Elaleko Lia Lingiwa Komanu Vosi!

ELALEKO lipi? Elaleko lioku nyula Oseketa Yolombangi Via Yehova, yi tukuiwavo okuti o Betele. Voluali luosi mu sangiwa eci ci soka 118 kolo Betele. Omanu va siata oku lekisa olopandu lutima wavo wosi omo liovina va mola poku nyula o Betele.

Noke lioku tala esanju Liolombangi via Yehova via kala oku talavaya ko Betele kofeka yo Mexico, umalẽhe umue o lilongisa Embimbiliya wa pula hati: “Ene akuetu! Nye ndi sukila oku linga oco ndiye kulo?” Vo kumbulula vati: “Tete o sukila oku papatisiwa, loku lisonehisa kupange wakundi votembo yosi.” Umalẽhe waco wa kapako olonumbi vo wĩha, kuenje eci pa pita anyamo avali wa lalekiwa oku ka talavaya ko Betele yo ko Mexico, kuna a kasi ale eci ci pitahãla 20 kanyamo.

O Betele yi Lomboloka Nye?

Kelimi lio Heveru, ondaka o “Betele,” yi lomboloka ‘Onjo ya Suku’. (Efet. 28:​1) Olofiliale vimue, vi kuete upange woku sandeka Ambimbiliya, lalivulu, kuenda oku tumisa okulia kuespiritu kueci ci soka 100.000 kakongelo Olombangi via Yehova koluali luosi. Voluali luosi, ci soka 20.000 komanu va litumbika kupange wo Betele, oco va vumbe Yehova kuenda vamanji. Vana va kasi ale ko Betele otembo yalua, va litumbika kupange waco tunde vumãlehe. Koloñolosi kuenda kesulilo liosemana, vakuepata lio Betele va liongolola Lolombangi vikuavo via Yehova poku enda kolohongele kuenda kupange woku kunda. Kapuluvi akuavo, va linga elilongiso lio pokolika, olomapalo, kuenda ovina vikuavo.

Vakuepata lio Betele va siata oku tambula otupalata tumue tuekuatiso olosãi viosi. Ovo va lia lia okulia kupepa, va kuete olohondo vi tatiwa ciwa haivio via yela. Ndaño okuti o Betele hacitumãloko comuenyo welau, omanu va sangiwako va kuete omuenyo umue wesanju. Vakuakunyula ka va komõhela lika oku yela loku fina kuocitumãlo caco, pole ocina ci va komõhisa vali, omunga locisola ci sangiwa pokati komanu va kasi vo Betele. Ndaño okuti vosi va kuete upange walua, ka va tatekiwa oku lekisa ocisola ku vamanji. Ko Betele ka kuli u wavelapo lu o sule omo liupange omunu lomunu a linga. Ci kale upange woku yelisa, ci kale woku tata ocumbo, ale woku teleka, pamue oku talavaya lolomakina, ovopange osi a kuete esilivilo. Omanu va kasi ko Betele, va talavayela kumuamue koku kuatisa upange woku kunda u kasi oku lingiwa Lolombangi via Yehova.​—⁠Va Kol. 3:⁠23.

Kũlĩha Ulandu wa Vamue va Talavaya ko Betele

Tu konomuisi omuenyo womanu vamue va talavaya ko Betele koluali luosi. Nye ca va vetiya oku ka talavaya ko Betele? Kũlĩhĩsa ulandu wa Mario. Eci Mario a linga Ombangi ya Yehova, wa kala oku talavaya kupange umue woku panga akãlu kofeka yo Alemanya, kuenda wa kuatele epulivi lioku linga ohuasi. Noke yepapatiso liaye, wa talavaya osemana yimosi ko Betele oku kuatisa kupange woku panga alivulu. Manji Mario wa limbuka oku litepa ku kasi pokati kolonalavayi vio ko Betele, lolonalavayi vio kovopange akuavo. Kuenje, wa linga epingilo lioku iñila kupange wo Betele. Ndaño okuti vangandiaye lomanu vakuavo kupange ka va kuatele elomboloko lionjila a nõla, manji Mario cilo o kasi oku talavaya ko Betele yo ko Alemanya.

Valua va iñila kupange wo Betele ka va kuatele elilongiso lia velapo ale umesele umue. Eci oco ca pita la manji Abel wa talavaya ko Betele yo ko Mexico vokuenda kueci ci soka 15 kanyamo. Eye wa popia hati: “O Betele ya kala osikola yocili kokuange. Nda lilongisa oku talavaya lolomakina vialua vioku panga alivulu. Ndi ci okuti, ukũlĩhĩso waco, nda wa nyiha epuluvi lioku kuata olombongo vialua kovopange akuavo, pole, nda sanjukila oku talavaya vo Betele omo liomunga, locisola ka ci sangiwa kolonepa vikuavo. Nda tambula elilongiso lia velapo, lina lia ñuatisa oku kula kespiritu loku loñoloha. Ka kuli osikola layimue ya velapo nda ya nyiha ukũlĩhĩso waco wespiritu.”

