Kolela Yehova Suku, ‘Ukuakulembeleka Kovina Viosi’
“Suku, Isia ya Ñala yetu Yesu Kristu, a sivayiwe! Eye Isia yohenda, haeye Suku ukuakulembeleka pokati kovina viosi.”—2 VA KOR. 1:3.
1. Omanu vosi, omãla lakulu, va sukila nye?
TUNDE eteke tua citiwa, tu kuete onjongole yoku lembelekiwa. Nda oñaña yi lila, ci tu kuatisa oku limbuka okuti, tu sukila oku yi lela. Citava okuti pamue yi yongola oku angatiwa ale yi yongola oku lia. Eci tu linga akulu, tu sukila elembeleko olonjanja vimue. Ca piãla enene poku liyaka lovitangi.
2. Ohuminyo yipi Yehova a eca komanu vana vo kolela?
2 Citava okuti, tu lembelekiwa la vakuepata kuenda akamba vetu. Pole, kuli ovitangi vimue vi tu kokela ohali okuti, omanu ka va tẽla oku vi tetulula. Suku eye lika o pondola o tu lembeleka kovina viosi tu liyaka lavio. Ondaka yaye yi tu sapuila ndoco: “Yehova o kasi ocipepi la vosi vo vilikiya, . . . O yeva uteto wavo.” (Osa. 145:18, 19) Ocili okuti, “ovaso a Yehova a vanja vakuesunga, o vonguila ovatũi aye kevilikiyo liavo.” (Osa. 34:15) Omo liaco, nda tu yongola oku tambula ekuatiso lelembeleko lia Suku, tu sukila oku kolela kokuaye. Ukualosamo Daviti wa lekisa uvangi waco poku imba ocisungo ndoco: “Yehova ocikolo cava va fukĩlisua, ocikolo kotembo yohali. Ava va kũlĩha onduko yove va ku kolela. Momo ove, a Yehova, [ku yanduluka] ava va ku [sandiliya].”—Osa. 9:9, 10.
3. Yesu wa lekisa ndati okuti Yehova o sole afendeli Vaye?
3 Yehova wa kapako calua afendeli vaye. Yesu wa lekisa uvangi waco poku popia hati: “Olongungu vitãlo hẽ, ka vi landisua olosendu vivali? Kuenje layimue yavio yi ivaliwa kovaso a Suku. Puãi ndaño esinga liovovitue viene lia tendiwa liosi. Ko ka kali lusumba. Ene wa velipo okuti olongungu via lua vi sule.” (Luka 12:6, 7) Yehova wa sapuila omanu Vaye, vonduko yuprofeto Yeremiya, hati: “Nda ku sola locisola ka ci pui, oco nda tongekela love lovilinga viocisola.”—Yer. 31:3.
4. Momo lie tu sukilila oku kolela kolohuminyo via Yehova?
4 Oku kolela Yehova kuenda koku tẽlisiwa kuolohuminyo viaye, ci tu lembeleka kotembo yohali. Tu pondola oku kuata ekolelo ndeli lia Yehosua wa popia hati: ‘Polondaka viosi viwa Yehova Suku yene o sapuili, layimue ya kambapo. Viosi muẽle via tẽlisiwa. Layimue ya kambapo.’ (Yeh. 23:14) Nda tu liyaka lovitangi, tu sukila oku ivaluka okuti, omo “Suku wa kolelua,” ka yanduluka afendeli vaye vakuekolelo.—Tanga 1 Va Korindo 10:13.
5. Tu pondola ndati oku lembeleka vakuetu?
5 Upostolo Paulu wa tukula Yehova hati, eye “Suku ukuakulembeleka.” Ondaka oku “lembeleka,” yi lomboloka oku kolisa omunu o liyaka lovitangi, ale umue wa sumua. Tu ci linga poku lembeleka umue wa sumua, ale oku kuatisa omunu o tala ohali. Ocili okuti, Yehova oco a siata oku linga. (Tanga 2 Va Korindo 1:3, 4.) Ka kuli cimue ci tateka Isietu wo kilu, una o kuete ovina viosi vioku lembeleka vana vo sole. Etu, tu pondolavo oku lembeleka vamanjetu “va tala ohali.” Tu ci linga “lelembeleko Suku a tu lembeleka lalio.” Ka kuli umue wa velapo koku lembeleka, ndeci Yehova a siata oku linga!
Ovina vi Nena Esumuo
6. Tukula ovina vimue vi nena esumuo.
6 Eci tu liyaka lovina vi nena esumuo, tu lembelekiwa. Oku fisa ngandietu ku nena esumuo, ca piãla enene nda omunu wa fa, ohueli yetu ale omõla wetu. Nda omunu umue o talisiwa ohali omo liolonepele, o sukila elembeleko. Handi vali, omunu o sukila elembeleko poku liyaka lovina vimue ndeci: Oku vela, oku kuka, uhukũi, ovitangi volohuela, ale ekalo lĩvi lioluali.
