Nda Yonguile Oku Kũlĩha Ovitumãlo Vialua
Ulandu wa Lomboluiwa la Zoya Dimitrova
Eci nda kuata 15 kanyamo, nda tẽlisa onjongole yange yoku li tumbika kolomapalo vioku pindisa etimba vocila. Keteke 4 kosãi Yenyenye Linene yunyamo wo 1970, nda pita locilunga cimue cinene. Eci tua kala oku linga omapalo yaco, ukuetu wa njimba vilu, poku ndi yakela nda pusumuha peka liaye, kuenje nda kupukila posi.
N DA citiwa keteke 16 yosãi ya Cembanima, kunyamo wo 1952, kuenda nda kala lolonjali viange kumue la vamanjange volupale luo Sofia, kofeka yo Bulgaria. Otembo yaco, ofeka yo Bulgaria ya kala vuviali wo Komunismu okuti, ombiali ya enda oku vetiya omanu oco ka va ka tave ketavo, pole ya enda oku ecelela okuti, ku kala etavo. Onepa yalua yomanu ka va tavele ku Suku, pole, vana va tavele va enda oku ci lingila vuyombeki. Ndaño epata liange lia kala vetavo lio Ortodoxa, sia la tiamela ketavo tunde vutila, kuenda sia tavele okuti kuli Suku.
Eci nda kala omõla, nda yonguile oku panga onepa kolomapalo viosi, ca piãla enene vioku pokuisa etimba. Eci nda tẽlisa 13 kanyamo, kosikola yetu kueyile ulume wa kala oku sandiliya ufeko umue oco a tiamẽle kocisoko coku pindisa etimba vocila colomapalo. Ulongisi wo kosikola yetu wa tava oku ndi sonehisa kocisoko caco. Kuenje, nda kuata esanju lialua omo lioku endela vekãlu limue lia kemãla lio ko Amerika lia endisiwa lulume waco oco ndi ka pulisiwe, loku pindisiwa locimunga calongisi vaco. Nda kuata esanju lialua omo lioku nõliwa oku panga onepa kocimunga caco. Oco ndi tẽlise ocimaho caco, nda tambula epindiso lialua vokuenda kueci ci pitahãla anyamo avali. Epindiso liange lia malusuiwa eci nda kuata 15 kanyamo, kuenje nda fetika omuenyo umue uwa woku pindisa etimba vocila colomapalo. Poku fetika lomuenyo waco, nda linga ovongende alua vofeka yo Bulgaria kuenda kolofeka vikuavo via pangele onepa ko União Sovietika oku kongelamo ofeka yo Argelia, yo Hungria kuenda olofeka vina okuti kosimbu via pangele onepa ko Yugoslavia.
Nda kuata omuenyo umue wesanju vokuenda kuanyamo atatu. Osimbu tua kala oku linga omapalo yoku pokuisa etimba volupale luo Titov Veles ko Makedonia, nda pita locilunga ca tukuiwa kefetikilo liocipama cilo. Poku linga omapalo yaco, ukuetu wa njimba vilu, osimbu nda kala oku kupuka, wa ndi yakela. Pole, eci nda pusumuha peka liaye ukolo woku liteyuila wa tepa, kuenje poku kupukila posi, nda tiñuluha ocinãla ci soka 6 kolometulu. Eci va ndi tuala lonjanga kosipitali, olondotolo via limbuka okuti, nda teka okuokuo, olomati vimue, kuenda oluongo. Nda ambuka vokuenda kuoloneke vimue okuti sia tẽlele oku vangula, kuenda sia limbukile ocilunga nda pita laco. Eci nda fetika oku kaya, nda limbuka okuti, si pondola vali oku enda. Omo okuti nda kala umalẽhe, nda kuata elavoko liokuti, noke yoku siulĩwa lolondotolo ale oku pelaliwa, ndi ka panga vali onepa kocisoko colomapalo vioku pokuisa etimba.
Nda pita anyamo avali lolosãi epandu oku sakuiwa kosipitali, lelavoko liokuti ndi kaya. Pole, onjongole yange yoku linga olomapalo viaco ya pitila kesulilo. “Momo onjongole yange yoku kũlĩha ovitumãlo vialua,” ka ya tẽlisiwile, kuenje, nda fetika oku endela komangu yalola.
Nda Fetika Omuenyo Wokaliye
Nda simĩle okuti si pondola oku li yaka locitangi nda pita laco omo liekalo liwa nda kuatele. Nda li yaka lesumuo lialua omo lioku pua elavoko. Kunyamo wo 1977, umalẽhe umue ukuenje o tukuiwa hati Stoyan, wa totola kepito liange. Eci nda limbuka okuti ukuenje waco wa lilongisila kosikola yimuamue la kota liange, ndo laleka oku iñila vonjo. Vokuenda kuombangulo tua kuata, wa ndi pula nda ndi kuete elavoko lioku kaya. Omo liesumuo nda kuata, ndo tambulula okuti, si kuete elavoko liaco. Eci a ndi sapuila okuti Suku eye lika o pondola oku ndi kuatisa, ndo tambulula ndoco. “Nda kuli Suku, momo lie ndi liyakela locitangi caco?”
