Ukanda Umue wa Tunda ko Madasgaskar

Ca Kala Ndocisikilo Cimue Ciwa

AME lulume wange tua tumiwa kocifuka co Madagaskar, omo liocikele cokaliye cupange wumisionaliu tua tambula. Poku liusika lepata lietu kuenda akamba, tua lila, pole tua pamisiwa poku kolela okuti, Yehova wa tu ĩha ocikele tu sesamẽla, kuenda o ka tu kuatisa oku ci tẽlisa.

Lalimue eteke tu ivala ohongele yetu yatete vekongelo tua sikĩla. Manji wa songola elilongiso Liutala Wondavululi, kokuetu wa kala nda umue o songuila ocisoko colonjimbi. Omo okuti ka tua kuatele elomboloko lielimi li vanguiwa, olondaka va popia, via kala ndocisungo cimue ca posoka. Tua pita otembo yalua oco tu kuate elomboloko liovina via enda oku popiwa.

Onjanja yatete nda kuata elomboloko liepulilo manji a vokiyako, nda tambululula lolukandi ndaño sia kuatele elomboloko lia suapo lietambululo nda eca. Vana va tumala ponele yange va yeva etambululo liaco, noke nda sitika komela wange lovaka. Ndaño vepuluvi liaco nda kuata osõi, pole, nda yonguile oku kuata elomboloko lieci nda popia!

Ndaño okuti nda sukilile oku lekisa ongangu yiwa yoku kuatisa vakuetu kupange woku kunda, pole ame nda kuatisiwa. Locisola calua, va manji va ndi longisa ndomo ndi fetika ombangulo ya leluka kupange woku kunda. Kuenje, va ndi longisa ovina ndi sukila oku popia kuenda oku talavaya Lembimbiliya.

Ndi ivaluka okuti eteke limue kupange woku kunda omõla umue wa kaluka hati: “Vazaha! Vazaha!” Olondaka evi kelimi liavo lio Malgaxe, vi lomboloka “ocingendeleyi.” Tua kuata usumba kuenda tua yonguile okuti, ka ku moleha vali omõla ukuavo o pitulula olondaka viaco. Noke umalẽhe ukuavo wa pisa una wa popia olondaka viaco. Kuenje wo sapuila hati: “Eye hacingendeleyiko, momo o vangula elimi lietu!” Manji nda kala laye kupange woku kunda, wa ndi lomboluila ovina ovo va popia, momo olondaka viaco va vi vangula lonjanga, kuenda sia kuatele elomboloko liaco. Ndaño locitangi caco, pole nda yeva esanju poku limbuka okuti elimi liaco li kasi oku ndi lomboloka. Vokuenda kuotembo nda fetika oku sola ofeka yo Madagaskar.

Olonjanja vimue eci nda yeva esumuo, nda lembelekiwa lamalẽhe vamue va enda oku ndi nyula. Nda limbuka esanju liavo, ndaño sia tẽlele oku sapela lavo. Amalẽhe va kasi vekongelo, esumũlũho lia tunda ku Yehova. Manji umue ufeko o tukuiwa hati Hasina, wa kala kapitiya kange. Eci ndi limbuka okuti lomue o kuete elomboloko liovina ndi popia, eye o pitiya ondaka yaco. Poku sapela lakamba vange vekongelo, eye waendavo oku ndi kuatisa oku pitiya olondaka viaco.

Ame lulume wange, tua kala vekongelo limue lia sukilile oku tepiwa pokati, oco ku sokiyiwe likuavo liokaliye. Omo okuti olondonge vimue via kala vekongelo liokaliye, nda vi eca ku vamanji va vatiamẽla kocikanjo caco oco vi amameko lelilongiso liavo Liembimbiliya. Manji umue wa ndi vetiya oco nda amameko oku longisa umue pokati kolondonge viaco. Omo okuti sia tẽlele oku vangula ciwa elimi liaco, nda kuata usumba, momo nda simĩle okuti, si pondola oku longisa ondonge yaco. Pole, eye wa ndi vetiya oku amamako lelilongiso liaco. Kuenje, wa ndi sapuila hati lekuatiso lia Yehova ndi ka tẽla oku ci linga. Lolondaka vimue vi lembeleka haivio vi teta onimbu, wa ndi sapuila hati, ndopo ndi ka tẽla oku longisa ciwa omanu lonjila yimue okuti, va kuata elomboloko liwa. Olondaka viaco via ndi lembeleka calua.

Noke, ondonge yaco ya amamako oku kula kespiritu. Eteke limue eci nda kala posamua, nda yeva umue wa ndi viliya konduko. Omo okuti ukãi waco lulume waye va kala ño pamosi pole ka va tokekisile olohuela, va kala oku linga eliangiliyo lioku ci linga. Ulume wukãi waco wa fetika oku lilongisa Embimbiliya, kuenda va kuete ovimaho vialua viespiritu oku kongelamo epapatiso. Ulandu wavo wa ndi nenela esanju lialua ndaño nda kũlĩha okuti Yehova eye o kokela omanu kokuaye.

Kofeka yaco tua lilongisa ovina vialua. Ndaño tu kuete ongeva lakamba, kuenda epata lietu, pole, tu kasi ndu okuti tua tunga lavo ocipepi. Olonjanja vimue tua siata oku sapela ovina viatiamẽla kokuavo, kuenda akamba vaco va siatavo oku pula ndomo va kasi. Omo liaco, tu lavoka otembo eci vana va kasi “ndepata” lietu kulo ko Madagaskar tu ka lisanga lepata tua sia kofeka yetu.

Ndaño okuti toke cilo eci omanu va vangula olondaka viavo vi kasi “ndovisikilo,” pole, olondaka viaco via ndi lomboloka. Ndi lavoka otembo ndi ka tẽla oku vangula ciwa elimi liaco, ndeci nda siata oku yeva olondaka viomanu vi kasi ndovisikilo. Yesu wa popia hati: “Ko ka kali lohele ya hẽla momo hẽla yi kala lohele yalio. Ohali yeteke liongongo yi tẽla eteke liaco.” (Mateo 6:34) Tu kasi oku amamako oku lilongisa “etosi” limosi, ale ondaka yimosi veteke. Omo liaco, cilo ndi kasi oku mioñolola ocituwa cange coku yevelela, kuenda oku sokolola lutate, oco ndi tẽle oku vangula ciwa elimi liaco, ndomo vamanji kulo ko Madagaskar va siata oku vangula.

[Elitalatu kemẽla 25]

Kupange woku kunda la manji Hasina