O Kasi hẽ Oku Molẽhisa Ulamba wa Yehova?

‘Tu molẽhisa ulamba wa Yehova ndolumuĩlo.’—2 VA KOR. 3:18.

O TAMBULULA NDATI?

Ndaño ka tua lipuile, tu eca ndati esivayo ku Yehova?

Olohutililo loku endaenda kolohongele, vi tu kuatisa ndati oku molẽhisa ulamba wa Suku?

Nye ci tu kuatisa oku amamako oku sivaya Yehova?

1, 2. Momo lie ca sungulukila oku lavoka okuti tu pondola oku setukula ovituwa via Yehova?

OMUNU lomunu pokati ketu, o kuete ondimbukiso yimue yi lekisa okuti, wa setahãla olonjali viaye. Eli olio esunga lieci tua siatela oku yeva okuti, omunu o sapuila ukuenje umue hati: ‘Wa setahãla isia yove.’ Pamue o sapuila ufeko umue hati: ‘Wa setahãla mãi yove.’ Omãla va siata oku setukula ovina vi lingiwa lolonjali viavo. Helie tua siata oku setukula? Anga hẽ tu pondola oku setukula Yehova, Isietu wokilu? Ndaño okuti ka tu tẽla oku mola Yehova lovaso, pole, tu pondola oku limbuka ovituwa viaye poku lilongisa Embimbiliya, poku tala ovina a lulika, kuenda poku sokolola ovina tua tanga Vembimbiliya, ca piãla enene ovina Yesu Kristu a linga. (Yoa. 1:18; Va Rom. 1:20) Omo liaco, tu pondola oku molẽhisa ulamba wa Yehova.

² Eci Suku ka lulikile handi Adama la Heva, wa kũlĩhĩle okuti, omanu va pondola oku linga ocipango caye, poku setukula ovituwa viaye, kuenda oku molẽhisa ulamba waye. (Tanga Efetikilo 1:26, 27.) Omo okuti Suku wa tu lulika lesetãhalo liaye, tu sukila oku lekisa ovituwa Viaye. Nda tua ci linga, tu kuata esumũlũho lioku molẽhisa ulamba wa Suku, okuti, ka tu velisapo ovituwa viocitumãlo tua citiwila, elilongiso lietu, ale ovituwa viepata lietu. Momo lie? Momo, “Suku ka kuete ocame, puãi, volofeka viosi, [omunu] u sumbila loku linga esunga, u sungulukila.”—Ovil. 10:34, 35.

3. Nye Akristão va siata oku yeva vutima poku vumba Yehova?

³ Akristão olombuavekua va siata oku molẽhisa ulamba wa Yehova. Upostolo Paulu wa soneha ndoco: “Etu vosi, locipala ca sikũlũha, eci tu molẽhisa ulamba wa Yehova, ndeci olumuĩlo, oco tu pongoluiwa esetahãlo liaye tunde kulamba toke kulamba.” (2 Va Kor. 3:18, NW) Eci uprofeto Mose a loka Komunda Sinai lavaya ovawe mua sonehiwile Ekũi Kovihandeleko, ocipala caye ca kala oku eca ocinyi, momo wa vangula la Yehova. (Etu. 34:29, 30) Ndaño okuti Akristão ka va kuete ulandu wa lisoka lowu wa Mose, kuenda ocipala cavo ka ceci ocinyi, pole, va kuete esanju lioku sapuila omanu ovina viatiamẽla ku Yehova, kovituwa viaye, kuenda kocipango caye catiamẽla komanu. Kosimbu, omanu va enda oku kunga ovivela okuti vi nina ciwa toke eci vi linga olumuĩlo. Cimuamue haico ca siata oku pita Lakristão olombuavekua va kasi handi palo posi kumue lolomeme vikuavo okuti, va siata oku molẽhisa ulamba wa Yehova ndolumuĩlo, poku kundila omanu olondaka viwa. (2 Va Kor. 4:1) Ovituwa lovilinga viove vi molẽhisa hẽ ulamba wa Yehova, oco omanu va limbuke okuti, wundingupange Yusoma wa Suku?

