Lilongisila Kondaka Ya Suku

Momo Lie Suku a Kasi Oku Ecelela Evĩho Lohali?

Ocipama cilo, ceca atambululo kapulilo amue okuti, pamue wa va lingile ale, kuenda ci lekisa ovinimbu vi ku kuatisa oku tanga atambululo Vembimbiliya liove. Olombangi Via Yehova vi sanjukila oku kũlĩhĩsa kumue love oku sanga atambulo kapulilo a lingiwa ndeti.

1. Evĩho lia fetika ndati?

Evĩho voluali lia fetika eci Satana a vangula uhembi watete. Eci ungelo una weya oku linga Satana a lulikiwa ka kuatele ovituwa vĩvi. Eye wa kala ungelo umue walipua pole, noke ‘wa liwekapo oku sumbila ocili.’ (Yoano 8:44) Eye wa yonguile oku fendeliwa ndaño Suku eye lika o sesamẽla efendelo liaco. Satana wa kemba Heva, kuenda wo vetiya oku pokola kokuaye okuti ku Suku hakoko. Adama wa likongela ku Heva koku tomba olonumbi via Suku. Onjila Adama a nõlapo ya nena ohali kuenda olofa.​—Tanga Efetikilo 3:1-6, 17-19.

Satana wa vetiya Heva oku tomba olonumbi via Suku kuenje wa likala uviali Waye. Koloneke vilo, omanu valua va siata oku likongela ku Satana poku likala Suku oku kala ombiali yavo. Satana wa linga “ombiali yoluali lulo.”​—Tanga Yoano 14:30; Esituluilo 12:9.

2. Anga hẽ oviluvo via Suku ka via lipuile?

Omanu lovangelo eci va lulikiwa la Suku va lipuile, kuenda va kuata epondolo lioku pokola kovihandeleko Viaye. (Esinumuĩlo 32:5) Suku wa tu lulika lelianjo lioku nõla oku linga eci ciwa ale ceci cĩvi. Elianjo liaco li tu kuatisa oku lekisa ocisola cetu ku Suku.​—Tanga Tiago 1:13-15; 1 Yoano 5:3.

3. Momo lie Suku a kasi oku ecelela ohali?

Vokuenda kuanyamo alua, Yehova wa siata oku ecelela evĩho lia tunda kusuanji va lingila uviali waye. Momo lie? Wa ci lingila oco a lekise okuti, uviali wosi ka u pokola kokuaye, ka u kuatisa omanu. (Yeremiya 10:23) Ovolandu a lekisa okuti, noke yeci ci soka 6.000 kanyamo, ocitangi caco ca limbukiwa. Momo uviali womanu ka u tẽla oku malako uyaki, ungangala, ekambo liesunga, kuenda ovoveyi.​—Tanga Ukundi 7:29; 8:9; Va Roma 9:17.

Pole, vana va tava okuti Suku eye Ombiali yavo, va kuatisiwa. (Isaya 48:17, 18) Ndopo Yehova o ka nyõla ovoviali osi omanu. Pole, vana va nõlapo oku vialiwa la Suku, va ka kala otembo ka yi pui palo posi.​—Isaya 2:3, 4; 11:9; tanga Daniele 2:44.

4. Epandi lia Suku li tu ĩha epuluvi lipi?

Satana wa linga alundi hati, omanu ka va ka amamako oku pokola ku Yehova. Epandi lia Suku li kasi oku ecelela okuti, vosi yetu tu lekisa nda tua nõlapo uviali wa Suku ale uviali womunu. Omuenyo tu ambata cilo owo u lekisa onjila tua nõla.​—Tanga Yovi 1:8-11; Olosapo 27:11.

5. Tu nõla ndati Suku okuti o kala Ombiali yetu?

Tu nõla Suku oco a kale Ombiali yetu poku kuama efendelo liocili li sangiwa Vembimbiliya. (Yoano 4:23) Yuvula oku litenga vopulitika kuenda vuyaki ndeci Yesu a linga.​—Tanga Yoano 17:14.

Satana lunene waye wa siata oku vetiya omanu oku linga ovina ka via sungulukile. Eci tu yuvula oku linga ovina viaco vamue pokati kakamba vetu va tu popia lãvi, ale va tu lambalala. (1 Petulu 4:3, 4) Omo liaco, tu sukila oku nõla onjila tu kuama. Tu linga hẽ ukamba lomanu va sole Suku? Tu pokola hẽ kovihandeleko viaye viocisola? Nda tua ci linga, tu lekisa okuti, olondaka Satana a popia hati lomue o pokola ku Suku, viuhembi.​—Tanga 1 Va Korindo 6:9, 10; 15:33.

Oco o kuate elomboloko lia suapo liatiamẽla kondaka eyi, tala kocipama 11, velivulu lia sandekiwa Lolombangi Via Yehova losapi hati:

[Elitalatu kemẽla 16]

Adama wa nõla onjia yĩvi

[Elitalatu kemẽla 17]

Onjila tu nõla oyo yi lekisa nda tu yongola okuti Suku o linga Ombiali yetu, ale ka tu yongola