Wa Siata hẽ Oku Ecelela Okuti Yehova Oku Pulisa?
VEMBIMBILIYA mu sangiwa apulilo alua a kuatisa omunu oku kũlĩhĩsa ciwa ovisimĩlo viutima waye. Yehova, poku longisa omanu ovina via velapo, wa linga apulilo. Poku lungula Kaini oco a tinduke konjila yaye yĩvi, Yehova wo linga apulilo. (Efet. 4:6, 7) Olonjanja vimue Yehova wa vetiya omanu vamue oku tẽlisa upange waye poku va linga apulilo. Eci uprofeto Isaya a yeva epulilo lia Yehova liokuti: “Elie numa, elie o tu endelako?” Eye wa kumbulula hati: “Ame ulo, va nume ño.”—Isa. 6:8.
Yesu, Ulongisi wa Velapo, wa lingailevo apulilo. Vavanjeliu mu sangiwa eci ci pitãhala 280 kapulilo a Yesu. Ndaño olonjanja vimue wa lingaile apulilo oco a pise ovanyali vaye, ocimãho caye ca kala coku vetiya ovitima violonjeveleli viaye oku sokolola ekalo liavo kespiritu. (Mat. 22:41-46; Yoa. 14:9, 10) Upostolo Paulu, una wa soneha 14 kalivulu Ovisonehua vio Helasi, wa lingailevo apulilo a vetiya ovitima viomanu. (Va Rom. 10:13-15) Vukanda a sonehela va Roma, mu sangiwa apulilo alua. Apulilo a Paulu a vetiya omanu oku lilongisa loku kapako “ukuasi lolondunge lukũlĩhiso wa Suku.”—Va Rom. 11:33.
Apulilo amue a sukilile atambululo, akuavo a lingiwa locimãho coku vetiya omanu oku sokolola lutate ekalo liavo. Avanjeliu a lekisa apulilo alua Yesu a linga okuti a vetiya utima womanu. Onjanja yimue, Yesu wa lungula olondonge viaye hati: “Lunguki sanga vu lueyisiwa letumbisa lia va Fariseo kuenda etumbisa lia Herode.” Etumbisa liaco li lomboloka ombambe kuenda elongiso liavo liesanda. (Mar. 8:15; Mat. 16:12) Omo okuti olondonge via Yesu ka via kuatele elomboloko liaco, via fetika oku lihoyisa omo liolombolo ka vambatele. Kũlĩhĩsa apulilo Yesu a linga. Eye wa popia lavo hati: “Nye vu vanguila hoti, Ka tu kuete ombolo? Ka vu yevite? Ka wa ci limbukili? Ovitima viene he, via siva? Vu kuete ovaso puãi haimo ka vu lete? Vu kuete ovatui puãi haimo ko yevite? . . . Lopo [ka ca ku lombolokeli]?” Apulilo a Yesu a lingiwa locimãho coku vetiya olondonge oku sokolola lutate elomboloko liolondaka viaye.—Mar. 8:16-21.
“Hu Pula”
Yehova Suku wa linga apulilo oco a vetiye ukuenje waye Yovi oku pongolola ovisimĩlo viaye. Apulilo aco, a kuatisa Yovi oku limbuka okuti eye ka velelepo Ululiki waye. (Yovi, ovi. 38-41) Anga hẽ, Yehova wa lavoka okuti Yovi o tambulula apulilo aco? Sio. Apulilo amue ndeci: “Eci nda seveta oluali ove wa kala pi?” a lingiwa locimãho coku pongolola ovisimĩlo via Yovi. Noke liapulilo aco, Yovi ka kuatele vali ondaka yoku popia. Eye wa popia ño hati: “Hu kumbulula nye? Ñapa eka liange komẽla wange.” (Yovi 38:4; 40:4) Yovi wa kuata elomboloko liaco kuenje wa liketisa. Pole, Yehova ka longisile lika Yovi oku liketisa. Eye wa kuatisa Yovi oku pongolola ovisimĩlo viaye. Ndamupi?