TU YONGOLA OKU MOLẼHISA ULAMBA WA YEHOVA

4, 5. (a) Ovitangi vipi Paulu a liyaka lavio okuti vi kasi ndevi vietu? (b) Ekandu lia siata oku tu kokela ovitangi vie?

⁴ Omo okuti Tuakristão, tu yongola oku sivaya loku kemãlisa Ululiki wetu Yehova, kovina viosi tu linga. Pole, olonjanja vimue, ka tu lingi ovina tu yongola. Paulu wa liyaka locitangi caco. (Tanga Va Roma 7:21-25.) Poku lombolola esunga lieci tua siatela oku liyaka locitangi caco, Paulu wa soneha ndoco: “Vosi va linga [ekandu,] kuenje va lipumbisa ulamba wa Suku.” (Va Rom. 3:23) Omo okuti Adama wa linga ekandu, omanu vosi va vialiwa ‘Lekandu.’—Va Rom. 5:12; 6:12.

⁵ Ekandu li lomboloka nye? Li lomboloka ocina cimue ka ci litava lovisimĩlo via Yehova, ndeci: Ovisimĩlo viaye, olonumbi, kuenda ocipango caye. Ekandu, li nyõla ukamba womunu la Suku, kuenda liu tateka oku lueya vocimãho caye, ndeci enyanga li lueya poku imba usongo vocinyama a yongola oku ponda. Pamue tu lueya, ndaño ka tu yongola oku ci linga. (Ate. 15:27-31) Omo okuti omanu va piñala ekandu, ci va tateka oku kuata ukamba Lululiki wavo. (Osa. 51:5; Isa. 59:2; Va Kol. 1:21) Omanu valua, va tinduka ku Yehova Suku, kuenda va pumba esumũlũho lioku molẽhisa ulamba waye. Ekandu lia siata oku kokela omanu ovitangi vialua.

6. Ndaño ka tua lipuile, tu molẽhisa ndati ulamba wa Suku?

⁶ Ndaño tu kasi vemehi liekandu pole, Yehova ‘o tu ĩha elavoko.’ (Va Rom. 15:13) Eye, wa linga eliangiliyo lioku malako akandu etu vonduko yocisembi ca Yesu Kristu. Nda tua lekisa ekolelo kocisembi caco, ka tu kala vali “apika vekandu,” pole, tu kuata esumũlũho lioku molẽhisa ulamba wa Yehova. (Va Rom. 5:19; 6:6; Yoa. 3:16) Oku kuata ukamba la Yehova Suku, ci tu ĩha asumũlũho cilo, loku kuata elavoko lioku li pua, kuenda oku tambula omuenyo ko pui kovaso yoloneke. Ndaño ka tua lipuile, pole, tu kuete esumũlũho linene lioku tendiwa la Suku omo lioku molẽhisa ulamba waye!

TUA SIATA OKU MOLẼHISA ULAMBA WA SUKU

7. Nye tu sukila oku linga oco tu molẽhise ulamba wa Suku?

⁷ Oco tu kuate esumũlũho lioku molẽhisa ulamba wa Suku, tu sukila oku limbuka okuti ka tua lipuile. (2 Asa. 6:36) Omo liaco, tu sukila oku limbuka ovisimĩlo vietu ka via sungulukile, loku likandangiya oco ka tu ka linge ekandu. Nda tua ci linga, tu eca esivayo ku Suku. Nda tua linga ekandu poku tala omanu va kasi epolõla haivo va linga upuepue, tu sukila ekuatiso kespiritu, oco tu yuvule ocituwa caco. (Tia. 5:14, 15) Eli olio enanga liatete li tu kuatisa oku kuata ekalo li sivaya Suku. Omo okuti tuafendeli va Yehova, tu sukila oku kũlĩhĩsa ekalo lietu, oco tu limbuke nda tu kasi oku pokola kolonumbi viaye viesunga. (Olosap. 28:18; 1 Va Kor. 10:12) Ndaño okuti tua citiwila vekandu, pole, tu sukila oku likolisilako oco ka tu ka yapuisiwe. Nda tua ci linga, tu molẽhisa ulamba wa Suku.

