Embimbiliya Li Pongolola Omuenyo Womanu
NYE ca vetiya umalẽhe umue ufeko wa tundile vetavo a kulila oku tiukilamo vali? Kũlĩhĩsa eci eye a popia.
“Cilo ndi kuete ocimãho ca velapo komuenyo.”
—LISA ANDRÉ
UNYAMO A CITIWA: 1986
KOFEKA A CITIWILA: LUXEMBURGO
ULANDU WOMUENYO: OMÕLA OCISANDUI
OMUENYO WANGE KOSIMBU: Nda kulila ko Bertrange olupale lumue lutito, lua yela, lua kolapo haluo lu kuete ukuasi, lu kasi ocipepi lolupale luo Luxemburgo. Pokati komãla vatãlo, ame ndumalẽhe. Omo okuti olonjali viange Olombangi Via Yehova, via likolisilako oku tu longisa olonumbi viatiamẽla kovituwa Viakristão.
Eci nda kala oku tunda vutila, nda fetika oku kuata atatahãi atiamẽla kalongiso Olombangi Via Yehova. Kefetikilo, sia kapeleko atatahãi aco, pole, vokuenda kuotembo ekolelo liange lia fetika oku tepuluka. Olonjali viange via likolisilako oku ndi songuila vonjila ya sunguluka, pole sia tavele kekuatiso liavo. Ovo ka va kũlĩhĩle okuti nda kuata ukamba lamalẽhe vana okuti ka va kuete esumbilo lasongui vavo. Omo akamba vange va molehele ndu okuti va kuete elianjo, nda yonguilevo oku ambata omuenyo ndowu wavo. Tua enda enda kovipito, loku nyua evi vi koluisa, oku linga ukahonga, kuenda oku nyua olodroga. Nda fetika oku sola oku kala lomanu vaco omo lioku sima okuti ovo va kuete esanju liocili komuenyo.
Ocili okuti, sia kuatele esanju liocili. Omuenyo wange ka wa kuatele vali esilivilo omo lioku kuata ukamba lomanu vaco, kuenda lomue wa kuata ovisimĩlo vikuavo. Pole, nda enda oku sakalala calua omo lievĩho lia kala oku livokiya voluali. Vokuenda kuotembo ndeya oku sumua calua.
NDOMO EMBIMBILIYA LIA PONGOLOLA OMUENYO WANGE: Eteke limue okuti otembo yaco ndi kuete ale 17 kanyamo, nda sumuile calua. Omo okuti sia kuatele esanju, ina yange wa ndi sapuila oco ndi fetike vali oku lilongisa Embimbiliya. Eye wa ndi vetiya oku konomuisa alongiso a sangiwamo kuenda oku nõla nda ndi yongola oku pokola kolonumbi vialio ale sio. Ombangulo tua kuata, ya pongolola ovisimĩlo viange. Kuenje nda tava oku lilongisa vali Embimbiliya la huvange Caroline lulume waye Akif. Ulume waye ka kulile Ndombangi ya Yehova, pole eci a kula wa linga Ombangi ya Yehova. Nda solele calua oku situlula ovisimĩlo viange ku Akif omo liomuenyo ũvi ambatele kosimbu.
Nda kũlĩhĩle okuti ekalo liomuenyo wange ka li litava loku kala Ombangi ya Yehova, pole nda simĩle okuti cosi ndi linga lomuenyo wange lomue o ci kapako. Eci nda fetika oku lilongisa Embimbiliya, nda limbuka okuti ovituwa viange vi sumuisa Yehova. (Osamo 78:40, 41; Olosapo 27:11) Nda limbukavo okuti ovilinga viange via sumuisavo omanu vakuavo.
Osimbu nda kala oku konomuisa ciwa Embimbiliya, nda limbuka esunga lioku kolela okuti olio Ondaka ya Suku. Nda lilongisa ovitumasuku vialua Viembimbiliya vieya oku tẽlisiwa muẽle ocili. Ukũlĩhĩso waco wa ndi kuatisa oku malako atatahãi nda kuatele tete.
Eci papita unyamo tunde eci nda fetika oku lilongisa Embimbiliya, ame kuenda olonjali viange tua ka nyulile huvange ulume wa kala oku talavaya ko Betele Yolombangi via Yehova ko Alemanya. Eci nda mola esanju lia huvange, ca ndi vetiya calua. Esanju liaco olio nda kala oku sandiliya! Nda solavo calua oku mola Olombangi vikuavo via Yehova via kala oku talavaya kocitumãlo caco. Ovo va litepele lakamba vange vana okuti omuenyo wavo uhembi lika loku lisanjuisa ovo muẽle. Noke, nda likutilila ku Yehova lutima wosi, loku likuminya oku u vumba otembo yosi yomuenyo wange. Eci nda kuata 19 kanyamo, nda litumbika ku Yehova poku papatisiwa.
NDOMO NDA KUATISIWA: Cilo ndi kuete ocimãho ca velapo komuenyo. Oku longisa vakuetu Embimbiliya, loku va kuatisa oku lilongisa ovina viatiamẽla ku Yehova kuenda kolohuminyo viaye, ca siata oku ndi nenela esanju lialua. Epata liange lia kuatisiwavo, momo cilo ka va sakalala vali lekalo liomuenyo wange.
Ndi ivaluka ovina vĩvi nda lingaile kosimbu, pole, ndi likolisilako oku vi ivala. Ndi tiamisila utima kongecelo ya Yehova, kuenda kocisola a ndi kuetele. Ndi tava lutima wosi kolondaka vi sangiwa kelivulu Liolosapo 10:22, vi popia hati: “Esumũluho lia Yehova li muisa ukuasi, hailio ka li vokiya vali ohali.”
[Elomboluilo lielitalatu kemẽla 10]
“Tua enda enda kovipito, loku nyua evi vi koluisa, oku linga ukahonga, kuenda oku nyua olodroga”
[Elomboluilo lielitalatu kemẽla 11]
“Ndi ivaluka ovina vĩvi nda lingaile kosimbu, pole, ndi likolisilako oku vi ivala”