Omunga Yakristão Yeca Esivayo Ku Suku
“Likapeliko oku likuata omunga ye espiritu”—VA EFE. 4:3.
1. Kocita catete ekongelo Liakristão ko Efeso lia eca ndati esivayo ku Suku?
OMUNGA ya kala vekongelo Liakristãlo ko Efeso ya ecele esivayo ku Suku yocili, Yehova. Olupale luaco lua kemalele calua, momo pokati Kakristão vamue va kuatele apika, osimbu okuti vakuavo va kala apika haivo olohukũi. (Va Efe. 6:5, 9) Vamue va kala va Yudea va lilongisa ocili vokuenda kuolosãi vitatu eci upostolo Paulu a lingila ohundo vo sungonga yavo. Vakuavo, va enda oku fendela Artemis kuenda va kala vakuakutaha. (Ovil. 19:8, 19, 26) Omo liaco, Etavo liocili lia kongelele omanu vakuavisoko viñi viñĩ vomunga imuamue. Paulu wa limbukile okuti Yehova wa kala oku sivayiwa omo lielitokeko lia kala pokati kekongelo. Upostolo Paulu wa soneha hati: “[Kokuaye ku eciwe] ulamba wovekongelo.”—Va Efe. 3:21.
2. Nye ca kala oku nyola omunga ya kala pokati Kakristão ko Efeso?
2 Omunga ya kala pokati kekongelo lio ko Efeso ya kala oku nyoliwa. Paulu wa lungula akulu vekongelo hati: “Pokati kene muẽle, pa katuka alume va vangula ovina via penga ha va koki oloñame okuti vi va kuama.” (Ovil. 20:30) Handi vali, vamanji vamue ka va silepo espiritu lĩvi lina Paulu a tukula okuti li “linga upange waye vovitima via vakuesino.”—Va Efe. 2:2; 4:22.
Ukanda u Lekisa Esilivilo Lioku Kuata Omunga
3, 4. Ukanda Paulu sonehela va Efeso u lekisa ndati esilivilo lioku likuata omunga?
3 Paulu wa limbukile okuti Akristão va sukilile oku likolisilako oku likuata omunga, oco va amameko oku talavayela kumuamue. Espiritu lia Suku lia kuatisa Paulu oku sonehela va Efeso oco va likuate omunga. Vukanda waco Paulu wa tukula ocipango ca Suku coku ‘kongela ovina viosi vu Kristu.’ (Va Efe. 1:10) Eye wa sokisa Akristão lovawe oku tunga onjo. “Onjo yaco yosi . . . yi kula, kuenje yi lingila vu [Yehova] onembele yi kola.” (Va Efe. 2:20, 21) Handi vali, Paulu wa tukula omunga ya kala pokati ka va Yudea Lakristão Vakualofeka kuenda wa va ivaluisa okuti vosi yavo va lulikiwa la Suku. Eye wa tukula Yehova nda “Isia, u apata osi o kilu la-a o posi o lukulula.”—Va Efe. 3:5, 6, 14, 15.
4 Poku konomuisa ocipama 4 celivulu lia va Efeso, tu ka limbuka okuti oku likuata omunga ci sukila oku likolisilako, ndomo Yehova a tu kuatisa oku likuata omunga, kuenda ovituwa vi tu kuatisa oku amamako oku likuata omunga. Momo lie ku tangela ocipama caco cosi oco upeko esilivilo?
Oku Likuata Omunga ci Sukila Oku Likolisilako
5. Esunga lie ovangelo va Suku va likuetele omunga, kuenda momo lie ca tu tĩlila oku likuatela omunga?
5 Paulu wa vetiya vamanji ko Efeso oku ‘likapelako loku likuata omunga vespiritu.’ (Va Efe. 4:3) Oco o kuate elomboloko lielikolisilo tu sukila oku linga, konomuisa ulandu wovangelo va Suku. Ndeci kilu lieve ka kuli oviendalomuenyo vivali via lisetahãla, pokati kolohuluwa viovangelo Yehova a lulika, ka pali ungelo umue wa lisetahãla lungelo ukuavo. (Dan. 7:10) Ovo va vumba Yehova lomunga, momo va pokola kuenda va linga ocipango caye. (Tanga Osamo 103:20, 21.) Osimbu okuti ovangelo va kuete ovituwa vialua viwa, Akristão vakuakulueya kolonepa vialua. Eli olio esunga lieci ka ca lelukilile oku likuata omunga.