8. Ndaño ka tua lipuile, tu sukila oku linga nye?

⁸ Yesu, eye lika wa kala komuenyo okuti, toke eci a fa ka lingile ovina vi sumuisa Suku, kuenda wa molẽhisa ciwa ulamba Waye. Ndaño ka tu kuete ekalo ndeli lia Yesu, pole, tu sukila oku likolisilako oku kuama ongangu yaye. (1 Pet. 2:21) Yehova wa kapako alikolisilo tua siata oku lekisa, kuenda o sumũlũisa onjongole yetu yoku molẽhisa ulamba waye.

9. Embimbiliya li kuatisa ndati Akristão vana va yongola oku vumba Suku lutima wosi?

⁹ Embimbiliya, li tu kuatisa oku kũlĩha ndomo tu molẽhisa ulamba wa Suku. Oku lilongisa lutate Embimbiliya, loku sokolola ovina tua tanga, ci kuete esilivilo. (Osa. 1:1-3) Oku tanga Embimbiliya oloneke viosi, ci tu kuatisa oku kuata elomboloko lia suapo. (Tanga Tiago 1:22-25.) Ukũlĩhĩso Wembimbiliya, owo ociseveto cekolelo lietu, kuenda u tu kuatisa oku yuvula oku linga akandu oco tu sanjuise Yehova.—Osa. 119:11, 47, 48.

10. Ohutililo yi tu kuatisa ndati oku vumba Yehova lutima wosi?

¹⁰ Oco tu molẽhise ulamba wa Suku, tu sukila oku ‘pandikisa lolohutililo.’ (Va Rom. 12:12) Omo liaco, tu sukila oku likutilila ku Yehova oco a tu kuatise oku u vumba lonjila ya sunguluka. Tu pingi kokuaye espiritu sandu oco li vokiye ekolelo lietu, okuti tu pondola oku liyaka layonjo, kuenda oku kuata ‘uloño woku kunda ondaka yocili.’ (2 Tim. 2:15; Mat. 6:13; Luka 11:13; 17:5) Tua siata oku kuatisiwa la Yehova, ndeci isia a kuatisa omõlaye. Nda tu pinga ku Yehova oco tu u vumbe lutima wosi, eye o tu kuatisa. Ka tu ka simi okuti, Yehova ka tu kuatisa! Tu eci esivayo kuenda olopandu volohutililo vietu, loku pinga kokuaye ekuatiso eci tu liyaka lovitangi, kuenda oku u vumba lonjila yimue yi sivaya onduko yaye yi kola.—Osa. 86:12; Tia. 1:5-7.

11. Olohongele vietu vi tu kuatisa ndati oku molẽhisa ulamba wa Suku?

¹¹ Suku wa eca ocikundi ‘kukuenje wa lunguka haeye wa kolelua,’ coku lava olomeme viaye. (Mat. 24:45-47; Osa. 100:3) Ukuenje wa lunguka wa siata oku kuatisa olomeme vikuavo oco vi molẽhise ulamba wa Yehova. Ndeci tu linga poku eca onanga komesele yimue oco yi tu tongele uwalo wa posoka, cimuamue haico ci pita lolohongele vietu okuti, vi tu kuatisa oku linga apongoloko, loku lekisa ovituwa viwa. (Va Hev. 10:24, 25) Omo liaco, tu yuvuli oku cilua kolohongele, oco ka tu ka pumbe okulia kuespiritu kuna ku tu kuatisa oku limbukiwa lomanu okuti, tuafendeli va Yehova.

