Ovina Yesu a Longisa Viatiamẽla Kokuaye Muẽle

Usonehi umue wa popia hati: “Yesu wa kũlĩhĩle ovina viosi viatiamẽla kokuaye, ndeci, kocitumãlo a tunda, esunga lieci eyilila voluali, kuenda ovina via laikele oku pita laye.”—HERBERT LOCKYER.

OCO tu tave loku kolela kovina Yesu a longisa, tu sukila oku u kũlĩha ciwa. Yesu helie? Wa tunda pi? Ocimãho cipi a kuata komuenyo? Vevanjeliu lia Mateo, Marko, Luka, kuenda Yoano, tu sangamo atambululo a tunda vomẽla wa Yesu.

Osimbu ka citiwile ndomunu, wa kala ale Onjanja yimue Yesu wa popele hati: “Osimbu Avirahama ka citiwile, ame, ame, u.” (Yoano 8:58) Tunde eci Avirahama a kala komuenyo toke eci Yesu a citiwa, pa pitile 2000 kanyamo. Pole, Yesu wa kala ale komuenyo osimbu Avirahama ka citiwile. Kocitumãlo cipi Yesu a kala? Eye wa lombolola hati: ‘Nda tunda kilu.’—Yoano 6:38.

Omõla a Suku Yehova o kuete ovangelo valua va tukuiwa okuti omãla vaye. Yesu eye omõla wa velapo pokati kavo. Eye wa litukula hati, “Mõla a Suku wongunga.” (Yoano 3:18) Ondaka eyi yi lekisa okuti Yesu eye lika Suku a lulika lika liaye. Lekuatiso Liomõlaco wongunga, Suku wa lulika ovina viosi.—Va Kolosai 1:16.

“Mõlomanu” Yesu olonjanja vialua wa tukula ondaka eyi poku lilombolola eye muẽle. (Mateo 8:20) Eye ka lekisile okuti wa kala ungelo umue wa lipongolola omunu. Pole, wa kala muẽle omunu wa citiwa letimba liositu. Lekuatiso liespiritu sandu liaye, Suku wa sondoluila omuenyo womõlaye vimo liufeko umue o tukuiwa hati, Maria oco a citiwile palo posi. Omo liaco, Yesu wa citiwa ndomunu wa lipua okuti ka kuete akandu.—Mateo 1:18; Luka 1:35; Yoano 8:46.

Mesiya wa likuminyiwa Ukãi umue u Samaria wa sapuila Yesu hati, “Ndi ci okuti Mesiya, ... iya.” Kuenje Yesu wo kumbulula hati: “Ame muẽle ñasi loku popia ndeti love.” (Yoano 4:25, 26) Ondaka “Mesiya” okuti “Kristu,” yi lomboloka “Ombuavekua.” Yesu wa wavekiwa la Suku oco a tẽlise ocikele cimue ca velapo vocipango ca Suku.

Esunga lieci eyilile palo posi Yesu onjanja yimue wa popele hati: “Ñuete ocikundi coku kundila ondaka yiwa yusoma wa Suku ... momo eci oco nda tumilua.” (Luka 4:43) Ndaño okuti Yesu wa lingila omanu ovina vialua viwa, upange wa velelepo komuenyo waye, oku kunda Usoma wa Suku. Ovina a longisa viatiamẽla Kusoma waco, tu ka vi konomuisa kovipama vikuavo.

Yesu ka kaile omunu umue waño.a Ndomo tu ka ci konomuisa, otembo eye a kala kilu yo kuatisa oku popia olondaka via kuatisa omanu valua eci a kala palo posi. Anga hẽ, oku kũlĩha okuti Yesu wa popia olondaka via kuatisa omanu valua voluali, ka ci tu komõhisa?

[Atosi pombuelo yamẽla]