Vakuakutanga Va Pula  . . .

Anga hẽ Akristão vosi vakuekolelo va lavoka oku enda kilu?

▪ Omanu valua va siata oku tanga olondaka via Yesu vi lembeleka a popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” (Yoano 3:16) Anga hẽ olondaka via Yesu vi lekisa okuti afendeli vosi vakuekolelo va Isiaye Yehova Suku, va lavoka oku enda kilu oco va kuate omuenyo ko pui lesanju liocili?

Kũlĩhĩsa olondaka via Yesu wa popia hati: “Lomue wa la londa kilu, te u wa loka kilu, okuti Mõlomanu.” (Yoano 3:13) Olondaka evi vi lekisa okuti, afendeli vakuekolelo kosimbu ndeci: Noha, Avirahama, Mose, kuenda Daviti, ka va endele kilu. (Ovilinga 2:34) Vosi yavo va enda pi? Omanu vaco vakuekolelo, va fa, va kasi vayambo, ka va kũlĩhĩle vali la cimue, kuenda va lavoka epinduko.​—Ukundi 9:5, 6; Ovilinga 24:15.

Embimbiliya li tukula lika Yesu okuti, noke lioku fa kuaye wa enda kilu. Eye wa sapuila ovapostolo vaye hati, o ka va angiliyila ocitumãlo kilu. (Yoano 14:2, 3) Eli lia kala eliangiliyo limue liokaliye komanu va Suku. Upostolo Paulu wa lombolola hati, noke liokufa kua Yesu loku pinduiwila omuenyo wo kilu, ‘wa yuluila olondonge viaye onjila yomuenyo wokaliye,’ okuti lomue ukuetimba liositu wa pitilemo tete.​—Va Heveru 10:19, 20.

Eci hẽ ci lomboloka okuti noke yeliangiliyo liaco, omanu vosi vakuekolelo va lavoka oku enda kilu? Sio hacoko, momo epinduko lioku enda kilu lia eciwa lika komanu vamue. Kuteke wa sulako Yesu a kala kumosi lovapostolo vaye, wa va sapuila hati, ‘va ka tumala kovialo oco va tetuluile’ Vusoma waye kilu. Omo liaco, va tambula ocikele coku viala la Yesu kilu.​—Luka 22:28-30.

Ovapostolo havoko lika va tambula ocikele coku viala kilu pole, kulivo omanu vamue va tambula esumũlũho liaco. Vocinjonde cimue upostolo Yoano a kuata, wa mola Yesu kumue locimunga ca vana va pinduiwila oku enda kilu okuti, va ‘linga olosoma lovitunda oco va viale kilu lieve.’ (Esituluilo 3:21; 5:10) Ndamupi valua pokati kavo va kalapo? Ndeci ca siata oku pita lolombiali viomanu, kua nõliwavo etendelo limue liava va ka viala Vusoma wokilu. Omo liaco, Yesu Kameme ka Suku, o ka viala kumue leci ci soka 144.000 kolombiali ‘via nõliwa pokati komanu.’​—Esituluilo 14:1, 4, 5.

Ocili okuti, etendelo lio 144.000 komanu, litito calua, kuenda ka li sokisiwa lomanu vakuekolelo va kala kosimbu, kuenda vo koloneke vilo. Momo etendelo lio 144.000 komanu, va pinduiwila oku enda kilu oco va ka tẽlise upange u kola va tambula. Nda o yongola oku tunga onjo, anga hẽ o laleka olomesele viosi vi sangiwa vimbo liene? Sio ku ci lingi. Pole, o laleka lika olomesele o sukila kupange waco. Cimuamue haico ci pita lomanu vakuekole okuti, havosiko va nõliwa la Suku oco va kuate esumũlũho limuamue lioku viala la Kristu kilu.

Olombiali viaco, vi ka tẽlisa onjongole Suku a kuatele eci a lulika omanu. Yesu kumue leci ci soka 144.000 komanu a ka viala lavo, va ka songuila upange woku pongolola ongongo oco yi linge oluali luokaliye, muna omanu valua vakuekolelo va ka kala lesanju otembo ka yi pui. (Isaya 45:18; Esituluilo 21:3, 4) Pokati komanu vaco palivo vana va kasi vovisimĩlo via Suku okuti va ka pinduiwa.​—Yoano 5:28, 29.

Afendeli vosi va Yehova​—vo kosimbu, kuenda vo koloneke vilo, va pondola oku tambula ombanjaile yomuenyo ko pui. (Va Roma 6:23) Omo liaco, etendelo liomanu vamue, va ka kuata omuenyo kilu, pole, onepa yalua yomanu va ka tambula omuenyo voluali luokaliye palo posi.