TU SETUKULI SUKU

12. Tu setukula ndati Suku?

¹² Nda tu yongola oku molẽhisa ulamba wa Yehova Suku, tu sukila oku u ‘setukula.’ (Va Efe. 5:1) Onjila yimue yoku setukula Yehova, oku tenda ovitangi ndomo eye a vi tenda. Nda ka tua ci lingile, tu sepuisa Yehova, kuenda tu yapuisiwa. Omo okuti oluali lulo lu kasi peka lia Satana Eliapu, tu sukila oku likolisilako oku suvuka ovina Yehova a nyãle, kuenda oku sola ovina a sole. (Osa. 97:10; 1 Yoa. 5:19) Tu koleli okuti, nda tu vumba Suku lonjila ya sunguluka, ovina viosi tu linga, vi eca esivayo kokuaye.—Tanga 1 Va Korindo 10:31.

13. Momo lie tu sukilila oku suvuka ekandu, kuenda nye ci tu vetiya oku ci linga?

¹³ Omo okuti Yehova wa suvuka ekandu, tu sukilavo oku ci linga. Omo liaco, tu yuvuli ovina ka via sungulukile, vi pondola oku tu vetiya oku linga ekandu, momo nda ka tua vi yuvuile, tu yapuisiwa. Vimue pokati kovina viaco, olonanguluke, kuenda ekandu li tu tateka oku eca esivayo ku Suku. (Esin. 13:6-9) Tu yuvuli ukamba lolonanguluke, kuenda omanu vana va siata oku litukula vati, Olombangi Via Yehova, pole, va kuete ovituwa vi sepula Suku. Ka tu ka kuati ukamba lomanu vaco, ndaño vangandietu. (1 Va Kor. 5:11) Nda tua kuata ukamba lolonanguluke kuenda vana va sepula ocisoko ca Yehova, ka tu kuatisiwa. Oku tanga alivulu a sonehiwa lolonanguluke, kuenda ovolandu avo vo Internet, ci kapa kohele ekolelo lietu.—Tanga Isaya 5:20; Mateo 7:6.

14. Ocituwa cipi tu sukila oku kuata, poku molẽhisa ulamba wa Suku, kuenda momo lie?

¹⁴ Oku lekisa ocisola, oyo onjila ya velapo yoku setukula Isietu wokilu. Omo liaco, tu lekisi ocisola ndeci eye a siata oku linga. (1 Yoa. 4:16-19) Ocisola tu kuetele vamanjetu, oco ceca uvangi wokuti, tulondonge via Yesu, kuenda tuafendeli va Yehova. (Yoa.13:34, 35) Omo okuti tua piñala ekandu, olonjanja vimue ka ca lelukile oku lekisa ocisola. Pole, olonjanja viosi, tu sukila oku likolisilako oku ci linga. Oku kuata ocisola lovituwa vikuavo via Suku, ci tu teyuila koku linga ungangala, kuenda ovina vikuavo ka via sungulukile.—2 Pet. 1:5-7.

15. Ocisola ci tu vetiya ndati oku kuata ukamba lomanu?

¹⁵ Ocisola ci tu vetiya oku lingila omanu ovina viwa. (Va Rom. 13:8-10) Ocisola tu kuetele ohueli yetu, ci tu vetiya oku yuvula ovina via vĩha. Ci tu vetiyavo oku sumbila akulu vekongelo loku lekisa epokolo kokuavo, omo liupange wavo uwa. Omãla vana va kuete ocisola, va lekisa epokolo lesumbilo, kuenda ka va popi lãvi olonjali viavo. Nda tu lekisa ocisola komanu, ka tu va tendi okuti ka va kuete esilivilo kuenda ka tu popi olondaka vioku va sepula. (Tia. 3:9) Akulu vekongelo va sole olomeme via Suku, va vi tata lohenda.—Ovil. 20:28, 29.