Vombangulo nda kuata la Stoyan, una wa linga Ombangi ya Yehova osimbu a kala oku talavaya kupange wolomapalo vioku pokuisa etimba ko Estados Unidos, wa ndi lomboluila ohuminyo yi komohisa yekalo liwa kovaso yoloneke yi sangiwa Vembimbiliya. Nda yeva esanju lialua poku lilongisa okuti, ongongo yi ka linga oluali luokaliye. Ohuminyo yokuti ‘okufa ka ku ka kalako vali, ndaño oku lila loku liyula lupongo laviovo ka vi ka kalako vali,’ ya ndi lembeleka calua. (Esituluilo 21:4) Nda yonguile oku kuata uhayele uwa! Noke, nda tava lonjanga oku lilongisa Embimbiliya olonjanja viosi. Kuenje, nda fetika omuenyo wokaliye. Omo liaco, nda sanga elavoko liocili!
Olosemana viosi ndaenda oku kevelela eteke lioku lilongisa Embimbiliya. Tete nda lilongisa la manji Stoyan, noke nda lilongisa la Totka, una wa lekisa ocisola calua kokuange. Lekuatiso liaye, ukũlĩhĩso wange Wembimbiliya wa livokiya lonjanga, kuenje nda tumbika omuenyo wange ku Yehova Suku. Omo okuti volupale luo Sofia ka mua kale manji o pondola oku ndi papatisa, nda kevelela manji umue wa tu nyula wa tunda ko Makedonia. Keteke 11, kosãi Yenyenye Linene, yunyamo wo 1978, okuti, otembo yaco papita unyamo umosi tunde eci nda fetika oku lilongisa Embimbiliya, nda papatisiwa pombasiya yimue yinene vonjo yange. Eci nda linga Ombangi ya Yehova noke yoku papatisiwa, nda yeva esanju lialua, kuenje nda fetika oku kuata ocimãho komuenyo wange.
Ocili Cembimbiliya nda lilongisa, ca kala ndondalu vutima wange. Nda fetika oku kundila omanu vosi veya konjo yange catiamẽla kelavoko liange liokaliye. Pole, lomue wa kapeleko ovina ndaenda oku va sapuila, momo va simĩle okuti, nda linga eyui omo liocilunga nda pita laco.
Ocitangi Cimue Cinene
Vokuenda kuotembo, Olombangi Via Yehova via tatekiwa oku kundila vofeka yo Bulgaria, kuenje, mua kala etendelo litito Liolombangi Via Yehova. Ka kua kalele olohongele kuna nda sukilile oku enda, oco ndi pamise ekolelo liange poku li sanga la vamanji. Ekambo lioku endaenda kolohongele, lia ndi honguisa, kuenje nda linga ukamba la vana ka va pokola kolonumbi Viembimbiliya, kuenje, nda linga ekandu limue linene.
Nda sumuile calua, kuenda nda yeva evalo vutima omo lioku tepa ukamba wange la Yehova Suku. Esumuo liaco losõi, via ndi vetiya oku likutilila ku Yehova loku situlula ovina via kala vutima wange, kuenda oku pinga ongecelo. Lekuatiso liakulu vekongelo, nda tumbulula ukamba wange la Yehova, kuenda esanju liange lioku u vumba. Hesanjukuolio ndi kuete poku vumba Yehova lutima wayela, kuenda oku kala vocisoko caye!
Nda Sanjuka Ndaño Lovitangi
Tunde eci nda pita locilunga ca pongolola ekalo liomuenyo wange uwa kuenda oku linga ovongende, pa pita ale 40 kanyamo. Cilo, ndendela komangu yalola. Pole, sia sumuile omo liovitangi nda pita lavio, loku sima okuti, omuenyo ka u kuete esilivilo. Elilongiso Liembimbiliya lia ndi kuatisa oku limbuka okuti, omuenyo uwa nda kuata koku linga olomapalo vioku pindisa etimba vocila, wa piñanyiwa lovina vitito vi kuete esilivilo liotembo ka yi pui. Nda limbuka ndomo vakuetu tua enda oku lingila kumosi olomapalo vioku pindisa etimba vocila, va siata oku liyaka lovitangi vialua komuenyo wavo. Handi vali, nda sanga ukuasi wavelapo woku kuata ukamba la Yehova Suku, Ululiki wange. Ukamba waco wa ndi nenela esanju lialua okuti, ka li sokisiwa lomuenyo nda kuata kolomapalo vioku pindisa etimba vocila.
