Lilongisila Kondaka Ya Suku

Vana va fa va Kuete hẽ Elavoko?

Ocipama cilo, ceca atambulula kapulilo amue okuti, pamue wa va lingile ale, kuenda ci lekisa ovinimbu vi ku kuatisa oku tanga atambululo Vembimbiliya liove. Olombangi Via Yehova vi sanjukila oku eca atambulo kokuove kapulilo a lingiwa ndeti.

1. Elavoko lipi vana va fa va kuete?

Eci Yesu a endele ko Betania ocipepi lo Yerusalãi, wa sanga okuti, tunde eci ekamba liaye Lasaru a fa, pa pita ale oloneke vikuãla. Kuenje, Yesu wa endele peleva liaco la Marta kuenda Maria, va manji ya Lasaru. Noke, kueya owiñi walua. O pondola hẽ oku sokolola esanju Marta la Maria va yeva eci Yesu a pindula Lasaru kolofa?​—Tanga Yoano 11:20-24, 38-44.

Marta wa kuatele elavoko liokuti, vana va fa va ka pinduiwa. Afendeli va Yehova vakuekolelo, va kũlĩha okuti, kovaso yoloneke, Suku o ka pindula omanu oco va kale vali voluali palo posi.—Tanga Yovi 14:14, 15.

2. Lipi ekalo liava va fa?

Ndaño okuti ongusu yomuenyo, ale ‘espiritu’ yi kuatisa omanu lovinyama oku kala lomuenyo, pole vetimba lietu ka muli ocilelembia ka ci fi. (Ukundi 3:19; Efetikilo 7:21, 22) Etu tua lulikiwa loneketela. (Efetikilo 2:7; 3:19) Eci owoño wetu u liwekapo oku talavaya, ka tu tẽla vali oku sokolola cimue. Lasaru noke yoku pinduiwa, ka lomboluile ulandu la umue a pita lawo osimbu a kala veleva, momo vana va fa, lacimue va kũlĩha.​—Tanga Osamo 146:4; Ukundi 9:5, 10.

Ocili okuti, vana va fa ka va tali ohali. Elongiso liokuti, Suku o talisa ohali omanu noke yoku fa, liuhembi. Li sepula Suku. Ocisimĩlo coku yoka omanu vondalu ka yimi, ci sumuisa Suku.​—Tanga Yeremiya 7:31.

3. Tu pondola hẽ oku sapela lava va fa?

Ava va fa ka va pondola oku sapela letu. (Osamo 115:17) Pole, ovangelo vãvi poku sapela lomanu, va likembisa oku kala ocilelembia comunu wa fa. (2 Pet. 2:4) Yehova wa handeleka oco afendeli vaye va yuvule oku sapela lomanu va fa.​—Tanga Esinumuĩlo 18:10, 11.

4. Helie o ka pinduiwa?

Voluali luokaliya tu lavoka, omanu valua va fa, va ka pinduiwa. Ndaño muẽle vana va linga ovina vĩvi omo okuti ka va kũlĩhĩle Yehova, va ka pinduiwavo.​—Tanga Luka 23:43; Ovilinga 24:15.

Omanu vosi va ka pinduiwa va ka lilongisa ocili catiamẽla ku Suku, kuenda oku lekisa ekolelo ku Yesu, poku pokola kokuaye. (Esituluilo 20:11-13) Omanu vana va ka pinduiwa, nda va linga ovina viwa, va ka kuata omuenyo ko pui voluali luokaliye palo posi. Pole, omanu vamue va ka pinduiwa, va ka amamako oku linga eci cĩvi. Omo okuti va ka amamako lovituwa viaco, ‘epinduko liavo li ka kala liekanga.’​—Tanga Yoano 5:28, 29.

5. Epinduko liava va fa li tu longisa nye catiamẽla ku Yehova?

Ku ka kala epinduko, momo Suku wa tuma Omõlaye palo posi oco a tu file. Eliangiliyo liaco, li situlula ocisola Yehova a tu kuetele.​—Tanga Yoano 3:16; Va Roma 6:23.

Oco okuate elomboloko lia suapo, tala kocipama 6, kuenda 7, velivulu lia sandekiwa Lolombangi Via Yehova losapi hati:

EMBIMBILIYA LI Longisa NYE?

[Elitalatu kemẽla 26]

Adama wa lulikiwa loneketela