Yovi ndaño wa kala “omunu wa pua etondelo, haeye ukuesunga,” olonjanja vimue, olondaka viaye via lekisa okuti wa kuatele ovisimĩlo ka via sungulukile. Eci a litenda “ndukuesunga ku Suku,” Elihu wa pisa ovisimĩlo viaye. (Yovi 1:8; 32:2; 33:8-12) Apulilo a Yehova eya oku pongolola ovisimĩlo via Yovi. Suku poku vanguila vocipepe, wa sapuila Yovi hati: “Ove elie okuti o sitika alungulo ange lolondaka ka vi kuete ukũlĩhiso? Iña pimo ndulume. Kolisako. Cilo ame hu pula, love o ñumbulula.” (Yovi 38:1-3) Apulilo Yehova a linga a lekisa olondunge, lunene kovilinga viaye vi komõhisa. Ukũlĩhĩso waco, wa kuatisa Yovi oku kolela kesunga lia Yehova kuenda kovilinga viaye okuti kosimbu ci sule. Ocili okuti, Yovi omo wa pulisiwa la Suku Ukuonenewosi, wa kuatisiwa calua!
Ndomo tu Ecelela
Oku Pulisiwa la Yehova
Nye ci popiwa kokuetu? Anga tu kuatisiwavo lapulilo a sangiwa Vembimbiliya? Ocili okuti tu kuatisiwa! Oku kũlĩhĩsa apulilo ana a tu vetiya oku sokolola lutate, ci tu kuatisa calua konepa yespiritu. Vondaka ya Suku mu sangiwa apulilo a velapo a tu kuatisa oku loñoloha. Handi vali, “ondaka ya Suku . . . yi kasi loku talavaya, . . . haiyo yi limbuka ovisimilo lovipango viutima.” (Va Hev. 4:12) Oco tu kuatisiwe, tu sukila oku tiamisila apulilo aco kokuetu, ndu okuti tu kasi oku pulisiwa muẽle la Yehova. (Va Rom. 15:4) Tu kũlĩhĩsi ovolandu amue.
“Onganji yoluali luosi hẽ, ka yi lingi esunga?” (Efet. 18:25) Avirahama wa linga epulilo eli ku Yehova eci a sombisa o Sodoma lo Gomora. Eye wa kũlĩhĩle okuti ku Yehova ka ca sungulukile oku yambuila olondingesunga kumue lolondingaĩvi. Epulilo lia Avirahama li lekisa ciwa okuti eye wa kolelele kesunga lia Yehova.
Koloneke vilo, omanu vamue va siata oku kuata ovisimĩlo ka via sungulukile kesombiso Yehova a ka linga, ndeci, ava va ka puluka ko Harmagedo lava va ka pinduiwa. Ka tu ka eceleli okuti apulilo aco a tu kokela asakalalo, pole, tu ivaluki epulilo lia Avirahama. Oku kũlĩha ocisola ca Isietu wo kilu loku kolela kesunga lohenda yaye, ndeci Avirahama a linga, ci tu kuatisa oku yuvula oku kuata ohele, atatahãi a honguisa, loku lipatãla lolombangulo ka vi kuete esilivilo.
“Helie kokuene o tẽla oku vokiya ukeya kutunga waye ndaño wo sakalaela?” (Mat. 6:27) Yesu poku vangula lowiñi kuenda olondonge viaye, wa linga epulilo eli oco a lekisa kokuavo esilivilo lioku kolela kekuatiso lia Yehova. Oloneke via sulako vi tu kokela asakalalo alua, pole, oku tiamisila utima kasakalalo aco ka ci vokiya kanyamo etu ndaño oku lemulula ekalo liomuenyo wetu.
Eci tu sakalala lekalo liomuenyo wetu ale wa vangandietu, tu sukila oku ivaluka epulilo lia Yesu. Momo poku ci linga, ci tu kuatisa oku tiamisila utima kovina viwa. Handi vali, ci tu kuatisavo oku yuvula ohele lovisimĩlo ka via sungulukile, vina vi nyõla olondunge kuenda etimba lietu. Ndomo Yesu a ci popia, Isietu wo kilu una o tekula olonjila loku walisa oloneleho vio vusenge, wa kũlĩha ovina viosi tu sukila.—Mat. 6:26-34.