Oku Nyula o Betele ci Pamisa

Oku nyula o Betele ci kuatisa omunu oku pama konepa yespiritu. Eci oco ca pita la manji Omar ko Mexico. Inaye wo longisa Embimbiliya tunde vutila. Pole, eci a tẽlisa 17 kanyamo, Omar wa liwekapo oku endaenda kolohongele Viakristão kuenda kupange woku kunda. Eye wa fetika oku ambata omuenyo umue ũvi loku sanda ovokuasi. Noke, eci a kala oku talavaya kovingungu viasapulo, Omar wa panga onepa kocimunga cimue ca endele oku ka nyula o Betele yo ko Mexico loku ka lekisa ndomo olomakina vimue vi talavaya. Omar wa popia hati: “Noke yoku lekisa ndomo olomakina viaco vi talavaya, omunu wa kala oku tu songuila wa tu laleka oku nyula ocitamãlo caco. Ovina nda mola kuenda ndomo nda tatiwa locisola, via mbetiya oku sokolola omuenyo ũvi nda kala oku ambata, omo lioku tinduka ku Yehova. Omo liaco, nda fetika vali oku endaenda kolohongele loku lilongisa Embimbiliya. Eci pa pita olosãi epandu tunde eci nda nyula o Betele, nda papatisiwa. Mandula Yehova omo lievetiyo nda tambula poku ka nyula o Betele.”

Ulume umue o tukuiwa hati Masahiko, kofeka yo Japão, wa kulila vepata limue Liolombangi via Yehova. Eye wa simaile okuti oku kala Ukristão cu upa elianjo. Omo liovopange o kosikola, wa liwekelepo oku endaenda kolohongele kuenda kupange woku kunda. Kuenje, Masahiko wa popia hati: “Eteke limue epata lietu kumue lakamba vakuavo Akristão va sokiya oku ka nyula o Betele. Omo lioku lipilika kuepata, nda tava kelaleko liavo. Poku nyula o Betele, nda pamisiwa calua. Esanju nda kuata poku linga ungende Lakristão vakuavo sia la li kuata poku kala lomanu okuti Halombangiko via Yehova. Onjongole yoku ambata omuenyo umue ndowu Wakristão ya livokiya kuenda nda nõlapo oku pinga elilongiso Liembimbiliya.” Manji Masahiko cilo o talavaya ndohundi ya velapo vekongelo.

Manji umue ukãi kofeka yo França noke lioku ilukila kolupale luo Moscovo omo liupange, wa liwekelepo oku liongolola lafendeli va Yehova kuenje weya oku hongua kespiritu. Eye wa fetika oku ambata omuenyo umue ũvi, yu wa kuela ulume umue okuti Hambangiko ya Yehova. Noke manji umue ukãi wa tunda ko França weya oku u pasuisa, kuenje kavali kavo va enda toke kolupale luo São Petersburgo, kofeka yo Russia oku ka nyula o Betele. Eye wa popia hati: “Esanju va tu yolela lalio ko Betele lia mbetiya calua. Nda limbuka okuti espiritu lia Yehova lia kala lame omo liombembua yi sangiwako. Momo lie nda lueyela ndoco poku tinduka vocisoko ca Yehova? Noke lioku nyula o Betele, nda likutilila ku Yehova oco a nyĩhe ongusu yoku longisa omãla vange vakãi Embimbiliya.” Manji u-u wa honguele kespiritu, wa pamisiwa calua poku nyula o Betele kuenda wa amamako oku kula kespiritu.

Vana ka va kũlĩhĩle ciwa Olombangi via Yehova eci va nyula o Betele nye ca siata oku va komohisa? Kunyamo wo 1988, ulume umue ukuapulitika o tukuiwa hati Alberto wa nyula o Betele yo ko Brasil. Eci a mola ndomo ocitumãlo caco ca yela, ndomo ovina viongotiyiwa kuenda ndomo upange u lingiwa, co komohisa calua. Osimbu handi Alberto ka nyulile o Betele, wa endele oku ka nyula onjo yolopatele kuna kua kala nãwa yaye wa kala kosikola yimue yolopatele. Omo lioku litepa kua kala pokati kovitumãlo viaco, Alberto wa popia hati: “Konjo yolopatele ovina viosi vi lingiwa vuyombeki.” Noke yoku nyula o Betele, eye wa tava oku lilongisa Embimbiliya, wa siapo o pulitika kuenje cilo wa linga ukulu wekongelo.

Enju o Nyule o Betele!

Omanu valua, va nyula nyula oloseketa viofiale vi sangiwa vofeka yavo. Manji Paulo kuenda Eugenia, vo kofeka yo Brasil, va soleka olombongo vokuenda kuanyamo akuãla, ha va lingi ungende woloneke vivali vocinãla ci soka 3.000 kolokilometulu lokalela oco va ka nyule o Betele yo kofeka yavo. Ovo va popia vati: “Alikolisilo etu a kuata onima. Kaliye tua kũlĩha ciwa ndomo ocisoko ca Yehova ci talavaya. Eci tu lomboluila ava va lilongisa letu Embimbiliya ndomo upange u lingaiwa ko Betele, olonjanja vimue va tu pula vati, ‘Ene hẽ, wa endeliko ale?’ Cilo tu tẽla oku tambulula lutõi, okuti oco.”

Anga hẽ vofeka yove muli oseketa yofiliale, ale o Betele? Tu kasi oku ku laleka oku ka nyula ocitumãlo caco. Poku ka nyula o Betele va ka ku yolela lesanju kuenda o ka pamisiwa calua konepa yespiritu.

[Elitalatu kemẽla 18]

Mario

Abel

Alemanya

Japão

Brasil