7. (a) Poku liyaka lovitangi vi nena esumuo, nye tu sukila? (b) Nye Yehova a pondola oku linga oco a sakule utima wa ‘teka, haiwo wa samba’?
7 Omo okuti tu kasi kotembo yovitangi, tu sukila ovina vi tulumũla utima wetu, olondunge, ovisimĩlo, uhayele wetu ketimba kuenda kespiritu. Kũlĩhĩsa ndomo utima wa tuwa. Ondaka ya Suku yi lekisa okuti utima wetu u pondola oku ‘teka, ale oku samba.’ (Osa. 51:17) Pole, Yehova o tu kuatisa oku pandikisa, momo “o sakola ava va teka kovitima, kuenje itika apute avo.” (Osa. 147:3) Nda tu likutilila ku Suku lekolelo, kuenda tu pokola kovihandeleko viaye, eci tu liyaka lovitangi, eye o lembeleka ovitima vietu.—Tanga 1 Yoano 3:19-22; 5:14, 15.
8. Yehova o tu kuatisa ndati eci tu liyaka lesumuo?
8 Omo liovitangi tua siata oku liyaka lavio, olondunge vietu vi sukila elembeleko. Ocili okuti, ka tu pondola oku pandikisa kovitangi longusu yetu muẽle. Omo liaco, ukualosamo wa imba ocisungo hati: “Eci atatahãi a nduila vutima, oku lemba kuove okuo ku ñolisa.” (Osa. 94:19) Paulu wa sonehavo ndoco: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene lovisimĩlo viene vu Kristu Yesu.” (Va Fil. 4:6, 7) Oku tanga loku sokolola Ovisonehua, ci tu kuatisa oku pandikisa kesumuo.—2 Tim. 3:15-17.
9. Nye ci tu kuatisa oku yuvula ovisimĩlo ka via sungulukile?
9 Olonjanja vimue, tu sumua calua kuenje tu kala kohele yoku yapuisiwa lovisimĩlo ka via sungulukile. Pamue tu sima okuti, omo ka tua loñolohele ka tu tẽlisa ocikele cimue tua tambula vekongelo. Vepuluvi liaco, Yehova o tu lembelekavo kuenda o tu kuatisa. Kũlĩhĩsa ulandu owu: Eci Yehosua a tambula ocikele coku songuila va Isareli koku liyaka lovanyãli vavo, Mose wa sapuila omanu hati: “Kolisiko. Kuati utõi, ko ka kuati usumba, ndaño oku va lulumĩla. Momo u endela kumue love eye Yehova Suku yove. Eye ka ku tokoka, ndaño oku ku yanduluka.” (Esin. 31:6) Yehosua wa tẽla oku songuila va Isareli toke Vofeka Yohuminyo, lekuatiso lia Yehova, kuenje, wa yula ovanyãli vavo vosi. Mose wa mola ekuatiso lia Suku, osimbu handi ka va yokele Okalunga ka Kusuka.—Etu. 14:13, 14, 29-31.
10. Nda esumuo li kasi oku nyõla uhayele wetu ketimba, nye ci tu kuatisa?
10 Ovitangi vina vi nyõla uhayele wetu ketimba. Ocili okuti, oku litekula ciwa, oku puyuka, loku linga olomapalo vioku pokuisa etimba, kuenda oku yelisa onjo loku liyelisa ketimba, ci pondola oku tu kuatisa. Ndomo Embimbiliya li ci popia, oku kuata uhayele kespiritu, ci tu kuatisavo oku kuata ekalo liwa ketimba. Eci tu tala ohali omo liovitangi, tu sukila oku ivaluka ohali yupostolo Paulu lolondaka viaye vielembeleko a popia hati: “Tu sipataiwa kuosi haimo ka tu vandi; tu sakalaisua ño-o haimo ka tu konyoha; tu kangaisua ño-o haimo ka tu yandulukiwa; tu pupowaiwa ca lua haimo ka tu fi.”—2 Va Kor. 4:8, 9.
11. Nda tua limbuka okuti ekolelo lietu li kasi oku hongua, nye tu sukila oku linga?
11 Ovitangi vina vi pondola oku nyõla ekalo lietu kespiritu. Pole, Yehova o tu kuatisa. Ondaka yaye yi tu sapuila ndoco: “Yehova o yakela vosi va yongola oku kupuka. O petula vosi va petama.” (Osa. 145:14) Nda tua limbuka okuti ekolelo lietu li kasi oku hongua, tu sukila oku pinga ekuatiso kakulu vekongelo. (Tia. 5:14, 15) Oku sokolola olohuminyo vi sangiwa Vovisonehua viatiamẽla kelavoko liomuenyo ko pui, ci tu kuatisa oku pandikisa kovitangi vi seteka ekolelo lietu.—Yoa. 17:3.
