Kuata Ukamba La Suku
‘Uviali Wove u Kolisua’
VOKUENDA kuanyamo, olombiali vialua via siata oku tundisiwa kolomangu viavo. Vimue via siata oku piwa kolomangu viavo noke yocela, osimbu okuti vikuavo vi kisikiwa oku tunda kolomangu viavo. Nye ci popiwa ku Yesu Kristu Osoma Yuviali wa Suku wo kilu? Anga hẽ kuli ocina cimue ci pondola oku u tateka oku viala Ndosoma ya nõliwa la Suku? Etambululo liaco li sangiwa kolondaka Yehova a sapuila Soma Daviti wa vialele ko Isareli ndomo ca sonehiwa kelivulu lia 2 Samuele kocipama 7.
Kefetikilo liocipama caco, tu lilongisako okuti, soma Daviti wa sumuile calua, momo wa kala vonjo yimue ya posoka osimbu, ocikasia ca Suku ca kala ño vombalaka yimue.a Noke, Daviti wa lekisa onjongole yaye yoku tungila Yehova onembele yimue ya posoka. (Ocinimbu 2) Pole, weya oku kũlĩha okuti hayeko o ka tunga onjo yaco. Vonduko yuprofeto Natana, Yehova wa sapuila Daviti hati, omõlove eye o ka tunga onembele yaco.—Ovinimbu 4, 5, 12, 13.
Onjongole yutima wa Daviti ya vetiya Yehova. Poku sumũluĩsa elitumbiko lia Daviti loku tẽlisa ovitumasuku, Suku wa linga laye ocisila cokuti, kocikoti caye ku ka tunda umue o ka viala otembo ka yi pui. Natana wa pitiya ku Daviti ohuminyo ya Suku eci a popia hati: “Epata liove luviali wove vi kolisua kovaso ange otembo ka yi pui. Omangu yove yi tumãla hũ otembo ka yi pui.” (Ocinimbu 16) Helie Kapiñala kocisila caco o ka viala otembo ka yi pui?—Osamo 89:20, 29, 34-36.
Yesu u Nasara wa kala ukuacikoti ca Daviti. Eci ungelo a sapula oku citiwa kua Yesu, wa popia hati: “Yehova Suku o wiha ocalo ca isiaye Daviti. O viala ño-o hũ epata lia Yakoba, kuenje usoma waye ko sulila.” (Luka 1:32, 33) Ocili okuti, ocisila ca lingiwa la Daviti, ca tẽlisiwa ku Yesu Kristu. Eye ka noliwile lomunu, pole, o viala omo liocisila ca Suku coku eca kokuaye omoko yoku viala otembo ka yi pui. Omo liaco, tu sukila oku ivaluka okuti, olohuminyo via Suku via siata oku tẽlisiwa.—Isaya 55:10, 11.
Kelivulu lia 2 Samuele ocipama 7, tu lilongisako ovina vivali vi kuete esilivilo. Catete, tu sukila oku kolela okuti, lacimue ci pondola oku tateka Yesu Kristu oku viala. Omo liaco, tua kolela okuti, eye o ka tẽlisa ocikele cuviali waye coku ecelela okuti ocipango ca Suku ci lingiwa palo posi ndeci ci kasi oku lingiwa kilu.—Mateo 6:9, 10.
Cavali, ulandu owu u tu longisa ovina viwa viatiamẽla ku Yehova Suku. Ivaluka okuti, Yehova wa mola ovisimĩlo via Daviti, kuenda wa vi kapeleko. Oku kũlĩha okuti Yehova wa kapako ombili tu lekisa kefendelo liaye, ci pamisa calua. Olonjanja vimue ekambo liuhayele ale oku kuka, vi tu tateka oku tẽlisa ovina viosi tu yongola oku linga kupange wa Suku. Pole, tu sukila oku kolela okuti Yehova o lete ovisimĩlo viutima una u kuete ombili yoku u fendela.
[Atosi pombuelo yamẽla]
a Ocikasia covisila, ca kala okasia yimue yi kola, okuti ya tungiwa lolonumbi via Yehova ndeci eye a yonguile. Ocikasia caco, ca kala ocindekaise cemoleho lia Yehova pokati ka va Isareli.—Etundilo 25:22.