Nda kuatavo esanju poku tala omanu valua va kuete ukũlĩhĩso Wembimbiliya, kuenda va tumbika omuenyo wavo ku Yehova, Suku yocisola. Eci nda fetika oku lilongisa Embimbiliya kunyamo wo 1977, vofeka yo Bulgaria ka mua kalele Olombangi vialua Via Yehova. Kunyamo wo 1991, eci Olombangi Via Yehova via tambula elianjo liefendelo noke yesulilo liuviali wo Komunismu, vofeka yosi ka mua kalele ci pitahãla ocita Colombangi Via Yehova. Hesanjukuolio ndi kuete poku limbuka okuti, cilo vofeka muli 1.800 kakundi Vusoma!
Ko Bulgaria kuli handi upange walua woku kunda. Momo kuli omanu valua va kasi oku sandiliya ukũlĩhĩso Wondaka ya Suku. Uvangi waco tu u limbukila kueci ci soka 3.914 komanu va kala Konjivaluko yolofa via Kristu kunyamo wo 2010. Nda sanjuka calua poku mola ndomo Yehova a kasi oku sumũlũisa upange woku kunda ko Bulgaria. Cilo ndi lete oku tẽlisiwa kuolondaka vielivulu lia Isaya 60:22, li popia hati, ‘utito’ o linga “ofeka ya pama.”
Esanju liange lia li vokiya eci kua sandekiwa o Tradução do Novo Mundo das Escrituras Sagradas kelimi lio Búlgaro. Embimbiliya liaco lia sandekiwa kohongele yofeka losapi hati: “Lavululi!,” ya lingiwila volupale luo Sofia kosãi Yenyenye, kunyamo wo 2009: Oku sandekiwa Kuembimbiliya liaco kelimi liange, ca kala ndoku tẽlisiwa kuonjoi! Embimbiliya liaco, li ka kuatisa omanu valua oku kũlĩha ocili Cembimbiliya ko Bulgaria.
Ndaño ulema wange u ndi tateka oku pesila otembo yalua kupange woku kunda olondaka viwa Viusoma wa Suku, pole, nda sanjuka calua poku longisa Embimbiliya komanu va kasi posongo yetu, kuenda vana veya konjo yange. Eteke limue, osimbu umue ndi lisungue laye posongo yetu a kala oku pita, ndo vilikiya oco eye putala wange walivulu. Eye wa tava kelaleko liange kuenje, noke yoku sapela catiamẽla katosi amue Embimbiliya, wa tava oku lilongisa Embimbiliya. Nda kuata esanju lialua eci a papatisiwa kuenje, wa linga manjange kespiritu. Nda kuatavo esanju lialua omo lioku kuatisa omanu vakuãla oku tumbika omuenyo wavo ku Yehova.
Esanju kuenda elembeleko liange li tunda koku endaenda kolohongele olonjanja viosi, poku likongela leci ci pitahãla ocita ca vamanji vana va linga ndepata liange. Nda li yaka locitangi coku endaenda kolohongele, momo vofeka yetu ka muli eliangiliyo lioviendelo vioku ambata vana va kuka kuenda ava va vela. Pole, ndeca olopandu ku manji umue ukuenje omo liekuatiso nda tambula kokuaye. Olonjanja viosi tu kuete ohongele, eye wa enda oku njupa konjo lekãlu liaye toke Vonjango Yusoma, noke o ndi tuala vali konjo. Ndi pandula Yehova omo lioku panga onepa kocisoko caye!
Poku sokolola ovitangi nda liyaka lavio, nda limbuka okuti, omuenyo wange cilo wa litepa lowu nda yonguile oku ambata eci nda kala umalẽhe. Oku vumba Yehova kua ndi nenela esanju lialua cilo, kuenda elavoko li komohisa. Nda kolela kohuminyo ya Suku yoku nena oluali luokaliye palo posi eci “ocilema ci [ka] somboka ndosonge.” (Isaya 35:6) Ndi lavoka otembo eci ndi ka siapo omangu yalola, okuti ndi ka kuata uhayele wa lipua, kuenda ongusu.
[Etosi lia velapo kemẽla 20]
“Esanju kuenda elembeleko liange li tunda koku endaenda kolohongele olonjanja viosi”
[Etosi lia velapo kemẽla 21]
“Esanju liange komuenyo lia li vokiya eci kua sandekiwa o Tradução do Novo Mundo das Escrituras Sagradas kelimi lio Búlgaro”
[Elitalatu kemẽla 19]
Nda fetika olomapalo vioku pindisa etimba eci nda kuata 15 kanyamo