Ongangu ya Vana va Lembelekiwa la Suku
12. Lombolola ndomo Yehova a lembeleka Avirahama.
12 Ukualosamo wa popia hati: “[A Yehova,] ivaluka ondaka wa popia lukuenje wove, momo ya ñokela oku lavoka. Elembeleko liange kotembo yohali, lieli, Ohuminyo yove yi nyiha omuenyo.” (Osa. 119:49, 50) Vembimbiliya, mu sangiwa ovolandu omanu valua va lembelekiwa la Yehova Suku. Avirahama eci a yeva okuti Yehova o ka kundula o Sodoma lo Gomora, citava okuti, wa sumuĩle. Omo liaco, wa pula Suku hati: “Ocili o nyõlela olondingesunga kumue lolondingaĩvi ale?” Yehova wa lembeleka Avirahama poku u sapuila okuti, nda wa sangamo 50 kolondingesunga, ka nyõli vali olupale luo Sodoma. Avirahama wa pula Yehova olonjanja vitãlo, hati: Nda wa sangamo lika 45 kolondingesunga, pamue 40, pamue 30, pamue 20, ale 10 kolondingesunga, o nyõla hẽ alupale aco? Yehova wa lekisa epandi lesunguluko, kuenje, wa sapuila Avirahama hati, ka nyõli o Sodoma. Ndaño okuti valupale aco ka mua sangiwile ekũi liolondingesunga, Yehova wa popela Lote kumue lomãla vaye vakãi.—Efet. 18:22-32; 19:15, 16, 26.
13. Hana wa lekisa ndati okuti wa kolelele Yehova?
13 Hana ukãi wa Elikana, wa yonguile oku cita omõla. Omo okuti wa kala osiũle, wa sumuĩle calua. Eye wa likutilila ku Yehova catiamẽla kocitangi caye, kuenje, Ocitunda Cinene Eli, wo sapuila hati: “Suku ya Isareli a ku muise eci wo lomba.” Olondaka evi, via lembeleka Hana, kuenje, ‘ocipala caye ka ca sumuĩle vali.’ (1 Sam. 1:8, 17, 18) Hana wa kolelele Yehova, kuenda ovitangi viaco wa vi eca peka liaye. Ndaño ka kũlĩhĩle eci ca laikele oku pita laye, wa kuata ombembua yovutima. Noke, Yehova wa tambulula ohutililo yaye. Kuenje, Hana wa mina, kuenda wa cita omõla ulume una a luka onduko ya Samuele.—1 Sam. 1:20.
14. Momo lie Daviti a sukilile elembeleko, kuenda helie wo lembeleka?
14 Kosimbu, Soma Daviti wo ko Isareli, wa lembelekiwavo la Suku. Omo okuti Yehova “o vanja vutima,” eci a nõla Daviti oco a linge osoma ya va Isareli, wa kũlĩhĩle okuti Daviti wa kala ukuesunga, kuenda wa litumbikile kefendelo liocili. (1 Sam. 16:7; 2 Sam. 5:10) Pole, Daviti weya oku linga ukahokolo la Batisieva kuenje, wa limbika ekandu liaye. Eci Daviti a kuatisiwa oku limbuka ovitangi vi tunda koku linga ekandu, wa likutilila ku Yehova hati: “Omo ohenda yove yalua, imula okulueya kuange. Sukule ciwa ciwa evĩho liange. Njelise ekandu liange. Momo nda kũlĩha okulueya kuange. Ekandu liange li kasi ño-o kovaso ange.” (Osa. 51:1-3) Omo okuti Daviti wa likekembela akandu aye lutima wosi, Yehova wo wecela. Pole, weya oku liyaka lovitangi vi tunda kelinga liaye lĩvi. (2 Sam. 12:9-12) Ocili okuti, ohenda ya Yehova ya lembeleka ukuenje waye Daviti.
15. Ekuatiso lipi Yesu a tambula ku Yehova osimbu handi ka file?
15 Yesu eci a kala palo posi wa liyaka loloseteko vialua. Suku wa ecelela oloseteko viaco, pole, Yesu wa pandikisa lekolelo. Eye wa kala omunu wa li pua okuti, olonjanja viosi wa lekisa ekolelo liaye ku Yehova kuenda kuviali Waye. Osimbu Yesu ka pakuiwile loku pondiwa, wa likutilila ku Yehova hati: “Ocipango cange ka ci ka lingiwe, te cove ci lingiwa.” Ungelo umue wa moleha ku Yesu, kuenje wo lembeleka. (Luka 22:42, 43) Suku wa kuatisa Yesu kuenda wo lembeleka.