“Ulume nga o tela oku angata ondalu okuti olonanga viaye ka vi pi?” (Olosap. 6:27) Kelivulu Liolosapo vovipama ecea via livangako, mu sangiwa olondaka isia umue a tukula poku longisa olondunge omõlaye. Epulilo eli li lekisa ovitangi viyilila kukahokolo. (Olosap. 6:29) Nda tu kuete ocituwa coku linga ocitiokoso ale olomapalo vi vetiya oloñei viukahonga, epulilo eli li tu kuatisa oku limbuka ohele yaco. Epulilo eli, ka li tiamisiwila lika kovitangi viyilila kukahonga, pole, li kuatisavo omunu oku yuvula onjila ka ya sungulukile. Olio li lekisa ocili colondaka Viembimbiliya viokuti: “Eci omunu a kũla haico a lombola.”—Va Gal. 6:7.
“Ove elie okuti o tetuluila ukuenje wamãle?” (Va Rom. 14:4) Paulu vukanda a sonehela va Roma, wa lombolola ovitangi vimue via kala vekongelo lio kocita catete. Akristão vamue omo liovituwa viapata va citiwila, va enda oku pisa ovisimĩlo lovilinga via vamanji. Epulilo lia Paulu lia va ivaluisa oku likuatela ocisola pokati kuenda oku ecelela okuti Yehova o tetuluila omanu vaye.
Cimuamue haico koloneke vilo okuti, omanu va Yehova va tunda kovisoko viñi viñi. Pole, Yehova wa tu kongela vomunga yimuamue. Anga hẽ, tua siata oku panga onepa kelitokeko liaco? Nda tu kuete ocituwa coku pisa vamanji kovina utima wavo u va ecelela oku linga, tu sukila oku lipula epulilo eli lia Paulu!
Apulilo a tu Kuatisa Oku Kuata Ukamba la Yehova
Ovolandu tua konomuisa ndeti, a lekisa ndomo apulilo a sangiwa Vondaka ya Suku a kuatisa omunu oku li kũlĩhisa eye muẽle. Nda tua konomuisa ulandu wapulilo aco, tu ka kuatisiwa oku kapako olonumbi viaco komuenyo wetu. Handi vali, osimbu tu tanga Embimbiliya tu ka limbuka apulilo akuavo a kuete esilivilo.—Tala vokakasia kemẽla 14.
Nda tua ecelela okuti apulilo a sangiwa Vondaka ya Suku a vetiya utima lovisimĩlo vietu, tu ka kũlĩha olonjila viesunga via Yehova. Yovi, noke yoku pulisiwa la Yehova wa popia hati: “Oku ku yeva letũi nda ku yeva yeva, cilo puãi iso liange lia ku mõla.” (Yovi 42:5) Yovi weya oku kũlĩha ciwa Yehova ndu okuti o kasi kovaso aye. Ndonge Tiago wa popia hati: “Ameli ku Suku kuenje eye amela kokuene.” (Tia. 4:8) Omo liaco, tu eceleli oku kuatisiwa Londaka ya Suku, oku kongelamo apulilo, oco tu kule kespiritu kuenda oku ‘kũlĩha’ ciwa Yehova!
[Olondaka vielitalatu kemẽla 14]
Nda wa li linga apulilo a-a, o ka kuatisiwa ndati
oku kuata ovisimĩlo via Yehova?
[Olondaka vielitalatu kemẽla 14]
▪“Yehova nga o sanjukila ovilumba vioku yoka levi vioku pia elisi ndeci a sanjukila oku pokola kondaka ya Yehova?”—1 Sam. 15:22.
▪“U wa kapa etũi hẽ, ka yevi? U wa lulika iso hẽ, ka lete?”—Osa. 94:9.
▪‘Anga ca sunguluka oku lisandela olondaka vioku panduiwa enene?’—Olosap. 25:27.
▪“Okutema kuove kua sunguluka?”—Yona 4:4.
▪“Ci kuatisa ndati omunu, nda o nganyala oluali luosi kuenje o takisa omuenyo waye?” —Mat. 16:26.
▪“Helie o tela oku tu tepa kocisola ca Kristu?”—Va Rom. 8:35.
▪“O kuete nye okuti kua ci tambuile ocali?”—1 Va Kor. 4:7.
▪“Utanya u livala ukamba we lowelema?”—2 Va Kor. 6:14.
[Olondaka vielitalatu kemẽla 15]
Yovi wa lilongisa nye kapulilo a Yehova?