APULILO EMBIMBILIYA A TAMBULUIWA
Helie enda kilu, kuenda momo lie?
Omanu valua va yongola oku enda kilu noke yoku fa. Yesu wa popia hati, ovapostolo vaye vakuekolelo, va ka kala kilu. Osimbu ka file, wa likuminyile oku va pongiyila ocitumãlo oco va kaile kumosi la Isiaye kilu.—Tanga Yoano 14:2.
Momo lie omanu vamue palo posi va ka pindukila oco va enda kilu? Nye va ka linga? Yesu wa sapuilile ovapostolo vaye okuti, va ka linga olosoma. Ovo va ka viala ongongo.—Tanga Luka 22:28-30; Esituluilo 5:10.
Anga hẽ, omanu vosi vawa va enda kilu?
Kolofeka vialua, kuli lika etendelo litito liomanu li viala. Omo okuti Yesu o pindula omanu oco va ende kilu loku viala ongongo, tu lavoka okuti etendelo liomanu vaco va nõliwa litito. (Luka 12:32) Embimbiliya li tukula etendelo liomanu va ka viala la Yesu.—Tanga Esituluilo 14:1.
Yesu wa pongiyila olondonge viaye ovitumãlo kilu. Ove hẽ wa kũlĩha eci va ka lingako?
Vana va enda kilu, havoko lika va ka sumũluisiwa. Vana va nõlapo oku pokola Kusoma wa Yesu, va ka kuata omuenyo ko pui voluali luokaliye palo posi. (Yoano 3:16) Vamue va ka iñila lomuenyo vofeka yelau poku puluka kenyõleho lioluali lulo lua vĩha. Vakuavo va ka iñilamo poku pinduiwa.—Tanga Osamo 37:29; Yoano 5:28, 29.