16. Yehova o tu kuatisa ndati eci omuenyo wetu u kala kohele omo lioku kolela kokuaye?
16 Nda omuenyo wetu u kala kohele yoku fa, Yehova o tu kuatisa. Eye o tu lembeleka lelavoko liepinduko. Tu ka sanjuka calua, eci kufa okuti eye ‘unyali wa sulako a ka nyõliwa’! (1 Va Kor. 15:26) Afendeli vakuekolelo vana va fa, va kasi vonjivaluko ya Yehova, kuenje, va ka pinduiwa. (Yoa. 5:28, 29; Ovil. 24:15) Ndaño tu pita lelambalalo, pole, oku kolela kohuminyo ya Yehova yepinduko, ci tu lembeleka kuenda ci tu ĩha elavoko.
17. Yehova o tu lembeleka ndati eci umue ngandietu a fa?
17 Oku kũlĩha okuti vangandietu va fa va ka pinduiwa voluali luokaliye muna ka mu ka kala vali ovitangi tua siata oku liyaka lavio koloneke vilo, ci tu lembeleka calua! Eci “owiñi wakahandangala” wafendeli va Yehova u ka puluka kesulilo lioluali lulo lua vĩha, loku yolela vana va ka pinduiwa kuenda oku va longisa, ci ka tu nenela esanju lialua!—Esit. 7:9, 10.
Suku o Teyuila Otembo ka yi Pui
18, 19. Afendeli va Suku va siata oku lembelekiwa ndati eci va liyaka lelambalalo?
18 Mose poku imba ocisungo cimue, wa lembeleka va Isareli hati: “Suku yomuenyo wenda hũ eye ocitungilo cove. Ovoko aye a ku angata. Eye wa lupuisa ovanyãli kovaso [ove]. Wa popia hati: Nyõla [ovanyãli vove]!” (Esin. 33:27) Noke, uprofeto Samuele wa sapuila va Isareli hati: “Ko ka liweki oku kuama Yehova, puãi vumbi Yehova lutima wene wosi. . . . Yehova ka yanduluka omanu vaye omo onduko yaye yi kola.” (1 Sam. 12:20-22) Osimbu tu amamako oku amẽla ku Yehova loku u fendela lutima wetu wosi, eye ka tu yanduluka. Eye, wa siata oku tu kuatisa lovina tu sukila.
19 Koloneke vilo via sulako, Suku wa siata oku eca ekuatiso kuenda elembeleko kafendeli vaye. Vamanji vamue va siata oku lambalaliwa loku kapiwa vokayike vokuenda kuanyamo alua, omo lioku vumba Yehova. Ovolandu omuenyo wavo, a lekisa okuti, Yehova wa siata oku lembeleka afendeli vaye kotembo yohali. Manji umue kofeka yo União Sovietika, wa kala vokayike ci soka 23 kanyamo omo liekolelo liaye. Pole, osimbu a kala vokayike, wa enda oku tambula okulia kuespiritu kuna kua pamisa ekolelo liaye kuenda kuo lembeleka. Eye wa popia hati: “Vokuenda kuanyamo aco, nda lilongisa oku kolela Yehova kuenje, nda pamisiwa laye.”—Tanga 1 Petulu 5:6, 7.
20. Momo lie tu sukilila oku kolela okuti Yehova ka tu yanduluka?
20 Poku liyaka lovitangi, tu sukila oku ivaluka olondaka vielembeleko, vina ukualosamo a popia hati: “Yehova ka pañula omanu vaye.” (Osa. 94:14) Ndaño okuti omunu lomunu pokati ketu o sukila elembeleko, pole, tu kuetevo esumũlũho lioku lembeleka vakuetu. Vocipama ci kuãimo, tu ka lilongisa ndomo tu lembeleka vana va sumua omo liovitangi via siata voluali lulo lua vĩha.
O Tambulula Ndati?
• Ovina vipi vi tu nenela esumuo?
• Yehova o lembeleka ndati afendeli vaye?
• Nda omuenyo wetu u kasi kohele yoku fa, nye ci pondola oku tu lembeleka?
[Okakasia/Alitalatu kemẽla 25]
NDOMO TU PANDIKISA KOVITANGI VI NYÕLA . . .
▪ utima wetu Osa. 147:3; 1 Yoa. 3:19-22; 5:14, 15
▪ olondunge vietu Osa. 94:19; Va Fil. 4:6, 7
▪ ovisimĩlo vietu Etu. 14:13, 14; Esin. 31:6
▪ uhayele wetu ketimba 2 Va Kor. 4:8, 9
▪ ekalo lietu kespiritu Osa. 145:14; Tia. 5:14, 15