Upange Ulikasi Woku Eca Uvangi Ko Bulgaria Wa Kuata Onima Yiwa
“Okungula kua lua puãi olondingupange viñamiñami. Pingi ku Cime cokungula oco a tume olondingupange koku ungula kuaye.”—Mat. 9:37, 38.
OLONDAKA evi via Yesu vi likuata locitangi ci kasi kofeka yo Bulgaria yina yi sangiwa kutakelo wo ko Europa! Kofeka yaco kuli esukila linene liolonalavayi oco va kundile olondaka viwa kueci ci pitahãla epanduvali kolohuluwa komanu. Ndaño okuti ko Bulgaria kuli eci ci soka 1.700 ka kundi, ovo handi ka va tokekele ocikanjo cavo cosi. Omo liaco, kunyamo wo 2009, Osungu Yolombangi Via Yehova ya linga esokiyo lioku laleka Olombangi via Yehova vi sangiwa kolofeka vikuavo vio ko Europa haivio vi vangula elimi lio ko Bulgaria oco vi ende oku ka kuatisa kupange woku eca uvangi. Upange waco wa sokiyiwile vokuenda kuolosemana epanduvali pokuenye, noke Yohongele Yofeka ya lingiwa kolupale luo Sofia keteke 14 toke 16 Yenyenye wo 2009.
Va Tava Kelaleko Liaco
Vamanji vo kofiliale yo ko Sofia va sanjukila ndomo vamanji vo ko França, vo ko Alemanya, vo ko Helasi, vo ko Italia, lo ko Polônia kuenda ko Espanya va tava kelaleko liaco. Voku ci linga mua kongelele oku feta opasasi yavo loku pesela oloneke vimue viepuyuko kupange oco va ende oku ka kundila ko Bulgaria. Ca tu sanjuisa calua oku mola okuti eci ci soka 292 komanu va linga epingilo lioku iya kofeka yetu! Omo okuti valua va lieca olumue, kua lingiwa esokiyo liokuti olondingupange viaco via ilikiwa oku ka talavaya kalupale atatu o ko Bulgaria ndeci: Ko Kazanlak, Sandanski, kuenda ko Silistra. Mitavaso ukuakunyula akongelo ko Bulgaria wa laleka akundi votembo yosi kuenda akundi vakuavo vo pocitumãlo oku kuatisa kupange ulikasi. Ci soka 382 kolondingupange va lieca olumue koku ka kunda vovikanjo vina okuti ka va la tambula uvangi wolondaka viwa.
Vamanji va tunda kakongelo ocipepi va tumiwa oku angiliya ovitumãlo vioku yekisa akombe. Ovo va sanda olonjo vioku fetela kuenda olohondo kolowotele vina okuti ondando yavio ya leluka. Vamanji vaco va talavaya calua koku yekisa akombe kuenda oku tata asukila avo. Valupale aco atatu mua sukilile ovitumãlo vioku fetela oco va lingilemo olohongele. Kua lingiwa esokiyo liokuti olohongele viekongelo vi endisiwa la vamanji akombe. Ci sanjuisa calua oku mola okuti kovitumãlo kuna ka kua kaile Ombangi layimue ya Yehova, cilo kuli 50 kakundi va liongoluila oku sivaya Yehova kolohongele.
Ombili vamanji va tunda kolofeka vikuavo va lekisa, yi komohisa calua. Momo ko Bulgaria pokuenye ku linga ombambi yalua (-40°C). Ocitangi caco, ka ca tatekele ombili ya vamanji. Kolupale luo Silistra, kuna ku sangiwa Olui Danúbio, haiko kuli eci ci pitahãla 50.000 kolonungi, kua eciwa uvangi volosemana vitatu viatete. Kuenje vamanji va likolisilako oku kundila vovaimbo akuavo toke eci va pitĩla kimbo lio Tutrakan li sangiwa vocinãla ci soka 55 kolokilometulu, kutakelo luo Silistra. Ovo va enda oku fetika upange woku kunda kelivala lia 9:30 komẽle. Noke yonanya va amamako lupange wavo toke kelivala lia 19:00 koñolõsi. Cimuamue haico ca pita volupale luo Kazanlak kuenda luo Sandanski, okuti omo liombili ya vamanji upange ulikasi woku eca uvangi wa lingiwavo kovaimbo kuenda kalupale akuavo a lisungue lao.
Nye ca Lingiwa?
