okuti ove lombuto yove vu kala lomuenyo, kuenje vu sola Yehova, Suku yove, loku pokola kondaka yaye loku likakatela laye.” (Esin. 30:19, 20) Omo va Isareli ka va kolelele Suku, ovina vitatu Mose a tukula ka via kuatele esilivilo kokuavo. Yesu kuenda olondonge viaye va tukulavo olondaka viaco.
17 Catete, ‘tu sukila oku sola Yehova Suku yetu.’ Tu lekisa okuti tu sole Suku eci tu kapako olonumbi viaye vomuenyo wetu. (Mat. 22:37) Cavali, ‘tu sukila oku yevelela ondaka ya Yehova’ poku lilongisa Embimbiliya loku pokola kolonumbi Viaye. (1 Yoa. 5:3) Eci ci tu vetiya oku endaenda kolohongele Viakristão kuna ku eciwa alomboluilo Embimbiliya. (Va Hev. 10:23-25) Catatu, ‘tu sukila oku kakatela ku Yehova.’ Omo liovitangi vi laika oku pita kovaso, tu sukila oku pamisa ekolelo lietu ku Suku kuenda oku kuama Omõlaye.—2 Va Kor. 4:16-18.
18. (a) Nye ca lombolola Utala Wondavululi wo 1914, catiamẽla kocili? (b) Koloneke vilo, oku endela vocinyi ci tu vetiya oku linga nye?
18 Oku ambata omuenyo umue u litava locili Cembimbiliya esumũlũho linene! Kunyamo wo 1914, Utala Wondavululi wa sandeka ocipama cimue ca popia ndoco: “Etu hẽ ka tu kuete esanju lasumũlũho? Suku yetu hokuaciliko hẽ-e? Nda omunu wa kũlĩha okuti ocina cimue ca velapo, o sandiliya oku kuata ocina caco. Kuenje eci a ci sanga, o ka tu sapuilako. Ocina ca velapo etu tua sanga, oku kũlĩha Ondaka ya Suku. . . . Lomue o tẽla oku lombolola ndaño oku soneha ombembua, esanju lasumũlũho a tu nenela ukũlĩhiso wa Suku yocili. Oku kũlĩha Olondunge, Esunga, Unene Locisola Caye, via tẽlisa onjongole yutima wetu. Ka tu sukila vali oku sandiliya ovina vikuavo. Ka kuli eci ca velapo okuti oku kuata Ukũlĩhiso waco ci sule.” (Utala Wondavululi, 15 ya Cembanima wo 1914, kamẽla 377-378, kelimi Liongelesi.) Lacimue ci tu tateka oku eca olopandu omo lioku tambula ocinyi cespiritu locili cina ka ci pongoloka. Etu tua sanjuka omo kaliye tu kasi oku ‘endela vocinyi ca Yehova.’—Isa. 2:5; Osa. 43:3; Olosap. 4:18.
19. Momo lie ava va yongola oku papatisiwa ka va sukila oku susõha?
19 Nda o yongola oku ‘endela vocinyi ca Yehova’ pole kua litumbikile handi loku papatisiwa, ku ka susõhe. Oku kapako olonumbi Viembimbiliya via tiamẽla kepapatiso—oyo lika onjila yoku lekisa olopandu kovina Suku la Kristu va tu lingila. Eca ku Yehova eci ca velapo okuti, omuenyo wove. Lekisa okuti o yongola oku linga ocipango ca Suku, poku kuama Omõlaye. (2 Va Kor. 5:14, 15) Etu, ka tu kuete atatahãi vokuti, eyi oyo onjila ya velapo komuenyo!
O Tambulula Ndati?
• Epapatiso lietu ocindekaise ce?
• Oku litumbika ku Suku loku papatisiwa ci nena asumũlũho api?
• Momo lie oku lilongisila ku Yesu ci kuetele esilivilo?
• Nye ci tu kuatisa oku kakatela konjila ya velapo yomuenyo?
[Elitalatu kemẽla 25]
Epapatiso liove ocindekaise cokuti wa nõla eci ca velapo komuenyo
[Elitalatu kemẽla 26]
Ove wa tunga hẽ “vocivundilo” ca koka?