6. Nye ci tu kuatisa oku talavayela pamosi la vamanji va kuete ovituwa via litepa levi vietu?
6 Omo okuti omanu ka va lipuile, pamue va kuata ovitangi eci va talavayela kumosi. Nda manji umue womboka o kuete ocituwa coku cilua, pole, manji ukuavo va vumbila kumosi Yehova o pitila selo haeye ukuacinyeñowusa, ovitangi vipi va pondola oku kuata? Citava okuti omunu lomunu o sima okuti ukuavo eye o kuete ocituwa cĩvi, pole, kavali kavo va ivalako okuti va kuete ovituwa ka via sungulukile. Oco hẽ, nye ci va kuatisa oku likuata omunga? Konomuisa ndomo olondaka vi kuaĩmo via Paulu vi pondola oku va kuatisa. Kuenda sokolola ndomo ovituwa viaco vi tu kuatisa oku likuata omunga. Paulu wa soneha hati: “Ndu peyi okuti okukala kuene ku sunguluka . . . Liunjukili pokati locisola, lumbombe wosi, kuenda oku omboka, lepandi. Likapeliko oku likuata omunga ye espiritu poku pandikisa oku kala lombembua.”—Va Efe. 4:1-3.
7. Momo lie ci kuetele esilivilo oku likuata omunga Lakristão vakuavo ndaño ka va lipuile?
7 Oku lilongisa oku vumba Suku lomanu ka va lipuile, ci kuete esilivilo momo kuli lika ocisoko cimosi cafendeli vocili. “Kuli etimba limuamue, le espiritu limuamue, ndeci wa kovongiwili lekovongo limuamue kelavoko limuamue. Ñala umuamue, ekolelo limuamue, epapatiso limuamue, Suku umuamue, haeye Isia ya vosi.” (Va Efe. 4:4-6) Espiritu lia Yehova lasumũluho aye a kasi lika vocisoko comanu va nõliwa Laye. Nda manji umue vekongelo wa tu lueyela, kuli vali oku tu enda? Sio, momo ka kuli vali lakumue tu ka yeva ovina via tiamẽla komuenyo ko pui.—Yoa. 6:68.
“Olongavelo Komanu” vi Kuatisa Oku Likuata Omunga
8. Kristu o tu kuatisa ndati oku yuvula ovina vi nyola omunga?
8 Paulu wa tukula ocituwa cimue casualali vo kosimbu oco a lekise okuti Yesu wa eca “olongavelo komanu,” ha vi kuatisa ekongelo oku likuata omunga. Esualali lia yula kuyaki, lia enda oku nena konjo ohute oco yi linge upika wukãi waye. (Osa. 68:1, 12, 18) Yesu, omo okuti wa yula oluali, layevo wa ambata olohute vialua. (Tanga Va Efeso 4:7, 8.) Oco hẽ, wa talavaya ndati lolohute viaco viocindekaise? “Wa kapa okuti vamue va linga ovapostolo, vamue ovaprofeto, vamue ovakundi vondaka yiwa, vamue ovangombo, vamue alongisi. Wa ci lingila oku kolisa olosandu viaye ha vi lingi upange woku longisa loku tunga etimba lia Kristu, toke etu vosi tu pitila kongongela yekolelo.”—Va Efe. 4:11-13.
9. (a) “Olongavelo komanu” vi tu kuatisa ndati oku likuata omunga? (b) Momo lie vosi vekongelo va kuetele ocikele coku likuata omunga?
9 Omo okuti “olongavelo komanu” angombo vakuacisola, va tu kuatisa oku likuata omunga. Ndocindekaise, nda ukulu umue wekongelo o limbuka okuti vamanji vavali ‘va lisanumula pokati,’ eye o kuatisa ekongelo oku amamako lomunga poku eca elungulo komunu lomunu, oco ‘a va tiule lutima womboka.’ (Va Gal. 5:26–6:1) Ndalongisi, “olongavelo komanu” va pamisa ekolelo lietu lalongiso Embimbiliya. Ovo va tu vetiya oku likuata omunga loku kula konepa yespiritu. Paulu wa tukula esunga liaco poku soneha okuti, “oco ka tu lingi vali omãla va punguaiwa lolofela viosi viokulongisa lokulunguka kuomanu, latutu avo oku wengula esanda.” (Va Efe. 4:13, 14) Akristão vosi va kuete ocikele coku kuatisa vamanji oku likuata omunga, ndeci ovimatamata vietimba lietu vi talavayela kumuamue.—Tanga Va Efeso 4:15, 16.
