O Tenda hẽ Yehova Nda Isiove?

“A ÑALA, tu longise oku likutilila.” Eci olondonge via linga epingilo eli ku Yesu, eye wa va tambulula hati: “Eci vu likutilila lingi hoti, A Tate, onduko yove yi sumbiwe.” (Luka 11:​1, 2) Yesu ka tukuile Yehova lolonduko viekemãlo ndeci, “Ukuonenewosi,” “Ulongisi wa Velapo,” “Usovoli” “Ukuasimbu,” “Soma yonahũlũlua.” (Efet. 49:25; Isa. 30:20 NW; 40:28; Dan. 7:9; 1 Tim. 1:​17) Pole, Yesu wo tukula londuko ya “Tate.” Momo lie? Momo pamue wa yonguile okuti tu kuata ukamba Lomunu wa velapo voluali ndeci omõla a linga la isiaye.

Omanu vamue ca va tilila oku tukula Suku nda Isiavo. Ukãi umue Ukristão o tukuiwa hati, Atsukoa wa popia ndoco: “Vokuenda kuanyamo alua noke yepapatiso liange, ca ndi tatamele calua oku amela ku Yehova loku likutilila kokuaye nda Isia yange.” Eye wa lombolola esunga liaco poku amisako hati, “Tate wa ndi cita ka la lekisa ocikembe kokuange.”

Koloneke vilo via sulako haivio vio hali, olonjali vimue ‘ka vi kuete ocikembe.’ (2 Tim. 3:​1, 3) Omanu valua va siatavo oku kuata ovisimĩlo ndevi via Atsuko. Ci tu sanjuisa calua oku tenda Yehova nda Isietu ukuacisola.

Yehova Ukuakuecaeca Locisola

Nda tu yongola oku tenda Yehova nda Isietu, tu sukila oku u kũlĩha ciwa. Yesu wa popia hati: “Lomue wa kũlĩha Omõla te Isia, haico lomue wa kũlĩha Isia te Omõla, kuenda undeti Omõlaco a panga oku u situluila Isia.” (Mat. 11:​27) Onjila yi tu kuatisa oku limbuka okuti Yehova Isietu, oku sokolola ovina Yesu a situlula via tiamẽla ku Suku yocili. Ovina vipi Yesu a situlula via tiamẽla ku Isia?

Yesu omo wa kũlĩhile okuti Yehova eye Ono yomuenyo waye, wa popia hati: “Ndi muila omuenyo ku Isia.” (Yoa. 6:​57) Letuvo tu kuete omuenyo omo lia Isia. (Osa. 36:9; Ovil. 17:​28) Nye ca vetiya Yehova oku eca omuenyo koviluvo viaye? Hacisolako hẽ co vetiya? Omo liombanjaile yaco, tu sukila oku lekisa ocisola ku Isietu wo kilu.

Ocisola cinene Suku a lekisa komanu, esokiyo lioku tuma Yesu oco a ece omuenyo waye ndocisembi. Elinga liaco, lia ecelela okuti omanu vakuakandu va kuata ukamba la Yehova vonduko Yomõlaye. (Va Rom. 5:12; 1 Yoa. 4:​9, 10) Omo okuti Isietu wo kilu Ukuakutẽlisa olohuminyo viaye, tu pondola oku kolela okuti vosi vo sole kuenda va pokola kokuaye, va ka kuata esumũlũho lioku mola “eyovo liulamba womãla va Suku.”​—⁠Va Rom. 8:⁠21.

Eteke leteke, Isietu wo kilu o “tundasaila ekumbi liaye” kokuetu. (Mat. 5:​45) Ka tu sukila oku likutilila oco ekumbi li tunde. Tu sukila oku eca olopandu kuenda oku sanjukila owuya wekumbi! Ocili okuti Isietu, Ukuakueca ovina tu sukila osimbu handi ka tuo vi pingile. Anga hẽ tua siata oku limbuka loku lekisa olopandu ku Isietu wo kilu ndomo a tata oviluvo viaye?​—⁠Mat. 6:​8, 26.

Isietu “Ukuakuteyuila”

Ocitumasuku ca Isaya ca ecele elembeleko komanu va Suku kosimbu hati: “Ndaño olomunda vi upiwa kuenda ovikandulukua vi senguluka, haimo ocisola cange ka ci pongoloka ka ci ku tundi, ndaño ocisila cange combembua ka cupiwa. Oco ca popia Yehova ukuakuteyuila.” (Isa. 54:​10, A Bíblia em Inglês Vivo) Eci Yesu a likutilila kuteke wa sulako womuenyo waye palo posi wa lekisa okuti Yehova “ukuakuteyuila.” Yesu wa likutililako olondonge viaye ndoco: “Ovo puãi, va kasi voluali, kuenje ame njiya kokuove. A Tate o kola, va lavela vonduko yove.” (Yoa. 17:​11, 14) Yehova wa siata oku teyuila kuenda oku lava olondonge via Yesu.

Suku wa siata oku tu teyuila katutu a Satana poku tu iha okulia kuespiritu vonduko “[y]ukuenje wa kolelua haeye wa lunguka.” (Mat. 24:​45) Oku litekula lokulia kuaco ci kuete esilivilo, momo ku tu kuatisa oku limaleha ‘lovimaleho viosi via Suku.’ Tu Kũlĩhĩsi ño ndomo “ociyepelo cekolelo,” ci tu kuatisa oku “ima isongo viosi viondalu viukuevĩho.” (Va Efe. 6:​11, 16) Oku kuata ekolelo ci tu teyuila kovina vi kapa kohele ekalo lietu kespiritu kuenda ceca uvangi wokuti Isietu o kuete unene woku tu teyuila.

