Vakuakutanga va Pula . . .

Momo lie Satana a kokela okuti onyõha yi vangula la Eva?

▪ Ove pamue o tava okuti, ndomo tua kũlĩhĩsa kemẽla 8, Satana eye wa kala konyima yonyõha ya vangula la Eva. Embimbiliya oco li longisa. Pole pamue, o lipula ndoco: ‘Momo lie espiritu limue li kuete unene lia ponduile oku vangula pocakati conyõha yimue?

Embimbiliya li tukula olonjila Satana a siata oku talavaya lavio hati, “atutu” kuenda ovina via pita la Eva vi kuatisa oku ci kũlĩha ciwa. (Va Efeso 6:11) Ovina via pita ko Edene ulanduko waño watiamẽla kocinyama cimue ci vangula; ocindekaise cimue ci koka usumba u lekisa onjila yi kuamiwa oco va yapuise omanu koku vumba Suku. Ndamupi?

Satana wa nõla lutate ovina a yonguile oku linga. Eva eye wa sulileko kovina via lulikiwa Voluali. Omo liaco, Satana wa talavaya lekambo liuloño eye a kuatele kuenje wa linga esokiyo yoku u yapuisa. Poku salama konyima y onyõha yimue okuti ociluvo ca nyanga calua, Satana ka situluile ovimãho viaye vina a kakatelele havio viocipulu. (Efetikilo 3:1) Kũlĩhĩsavo ovina eye a tẽla oku linga poku koka okuti onyõha yi molẽha ndu yi vangula.

Tete, Satana wa koka okuti ovisimĩlo via Eva vi yapuisiwa. Eva wa kũlĩhĩle okuti olonyõha ka vi vangula; ulume waye wa lukile olonduko kovinyama viosi, oku kongelamo onyõha noke yoku vi kũlĩhĩsa lutate. (Efetikilo 2:19) Cimuamue haco okuti Eva, wa muile ale ocinyama caco ca nyanga. Omo liaco, etutu lia Satana lia vetiya onjongole yaye; ya koka okuti eye o tiamisila utima kepako lina va va handelekele okuti ka citava oku liako. Cavali, onyõha ya salamele vamẽla wuti waco, omo liaco nye Eva a sima? Anga hẽ eye wa sima okuti ocinyama caco citito okuti ka ci vangula, ca lia kepako kuenje ca tẽla oku vangula? Ka tua kũlĩhĩle eci Eva a sima ale nda okuti onyõha ya lumana kepako. Pole, eci tua kũlĩha ceci okuti, eci onyõha ya sapuila Eva okuti epako lia laike oku u lingisa oku “kala nda Suku,” wa nõlelepo oku tava kuhembi waco.

Olondaka Satana a nõla, vi sitululavo ovina vialua. Eye wa koka okuti Eva o kuata atatahãi loku sima okuti Suku wa kala oku u tateka ocina cimue ciwa kuenda elianjo liaye. Atutu a Satana nda a tunda lika ciwa nda okuti ocipululu ca Eva ca velelepo ocisola a kuatele Suku, una wo wĩhile ovina viosi a kuatele. (Efetikilo 3:4, 5) Pole, atutu a Satana a kuata onima yiwa; momo ci kaile Eva kuenda Adama, ka va kuatelele ocisola Suku kuenda oku u sanjukila. Haciliko hẽ okuti koloneke vilo Satana wa siata oku vetiya ocipululu kuenda onjila yimuamue yoku sokolola?

Pole, vipi via kala ovisimĩlo via Satana? Nye eye a yonguile? Ko Edene eye ka yonguile oku li situlula. Pole, vokuenda kuotembo wa lekisa ndomo a tuwa. Eci a seteka Yesu, eye wa kũlĩhĩle okuti ndaño wa liviaviaya, nda ka kuatele onima yiwa. Omo liaco, eye muẽle wa sapuila Yesu hati: “Kekama loku ndi fendela.” (Mateo 4:9) Ci molẽha okuti Satana tunde osimbu wa kuatela esepa efendelo li eciwa ku Suku. Eye o ka linga cosi citava oco a tateke omanu oku fendela lonjila yimue yi taviwa la Suku. Eye o sanjukila oku nyõla ekolelo liomunu o vumba Suku.

Embimbiliya li situlula okuti Satana o talavaya latutu alua oco a tẽlise ovimãho viaye. Ci sanjuisa calua ceci okuti, ka tu sukila oku ya puisiwa ndeci ca li pita la Eva “momo ka tu kasi vonumbi yatutu aye.”​—2 Va Korindo 2:11.