16. Oku lekisa ocisola ci tu kuatisa ndati kupange woku kunda?

¹⁶ Tu sukilavo oku lekisa ocisola kupange woku kunda. Omo okuti tu kuetele ocisola calua Yehova, ka tu liwekapo oku kunda, ndaño omanu tu sanga ka va tu tambulula ciwa. Pole, tu amamiko oku kunda olondaka viwa. Ocisola ci tu vetiya oku lipongiya ciwa, kuenda oku likolisilako oco tu kuate uloño woku kunda. Nda tu sole Suku kuenda omanu, ka tu tendi upange woku kunda Usoma ndocina cimue ka ci kuete esilivilo. Pole, tu linga upange waco lesanju, momo tu u tenda okuti, esumũlũho limue lia velapo.—Mat. 10:7.

AMAMAKO OKU SIVAYA YEHOVA

17. Momo lie ci kuetele esivililo oku kũlĩha okuti ka tu pondola oku kuata ulamba wa Suku?

¹⁷ Omanu valua voluali, ka va kuete ukũlĩhĩso wokuti, ekandu li nena ovitangi, pole, etu tu kuete ukũlĩhĩso waco. Omo liaco, tu yuvuli ovisimĩlo ka via sungulukile, vi tu vetiya oku linga ekandu. Omo okuti ka tua lipuile, tu amamiko oku pindisa olondunge vietu, okuti, eci tu fetika oku kuata ovisimĩlo ka via sungulukile, tu kuata ongusu yoku yuvula ovisimĩlo viaco. (Va Rom. 7:22, 23) Citava okuti tu hongua, pole, Suku o pondola oku tu pamisa, oco tu linge ovina via sunguluka poku liyaka locitangi cimue.—2 Va Kor. 12:10.

18, 19. (a) Nye ci tu kuatisa oku yuvula aspiritu ãvi? (b) Nye tua nõlapo oku linga?

¹⁸ Nda tu yongola oku sivaya Yehova, tu sukila oku yuvula aspiritu ãvi. Suku yetu, wa tu ĩha ovimalẽho viespiritu oco tu yule aspiritu aco. (Va Efe. 6:11-13) Satana Eliapo, wa siata oku seteka oku nyõla esivayo Yehova a sesamẽla. Eye o yongola oku nyõla ukamba wetu la Yehova. Pole, Satana o sumua calua eci a mola omanu ka va lipuile ndeci: Alume, lakãi kuenda omãla ndomo va kasi oku pandikisa koku eca esivayo ku Suku! Omo liaco, vosi yetu, tua amamiko oku sivaya Yehova ndeci ovangelo kilu va kasi oku linga poku popia vati: “A [Yehova], Suku yetu, wa posokela oku muisua ulamba lesumbilo lunene. Momo ove wa sovola ovina viosi. Vi kasilili ocipango cove, haico via lulikiwa laco.”—Esit. 4:11.

¹⁹ Ndaño tu pita lovitangi vialua, tu amamiko oku eca esivayo ku Yehova. Eye o sanjuka calua eci a mola ndomo omanu valua va kasi oku likolisilako oku u setukula loku molẽhisa ulamba waye. (Olosap. 27:11) Tu kuami ongangu ya Daviti wa imba ocisungo hati: “A Yehova Suku yange, hu pandula lutima wange wosi. [Ndi kemainya] onduko yove oloneke viosi.” (Osa. 86:12) Ndopo tu ka molẽhisa ciwa ulamba wa Yehova, loku eca esivayo kokuaye otembo ka yi pui! Omanu vana va kasi oku pokola, va ka kuata esumũlũho lioku ci linga. O kasi hẽ oku molẽhisa ulamba wa Yehova Suku, lelavoko lioku ci linga otembo ka yi pui?

[Alitalatu kemẽla 27]

O kasi hẽ oku molẽhisa ulamba wa Yehova ndomo ca lekisiwa voviluvialuvia evi?