Vokuenda kuolosemana viaco epanduvali kua lingiwa upange walua woku eca uvangi. Ndeci va sapuilile ovapostolo, olonungi vialupale aco via popiavo vati, ‘Wa yukisi alupale etu lalongiso ene.’ (Ovil. 5:28) Olombangi via Yehova via eca 50.000 violorevista kuenda kua fetikiwa 482 kalilongiso Embimbiliya. Keteke 1 Yenyenye Linene wo 2009 kua tumbikiwa ekongelo liatete vo Silistra, kuenda ovimunga vimue volupale luo Kazanlak lolu luo Sandanski. Oku mola vana va yeva onjanja yatete olondaka viwa eci kua lingiwa upange ulikasi ndomo va kasi oku kula kespiritu, ci sanjuisa calua.
Vosemana yatete yupange ulikasi, manji umue ukãi wa tunda ko Espanya okuti ohundi yilikasi haeye o vangula elimi lio ko Bulgaria, wa kundila Karina ukãi umue wa kala oku landisa ovikanda viasapulo vokololo. Karina wa lekisa onjongole kuenje wa tava oku enda kohongele. Noke wa tava oku lilongisa Embimbiliya. Omo okuti ulume waye wa kala ocimbinde, eye wa pinga oco elilongiso Liembimbiliya li lingiwe vocumbo. Velilongiso liaco mua kongelele omãla vaye vavali vakãi. Kanjendi umue o tukuiwa hati Daniela, wa lekisa onjongole kocili Cembimbiliya. Eye wa tanga elivulu Embimbiliya Li Longisa vokuenda kuosemana yimosi, kuenda wa fetika oku kapako onumbi yoku yuvula efendelo lioviteka. Kuenje wa fetika oku kundila ocili kakamba vaye. Noke yohongele yatete, eci pa pita olosemana vitatu, wa sapuila manji wa kala oku endisa elilongiso liaye hati: “Ndi yongola oku kala umue pokati kene. Nye ndi sukila oku linga oco ndi fetikevo oku kunda?” Daniela kumue la inaye kuenda manjaye ukãi, va kasi oku amamako oku kula kespiritu.
Manji Orlin wo ko Bulgaria, okuti o kasi kofeka yo Italia, weyilevo volupale luo Kazalank oku panga onepa kupange waco ulikasi. Eci a kala oku enda kocitumãlo a sikĩla, noke yoku lembuka kupange woku kunda, manji Orlin wa sapela lamalẽhe vavali va tumalele komangu ya kala vocumbo. Eye wa va ĩha elivulu Embimbiliya Li Longisa, kuenda wa sokiya oku linga epasu eteke likuavo. Keteke liepasu, manji Orlin wa fetika oku longisa Embimbiliya ku Svetomir, kuenje oku upisa opo va amamako oku lilongisa eteke leteke. Vokuenda kuoloneke ecea, manji Orlin wa longisa Svetomir ecelãla kolonjanja. Svetomir wa lombolola hati: “Osimbu sia lisangele love, nda likutilila ku Suku oco a ñuatise oku u kũlĩha. Kuenda nda likuminya okuti, nda eye wa ñuatisile oku ci linga, ndi litumbika kokuaye.” Eci manji Orlin a tiukila ko Italia, vamanji vo pocitumãlo va amamako oku lilongisa la Svetomir, kuenje o kasi oku kapako ocili vomuenyo waye.
Vana va Likolisilako va Tambula Asumũlũho
Vana va pesela olombongo viavo loloneke viepuyuko kupange oco va ka kundile kofeka yikuavo va liyeva ndati? Ukulu umue wekongelo wo ko Espanya wa soneha hati: “Upange ulikasi wa pamisa ukamba pokati ka vamanji vo ko Bulgaria lava vo ko Espanya. Eci ca kuatisa calua vamanji va linga onepa kupange waco.” Olohueli vimue vio ko Italia via soneha hati: “Vokuenda kuosãi yaco, tua linga ocina ca velapo vomuenyo wetu!” Ovo vamisako vati: “Upange ulikasi wa pongolola omuenyo wetu! Kuenje cilo, omuenyo wetu wa pongoloka.” Olohueli viaco vi kasi oku sokiya oku ilukila ko Bulgaria oku ka kuatisa kuna kuli esukila linene. Carina, manji umue ukãi ohundi yilikasi ko Espanya wa endelevo oku ka kuatisa kupange ulikasi kolupale luo Silistra. Noke wa siapo upange waye ko Espanya kuenje wa ilukila ko Bulgaria oco a ka kuatise ekongelo liokaliye volupale luaco. Eye wa enda oku soleka otulombongo oco a kale ko Bulgaria unyamo umosi. Manji Carina wa lombolola esunga lieci a ci lingila eci a popia hati: “Nda sanjuka calua omo Yehova a ngecelela oku ilukila ko Bulgaria, kuenda nda kolela okuti ndi ka amamako oku kala kulo otembo yalua. Cilo, ñasi oku longisa omanu vatãlo Embimbiliya, kuenda vatatu pokati kavo va endaenda kolohongele.”
