Kuata Ukamba la Suku
Isia Umue ka Sokisiwa
ONDAKA “Isia,” yitito, pole, yi sanjuisa calua ovitima viomanu. Isia o sole omõlaye u kuatisa oku kula ciwa. Eli olio esunga lieci Embimbiliya li sokisila Yehova Suku, nda “Isia.” (Mateo 6:9) Yehova, Isia umue wa tuwa ndati? Oco o sange etambululo liaco, tu konomuisi olondaka Yehova a popia kepuluvi Yesu a papatisiwa. Onjila isia a vangula lomãla vaye, oyo yi lekisa ndomo eye a tuwa.
Kunyamo wa 29 O.K. kosãi ya Mbalavipembe, Yesu wa endele Kolui Yordão ha papatisiwa. Embimbiliya li tu sapuila ndoco: “Tuli Yesu a papatisiwa haico a tunda vovava kuenje ilu lio situlukila, yu wa mola espiritu lia Suku li loka ndopomba kuenje lio vata. Kuenje ondaka ya tunda vilu, ya linga yiti, U Eye Omõlange wa soliwa, ndo sanjukila.”a (Mateo 3:16, 17) Olondaka via Yehova vi lekisa ndomo eye a tuwa. Kũlĩhĩsa ovina vitatu Yehova a sapuila Omõlaye.
Catete, londaka hati, “vumõlange,” Yehova wa yonguile oku popia hati, ‘Nda sanjukila oku kala Isiove.’ Isia o kuete olondunge o limbuka nda omãla vaye va kuete onjala kuenda o kapako olonjongole viavo. Omãla va sukila oku limbuka okuti, va kuete esilivilo vepata. Ndaño vepuluvi liaco Yesu wa kala ale ukulu, sokolola esanju a kuata eci a yeva olondaka via Isiaye!
Cavali, Yehova poku sapuila Omõlaye hati, “nda ku sanjukila,” wa lekisa ocisola caye ku Yesu. eci ci lomboloka okuti Isia wa yonguile oku popia hati, ‘Ndu ku sole calua.’ Onjali yiwa yi sapuila omãla vaye okuti ndu vu soli calua. Olondaka viaco viocisola, vi kuatisa omãla oku kula ciwa. Yesu wa kuata esanju lialua eci a yeva olondaka viocisola ku Isiaye!
Catatu, ondaka yokuti, “nda ku sanjukila calua,” yi lekisa okuti Yehova wa kapako Omõlaye. Ci kasi ndu okuti Yehova wa kala oku popia hati, ‘Amõlange, nda sanjukila calua ovina wa siata oku linga.’ Isia o kuetele ocisola omãla vaye, o sandiliya apuluvi oku linga ovina vi va sanjuisa. Omãla va pamisiwa calua locisola colonjali viavo. Yesu wa pamisiwavo lolondaka viocisola a yeva ku Isiaye!
Ocili, Yehova Isia umue ka sokisiwa. Anga hẽ utima wove u ku vetiyavo oku kuata isia yaco? Nda oco, ove oka sanjuka poku limbuka okuti o pondolavo oku kala ekamba lia Yehova. Nda wa kolela ovina wa siata oku lilongisa viatiamẽla kokuaye loku linga ocipango caye, eye oka ku kuatisa. Embimbiliya li popia hati: “Ameli ku Suku kuenje eye amẽla kokuene.” (Tiago 4:8) Anga hẽ kuli vali kumue o pondola oku sanga ekuatiso okuti oku kala ekamba lia Yehova, Isia ka sokisiwa ci sule?
[Etosi pombuelo yemẽla]
a Poku sokisa ulandu owu, lowu u sangiwa vevanjeliu lia Luka, tuka kuata elomboloko liondaka “ove,” eci Yehova a popia hati “Ove Vumõlange wa soliwa, nda ku sanjukila.”—Luka 3:22.