Mose—Wa Kala Ukuacisola

OCISOLA CI LOMBOLOKA NYE? Vocisola cocili, mua kongela oku lekisa ohenda komanu. Omunu o kuete ocisola, o ci lekisila kolondaka kuenda kovilinga viaye, ndomo a kala lomanu vana a sole, ndaño okuti, poku ci linga ci sukila oku likolisilako.

MOSE WA LEKISA NDATI OCISOLA? Mose wa lekisa ocisola ku Suku. Wa ci linga ndati? Ivaluka olondaka vi sangiwa kelivulu lia 1 Yoano 5:3, viokuti: ‘Oku sola Suku ku lomboloka oku pokola kovihandeleko viaye. Momo ovihandeleko viaye ka vi lemi.’ Omuenyo wa Mose u lekisa okuti onumbi eyi, ya kala vutima waye. Kovina viosi Suku o tuma, ndeci, ocikele ca tatama coku ka lisanga la Fareo u ana wa kemãlele calua, loku veta ombueti yaye Vokalunga Kakusuka okuti upange waco wa molehẽle ndu wa lelukile, Mose wa ci linga lepokolo. Ci kale okuti upange waco wa leluka, ale wa tatama, Mose wa u tẽlisa. “Oco Mose a linga.”—Etundilo 40:16.

Mose wa lekisa ocisola ku vangandiaye va Isareli. Omo va Isareli va limbukile okuti Yehova wa nõlele Mose oco a va songuile, va endaele kokuaye oco a tetulule ovitangi viavo. Kulandu waco tu tangako ndoco: “Omanu va ñuala Mose tunde komẽle toke koñolosi.” (Etundilo 18:13-16) Sokolola ño ndomo Mose a yevaile ekavo noke yoku yevelela va Isareli va enda oku u nenela ovitangi viavo vokuenda kueteke liosi! Ocili okuti, Mose wa kuata esanju omo lioku kuatisa omanu.

Mose ka yevelile lika omanu, pole, wa va lingilakovo olohutililo. Ndaño muẽle omanu vana vo lingila ovina vĩvi, wa va likutililako! Umue pokati kavo, Miriama, mukãi wa Mose, okuti wa lisiõsuĩla Mose, kuenje, Yehova wo kangisa lovilundu. Puãi, Mose ka sanjukilile ekangiso liaco, kuenda lonjanga yalua wa likutilila hati: “A Suku, hu pinga okuti u sakula.” (Atendelo 12:13) Anga hẽ nda Mose ka kuatele ocisola nda wa vetiyiwa oku linga ohutililo?

ONGANGU YA MOSE YI TU LONGISA NYE? Tu pondola oku setukula ongangu ya Mose yoku kuatela ocisola Suku. Ocisola caco, ci tu vetiya oku pokola kovihandeleko viaye ‘lutima wosi.’ (Va Roma 6:17) Nda tu pokola ku Yehova lutima wosi, tu kuata esanju liocili. (Olosapo 27:11) Tu kuatavo onima yiwa. Handi vali, eci tu vumba Suku locisola cocili, ka tu lingi lika ovina via sunguluka, pole, tu ci lingavo lesanju!—Osamo 100:2.

Onjila yikuavo tu pondola oku setukula ongangu ya Mose, oku lieca olumue koku kuatela ocisola omanu. Eci akamba vetu ale epata lietu, va tu sandiliya oco tu tetulule ovitangi viavo, ocisola ci tu vetiya oku linga ovina evi, (1) tu va yevelela lutima wosi, (2) tu lekisa ocikembe kokuavo, loku sumua ndeci ovo va sumua, kuenda (3) tu va ecelela oco va limbuke okuti, tu va tata ciwa.

Tu pondola oku va likutililako ndeci Mose a linga. Olonjanja vimue, eci omunu umue a tu sapuila ocitangi caye, tu sima tuti, ka tu pondola oku u kuatisa. Citava okuti, tu liyeya laye ndoco, “Avoyo we, linga tu lingile kumosi ohutililo.” Omo liaco, ivaluka okuti: ‘Ohutililo yukuesunga yi lingiwa lutima wosi yi muisa unene wa Suku.’ (Tiago 5:16) Olohutililo vietu vi pondola oku vetiya Yehova oku lingila ocina cimue omunu waco okuti, nda ka tua lingile ohutililo yaco, pamue nda ka ca tẽliwile. Anga hẽ ka ca sungulukile oku lingila olohutililo omanu vana tu sole?a

Ove hẽ ku tava okuti tu pondola oku lilongisa ovina vialua kulandu wa Mose? Ndaño okuti Mose wa kuata ovituwa ndevi vietu, haimo lumue wa tu sila ongangu yiwa yoku lekisa ekolelo, umbombe kuenda ocisola. Nda tu likolisilako oku setukula ongangu yaye, tu kuatisiwa kuenda tu kuatisavo omanu.—Va Roma 15:4.