Kuata Ukamba La Suku

Ceci Akulu va ka Linga Amalẽhe

HELIE pokati ketu o sole oku kala lanyõle kocipala, loku vuvala vovaso, oku kala ocisitatũi, kuenda oku hongua kuetimba? Pamue ove o lipula ndoco: ‘Momo lie Suku a tu lulikila longusu yoku linga ovina viosi votembo yovomalẽhe, noke ecelela okuti tu tala ohali omo lioku kuka?’ Esapulo liesanju lieli okuti, Suku ka tu yonguila ovina viaco. Pole, eye o kuete onjongole yoku tu yovola kocitangi coku kuka! Kũlĩhĩsa olondaka a sapuila Yovi vi sangiwa kelivulu lia Yovi 33:24, 25.

Sokolola ekalo lia Yovi, ulume umue ukuekolelo wa soliwile la Yehova. Yovi ka kũlĩhĩle okuti, Satana wa kapa vatatahãi epandi liaye, poku popia hati, wa kala lika oku vumba Suku omo liocipululu. Yehova wa ecelela okuti Satana o seteka Yovi momo wa kolelele Kokuaye, kuenda wa kũlĩhĩle okuti o kuete unene woku nyõla ovina viosi vĩvi Satana a lingila Yovi. Omo liaco, Satana ‘wa veta Yovi lapute tunde pomãhi toke ponumbutue.’ (Yovi 2:7) Etimba lia Yovi lie yukile ovanyo lolombande, ekova liaye lia tekãvele, kuenda co nenela evalo lialua. (Yovi 7:5; 30:17, 30) O tẽla hẽ oku sokolola ohali yaye? Yovi wa pandikisa calua, kuenje, wa popia hati: “Toke [ndi] fa si liweka kesunga liange.”—Yovi 27:5.

Pole, Yovi wa lueya. Eci a limbuka okuti o panda koku fa, wa lekisa esakalalo kekalo liaye muẽle poku popia hati: “Ndukuesunga ku Suku.” (Yovi 32:2) Elihu, kapitiya ka Suku wa pisa Yovi. Pole, wo lomboluilavo olondaka vi tunda ku Suku haivio vi eca elavoko poku u sapuila hati: “Popela [Yovi] konjembo omo nda sanga eci ndu yovola laco, oco, etimba liaye li tumbuluke vali, li kuate ongusu ndeyi yovutila. Olohõlo viaye vi lisoke vali levi a kaile lavio eci a kala umalẽhe.” (Yovi 33:24, 25) Citava okuti olondaka evi via eca elavoko ku Yovi. Momo wa limbuka okuti, ka amamako oku tala ohali toke kolofa. Nda wa likekembelele, Suku nda wa linga eliangiliyo liocisembi coku u yovola kovitangi viaye.a

Yovi lumbombe walua, wa tava kelungulo kuenda wa likekembela. (Yovi 42:6) Yehova wa tava kocisembi ca Yovi, kuenda wa ecelela okuti, ci tuvika akandu aye, oco o yuluile onjila yoku tumbulula ekalo liaye loku u sumũlũisa. Yehova “wa sumũlũisa calua esulilo lia Yovi okuti efetikilo liaye li sule.” (Yovi 42:12-17) Sokolola ekavuluko Yovi a yeva eci a sakuiwa okuti, etimba liaye lia tumbuluiwa ndeli lio ‘vutila’!

Ndaño Suku wa tava ocilumba ca Yovi oco cu yovole, ocilumba caco ka ca kuatele esilivilo lialua, momo wa amamako lekambo lioku lipua toke kolofa. Pole, etu tu kuete ocisembi cimue ca velapo, okuti, Yehova omo liocisola, wa tu ĩha Omõlaye oco a tu yovole kekandu. (Mateo 20:28; Yoano 3:16) Vosi va kolela kocisembi caco, va lavoka oku kala otembo ka yi pui voluali luokaliye palo posi. Voluali luokaliye tu lavoka, Suku o ka yovola omanu kocitangi coku kuka. Momo lie ku lilongisila ovina vi lekisa ndomo o ka kala poku mõla ‘etimba liomanu va kuka lia tumbuluiwa ndeli lio vutila’?

[Atosi pombuelo yamẽla]