Kuata Ovituwa Viokaliye
10. Ovituwa vĩvi vi tateka ndati omanu oku likuata omunga?
10 Ove wa limbuka hẽ okuti ocipama 4 cukanda Paulu a sonehela va Efeso, ci lekisa okuti ocisola oco ocina ci kuatisa Akristão oku likuata omunga? Ocipama caco ci lekisa ovina via kongela vocisola. Konomuisa olonumbi viocisola via tiamẽla kukahonga kuenda ovilinga vievĩho. Paulu wa lungula vamanji oco ‘ka va ka linge vali ovina vakualofeka va lingaile.’ Omanu vaco kosimbu “va tĩlisa ovitima,” kuenda “va livela oku linga evĩho liosi.” (Va Efe. 4:17-19) Evĩho li sangiwa voluali lulo li pondola oku tateka omunga yetu. Omanu va tenda alusapo, va imba ovisungo, va tala ovitalukilo viukahonga, kuenda va linga ukahonga ci kale vuyombeki ale voluayela. Oku lingila ocitiokoso omunu una ku kuete onjongole yoku likuela laye, ci pondola oku ku tindula ku Yehova loku tundisiwa vekongelo. Momo lie? Momo ocituwa caco ci tuala kukahonga. Handi vali, ocitiokoso ci koka omunu o kuele oku linga ukahokolo, loku kokela ohali omãla kuenda ohueli va lueyela. Ocili okuti ocituwa caco ci tateka omanu oku likuata omunga! Eli olio esunga lieci Paulu a sonehela hati: “Ene puãi Kristu ka wo lilongisili ndoco.”—Va Efe. 4:20, 21.
11. Embimbiliya li vetiya Akristão oku linga epongoloko lipi?
11 Paulu wa lekisa okuti tu sukila oku imbapo ovituwa vĩvi loku kuata ovituwa vi tu kuatisa oku likuata omunga la vakuetu. Eye wa popia hati: “Luli omunu wale una wa tiama komuenyo wale, haiwo wa vĩha loloñeyi vieliaño, . . . wali omunu wokaliye una wa tungiwa lesetahãlo lia Suku lesunga kuenda oku kola.” (Va Efe. 4:22-24) Oco hẽ, ‘tu wala ndati omunu wokaliye’? Nda tua kapako ovina tua siata oku lilongisa Vondaka ya Suku loku kuama ongangu Yakristão va kula kespiritu, tu ka wala “omunu wokaliye una wa tungiwa lesetahãlo lia Suku.”
Vangula Upopi Wokaliye
12. Oku vangula ocili ku kuatisa ndati oku likuata omunga, kuenda momo lie vamue ca va tĩlila oku popia ocili?
12 Oku popia ocili ci kuete esilivilo lialua pokati kepata kuenda vekongelo. Ocili, elianjo, lupopi wa sunguluka vi kuatisa omanu oku likuata omunga. (Yoa. 15:15) Pole, nye ci popiwa komunu o kemba ukuavo? Eci manji a limbuka uhembi waco, ukamba wavo u nyoleha. Kuata elomboloko liolondaka via Paulu eci a soneha hati: “Omunu omunu a popie ocili lukuavo, momo tuvimatamata vietimba limuamue.” (Va Efe. 4:25) Omunu wosi ohembi, wa fetika locituwa caco tunde vutila, kuenje cu tĩlila oku vangula ocili. Pole, Yehova o sanjukila alikolisilo aye kuenda u kuatisa oku linga apongoloko.
