Mose—Wa Kala Embombe

UMBOMBE U LOMBOLOKA NYE? Voku kala embombe, mua kongela oku yuvula epela loku lipanda. Omunu embombe, ka tendi vakuavo okuti va sule. Omunu una embombe, o lekisa esunguluko, momo wa kũlĩha okuti, ka tẽla oku linga ovina viosi.

MOSE WA LEKISA NDATI UMBOMBE? Mose eci a tambula ocikele coku kala usongui wa va Isareli, ka lekisile epela. Olonjanja vimue, omunu poku tambula okacikele kamue, umbombe waye u tepuluka lonjanga. Usonehi umue wa kala kocita cekũi lecea, o tukuiwa hati, Robert G. Ingersoll, wa popia hati: “Omanu valua, va lekisa okuti vomboka. Pole, nda o yongola oku kũlĩha ndomo omunu umue a tuwa, wĩha ocikele cimue.” Pole, Mose wa lekisa umbombe wocili. Wa ci linga ndati?

Mose wa tambuile ocikele cinene, momo wa nõliwile la Yehova oco a kale usongui wa va Isareli. Ocili okuti, ovikele viaco, ka via vetiyile Mose oku lekisa epela. Konomuisa esunguluko a lekisa eci a sukilile oku tambulula epulilo limue lia tatama lia tiamẽla koku eca ovipiñalo. (Atendelo 27:1-11) Ka ca lelukile oku tetulula ocitangi caco, momo ovitumbulukila vikuavo, nda vieya oku liyakavo locitangi caco.

Mose wa sukilile oku tambulula ndati? Anga hẽ wa simĩle okuti omo lioku kala usongui wa va Isareli, wa kuata unene woku tetulula ocitangi caco? Mose wa kolelele hẽ kolondunge viaye muẽle, kuenda koku loñoloha kuaye omo lianyamo alua a kuata, ale wa sukilile oku kolela kovisimĩlo via Yehova?

Citava okuti omunu umue o kuete epela, nda oco a linga. Pole, Mose ka ci lingile. Ulandu u sangiwa Vembimbiliya, u tu sapuila ndoco: “Mose wa tuala ondaka yavo ku Yehova.” (Atendelo 27:5) Kaliye sokolola handi! Ndaño Mose wa songuila va Isareli ci soka 40 kanyamo, ka tiamisilile utima kolondunge viaye muẽle, pole, wa kolela ku Yehova.

Mose ka simĩle okuti eye lika wa kuata unene. Eci Yehova a tava okuti va Isareli vakuavo va linga ovaprofeto oco vo kuatise, eye wa sanjukile calua. (Atendelo 11:24-29) Eci ndatembo yaye o lungula oku nõla alume vamue oco vo kuatise oku linga upange, eye wa tava lumbombe kelungulo liaco. (Etundilo 18:13-24) Mose kesulilo liomuenyo waye, ndaño handi wa kuatele olohõlo, wa pinga ku Yehova oco a ñole omunu umue u piñala. Eci Yehova a ñola Yehosua oco a linge upange waco, Mose wo kuatisa lutima wosi kuenda wa sapuila omanu oku kuama Yehosua oco va iñile Vofeka Yohuminyo. (Atendelo 27:15-18; Esinumuĩlo 31:3-6; 34:7) Mose wa tendele ocikele caye coku songuila efendelo lia va Isareli okuti, esumũlũho limue linene. Pole, ka pitisile kovaso ocikele caye okuti, ka kapiko vali ekalo lia vakuavo.

ONGANGU YA MOSE YI TU LONGISA NYE? Ka tu yongola okuti, omo lioku tambula ocikele cimue, pamue oku kuata unene, ale oku loñoloha kuetu, ku tu kokela epela. Ivaluka okuti: Oco tu tambule ocikele cimue ku Yehova, tu sukila oku kala ambombe okuti, ka tu velisapo oku loñoloha kuetu. (1 Samuele 15:17) Nda tu lekisa umbombe wocili, tu ka kapako elungulo Liembimbiliya li popia hati: “Kolela Yehova lutima wove wosi. Ku ka tiamẽle kolondunge viove muẽle.”—Olosapo 3:5, 6.

Ongangu ya Mose yi tu longisa okuti, oku tambula ocikele ale oku kuata unene umue, hacoko ocina ca velapo.

Anga hẽ tu kuatisiwa longangu ya Mose yoku lekisa umbombe? Ocili okuti, tu kuatisiwa! Nda tu lekisa umbombe wocili, tu ka leluisa omuenyo womanu va tu ñuala, poku va kapako. Handi vali, tu ka sumbila calua Yehova Suku, una o kuete ovituwa viwa. (Osamo 18:35) “Suku o yaka la vakueyengu, puãi ava va liketisa o va linga ohenda.” (1 Petulu 5:5) Omo liaco, tu kuete esunga lioku setukula umbombe wa Mose!