Tu pondola oku lilongisa ovina vialua via tiamẽla kocikembe ca Isietu wo kilu, poku konomuisa ovituwa Omõla a Suku a lekisa eci a kala palo posi. Kũlĩhisa ulandu u sangiwa kelivulu lia Marko 10:​13-16. Vulandu waco Yesu wa sapuila olondonge viaye hati: “Omãla veye ño kokuange.” Pana okuti omãla veya kokuaye Yesu wa va angata locisola kuenje wa va sumũlũisa. Hesanjukuolio va kuata! Tu ci okuti Suku yocili o yongola okuti tu amẽla kokuaye, momo Yesu wa popia hati: “U wa mola ame haeye wa mola Isia.”​—⁠Yoa. 14:⁠9.

Yehova Suku eye Ono yocisola ka ci pui. Eye Ukuacali ca piãla, haeye Ukuakuteyuila kuenda o yongola okuti tu amẽla kokuaye. (Tia. 4:⁠8) Ocili okuti, Yehova eye Isia wa velapo kuenda ka kuli u wa lisoka laye!

O tu Kuatisa Calua!

Nda tu kolela Yehova, Isietu ukuacikembe, tu kuatisiwa calua. (Olosap. 3:​5, 6) Yesu wa kuatisiwa calua omo wa kolelele Isiaye lutima waye wosi. Kristu wa sapuila olondonge viaye hati: “Si kasi lika wange, momo Ise wa numa o kasi lame.” (Yoa. 8:​16, NW) Olonjanja viosi Yesu wa kolelele okuti Yehova o ko kuatisa. Eci a papatisiwa, wa yeva olondaka vimue viocisola ku Isiaye viokuti: “U, Eye Omõlange wa soliwa, ndo sanjukila.” (Mat. 3:​15-​17) Osimbu handi ka file, Yesu wa vilikiya hati: “A Tate, ñundika omuenyo wange povaka ove.” (Luka 23:​46) Yesu otembo yosi wa amamako oku kolela Isiaye.

Etu, tu sukilavo oku kuata ekolelo lia pama. Omo okuti Yehova o kasi konẽle yetu, kuli hẽ cimue ci tu yokokisa? (Osa. 118:⁠6) Atsuko tua tukula ale, wa kolelele kongusu yaye muẽle poku liyaka lovitangi. Pole pana okuti wa fetika oku lilongisa ovina via tiamẽla komuenyo wa Yesu kuenda kupange waye, wa fetika oku pamisa ukamba waye la Isietu wo kilu. Onima yipi yeyililako? Atsuko wa popia hati: “Ame nda lilongisa eci ci lomboloka oku kuata Isia kuenda oku kolela kokuaye.” Eye wa amisako vali hati: “Ñuete ombembua kuenda esanju. Si kuete esunga lioku yokokela vali cimue.”

Tua siata oku kuatisiwa ndati poku tenda Yehova nda Isietu? Olonjanja vialua omãla vana va sole olonjali viavo va yongola oku vi sanjuisa. Omõla wa Suku, olonjanja viosi ‘wa lingainga lika ovina vi sanjuisa Isiaye.’ (Yoa. 8:​29) Cimuamue haico, oku kuatela ocisola Isietu wo kilu, ci tu vetiya oku linga ovina vi eca ‘esivayo’ kokuaye.​—⁠Mat. 11:25; Yoa. 5:⁠19.

Isietu o tu “Kuata Peka Liondio”

Isietu wo kilu wa tu ĩhavo “oñuatisi,” okuti espiritu sandu liaye. Yesu wa popia hati, olio, liu “songuili kocili cosi.” (Yoa. 14:​15-17; 16:​12, 13) Espiritu sandu lia Suku li pondola oku tu ĩha elomboloko lia suapo liatiamẽla ku Isietu. Olio li tu kuatisavo oku nyõla ‘ovina via li salamisa volombonge via pama,’ ndeci ovisimĩlo vĩvi haivio ka via sungulukile, kuenje vi kuatiwa “ndolohute loku vi pokuisila ku Kristu.” (2 Va Kor. 10:​4, 5) Tu likutilili okuti Yehova o tu ĩha “oñuatisi” loku kolela okuti Isietu ‘ukuailu o tu avela espiritu sandu liaye eci tu u pinga.’ (Luka 11:​13) Omo liaco, ca sunguluka okuti tu likutilila oku pinga espiritu sandu oco li tu kuatise oku pamisa ukamba wetu la Yehova.

Omõla nda isiaye u kuata peka osimbu va kasi oku enda o kolela okuti ka kuli cimue cu senga. Nda ove o tenda Yehova nda Isiove o ka kolela kolondaka vi lembeleka viokuti: “Ame Yehova, Suku yove, hu kuata peka liondio. Ame muẽle mopia love siti, Ku ka kuate usumba, hu kuatisa.” (Isa. 41:​13) O ka kuata esumũlũho linene lioku endaenda la Suku otembo yosi. (Mika 6:⁠8) Nda wa amamako oku linga ocipango caye, o ka tambula ocisola caye lesanju li tunda koku tenda Yehova nda Isiove.

[Atosi pombuelo yamẽla]