13. Voku imbapo upopi ka wa sungulukile mua kongela nye?
13 Yehova o tu longisa oku lisumbila pokati kuenda oku likuata omunga vekongelo kuenda vepata poku kũlĩhisa upopi wetu. “Vovimela viene ka mu ka tunde ombangulo yĩvi, . . . ocikumbiti lonyeño lekaka kuenda onjuela lusokui locipombo, viosi vimbipo.” (Va Efe. 4:29, 31) Onjila yimue yoku yuvula upopi ka wa sungulukile oku kuatela vakuetu esumbilo. Ndocindekaise, ulume wosi o vangula lukãlu lukãi waye, o sukila oku pongolola ocituwa caco poku lilongisa ndomo Yehova a sumbila akãi. Suku wa wavekavo akãi vamue lespiritu liaye, loku va ĩha elavoko lioku ka viala kumue la Kristu oko kilu. (Va Gal. 3:28; 1 Pet. 3:7) Cimuamue haico okuti, ukãi wosi o kuete ocituwa coku lihoyisa la veyaye, o sukila oku pongolola ovisimĩlo viaye poku lilongisa ndomo Yesu a tambulula vana va kala oku u sanumula.—1 Pet. 2:21-23.
14. Ekambo lioku likandangiya konyeño li koka ohele yipi?
14 Omunu wosi o vangula upopi ka wa sungulukile ka tẽla oku likandangiya konyeño. Upopi waco u tepa omanu va kasi vomunga yimuamue. Onyeño yi sokisiwa londalu. Oyo, ka yi kuatisa omunu oku likandangiya loku yuvula ema. (Olosap. 29:22) Omunu wosi o kuete ocituwa coku sepula vakuavo o sukila oku likandangiya konyeño oco ka ka nyole ukamba waye lavakuavo. Akristão va sukila oku tetela vakuavo, loku yuvula ocikumbiti ale oku vangula vali ovitangi via tetuluiwa ale. (Osa. 37:8; 103:8, 9; Olosap. 17:9) Paulu wa lungula va Efeso hati: “Temi, puãi ko ka lingi ekandu. Ekumbi ka li ka iñile lokutema kuene. Ko ka eci evelo keliapu.” (Va Efe. 4:26, 27) Ekambo lioku likandangiya konyeño lieca evelo Keliapu lioku koka olonepele kuenda ovitangi vekongelo.
15. Ocituwa coku nyana ci koka ovitangi vipi?
15 Oku kuatela esumbilo ovikuata via vakuetu ci kuatisavo ekongelo oku likuata omunga. Tu lunguiwa hati: “U wa ivaile ka ka ive vali.” (Va Efe. 4:28) Afendeli va Yehova va likolela pokati. Omo liaco, nda Ukristão umue o kuete ocituwa coku nyana, o nyola omunga lesanju vi sangiwa pokati ketu.
Ocisola tu Kuetele Suku ci tu Kapa Vomunga
16. Tu kuata ndati upopi wa sungulula oco tu pamise omunga yetu?
16 Omunga yi sangiwa vekongelo Liakristão yi tunda kocisola tu kuetele Suku loku tata vakuetu locisola. Oku sanjukila ohenda ya Yehova ci tu vetiya oku kapako onumbi eyi: “Vovimela viene . . . mu tunde puãi olondaka vi kuatisa, haivio . . . vi sumũluisa ava va vi yeva. Liombokeli pokati loku lilinga ohenda loku liecela pokati, ndomo Suku a weceli vu Kristu.” (Va Efe. 4:29, 32) Yehova ecela akandu omanu ka va lipuile. Eci ka ci tu vetiya hẽ oku ecela akulueya a vakuetu?
17. Momo lie tu sukilila oku likolisilako oku likuata omunga?
17 Omunga yi sangiwa pokati kafendeli va Suku yeca esivayo ku Yehova. Espiritu liaye li tu vetiya oku likuata omunga volonepa viñi viñi. Ocili okuti, tu yongola oku songuiwa lespiritu liaco. Paulu wa soneha hati: “Ko ka sumuisi espiritu sandu lia Suku.” (Va Efe. 4:30) Omunga ukuasi umue tu sukila oku teyuila. Momo oyo yeca esanju kuava va yi sanda kuenda esivayo ku Yehova. “Oco, setukuli Suku ndomãla va soliwa. Endaeli vocisola.”—Va Efe. 5:1, 2.
O Tambulula Ndati?
• Ovina vipi vi kuatisa Akristão oku likuata omunga?
• Ovituwa vietu vi kuatisa ndati ekongelo oku likuata omunga?
• Upopi wetu u tu kuatisa ndati oku talavaya la vakuetu?
[Elitalatu kemẽla 17]
Omanu vakuavisoko viñi viñi va kongeliwa vomunga yimuamue
[Elitalatu kemẽla 18]
Wa kũlĩha hẽ ohele yilila koku linga ocitiokoso?