Manji umue ukãi wo ko Italia ndaño okuti wa fetikile oku talavaya kupange wokaliye, kuenda ka tambuile handi oloneke viepuyuko, wa yonguile oku linga onepa kupange ulikasi. Eye wa lekisa utõi poku pinga ku cime caye oco a kale kepuyuko osãi yimosi ndoño okuti ka tambula ofeto, kuenda wa likapeleko okuti nda cime caye ka tavele kepingilo liaye nda wa liwekapo oku talavaya. Ndaño okuti ka ci lavokaile, cime caye wa popia hati: “Ka kuli ocitangi, pole o sukila oku numisa onumbi yocitumãlo o ka kala ko Bulgaria.” Manji ukãi wa limbuka okuti Yehova wa tambulula olohutililo viaye.
Stanislava, umalẽhe umue o kasi kolupale luo Varna ko Bulgaria, ndaño okuti o talavaya kupange umue va feta ciwa, wa pinga oloneke vimue viepuyuko kupange oco a linge onepa kupange ulikasi ko Silistra. Eci a mola esanju liakundi va tunda kolofeka vikuavo, wa lolula asuẽlela. Eye wa fetika oku sokolola eci a kala oku linga lomuenyo waye poku litumbika lika koku sanda ovina violuali. Noke liolosemana vivali wa tiukila konjo, yu wa siapo upange waye, kuenje wa litumbika kupange wakundi votembo yosi. Cilo, eye wa sanjuka calua, omo lioku ivaluka Ululiki waye vumalẽhe.—Uku. 12:1.
Oku lekisa ombili kupange wa Yehova, ci nena asumũlũho alua. Ka kuli ocina ca velapo vali nda haku pesila otembo longusu yetu kupange woku longisa loku kunda olondaka viwa. Anga hẽ o sukila oku linga apongoloko komuenyo oco o vokiye upange wove woku kunda? Citava okuti vofeka yove muli ovitumãlo vialua vi kuete esukila linene liakundi. Ove o pondola hẽ oku ilukila kocitumãlo cimue? Pamue ove wa sokiya oku lilongisa elimi likuavo oco o kuatise omanu va kuete enyona lioku kũlĩha ocili Cembimbiliya. Kolela okuti Yehova o ka sumũlũisa alikolisilo ove oku vokiya upange woku kunda.—Olosap. 10:22.
[Okakasia kemẽla 32]
Eteke Limue Liesanju Lia Piãla
Pokati komanu va tunda kolofeka vikuavo vio Europa va endele oku kuatisa kupange ulikasi ko Bulgaria, onepa yalua ya sokiya oku kala Kohongele Yofeka ya lingiwa volupale luo Sofia losapi hati, “Lavululi!” Vamanji vo pocitumãlo lava va tunda kolofeka viñi viñi va likolisa pokati. Etendelo lieci ci soka 2.039 komanu va pandula lonjolela yalua eci manji Geoffrey Jackson wa tiamẽla Kosungu Yolombangi Via Yehova a sandeka Embimbiliya Tradução do Novo Mundo das Escrituras Sagradas, kelimi lio Bulgaria! Olonjeveleli viosi via kalako Votãlo via lekisa esanju liavo lolopandu vialua. Valua pokati kavo va lolula asuẽlela esanju. Omo Embimbiliya liaco lia pongoluiwa lupopi umue wa leluka, li ka kuatisa vakuavitima via sunguluka oku kũlĩha Yehova.
[Omapa kemẽla 31]
(Tala vorevista omapa yaco)
BULGARIA
Silistra
Kazanlak
Sandanski
SOFIA
[Elitalatu kemẽla page 31]
Kua eciwa uvangi walua vokuenda kuolosemana epandu vali