‘Yehova wa Kuecela’

“Omunu ka ecela vakuavo o nyõla eyau a yongola oku pita.” Olondaka evi via umue ukuovolandu wa kala kocita 17 ko Grã-Bretanya londuko Edward Herbert. Eye wa lombolola esunga lieci tu sukilila oku ecela vakuetu poku popia hati: Hẽla, ale helanya, tu ka pinga ku vakuetu oco va tu ecele. (Mateo 7:12) Eli olio esunga lieci tu sukilila oku ecela. Kũlĩhĩsa olondaka viupostolo Paulu vi sangiwa kelivulu lia Va Kolosai 3:13—Tanga.

Omo okuti ka tua lipuile, olonjanja vimue tu sumuisa vakuetu, kuenje citava okuti, pamue va tu lueyelavo. (Va Roma 3:23) Nye ci tu kuatisa oku amamako oku kala lombembua lavakuetu ka va lipuile? Suku wa kuatisa Paulu oku soneha elungulo lioku lekisa epandi kuenda oku liecela. Ndaño okuti tunde eci elungulo eli lia sonehiwa papita ale olohulukãi vivali vianyamo, pole handi li kuete esilivilo. Tu kũlĩhisi olondaka via Paulu.

“Kuati utima woku kuamelela loku lisola pokati.” Olondaka viokuti “kuati utima woku kuamelela” vi tunda kondaka yo Helasi yi lomboloka oku kala ukuepandi. Elivulu limue li popia ndoco: Akristão va sukila oku lekisa ocituwa caco “poku ecela vana va valueyela.” Ondaka “pokati” yi lekisa okuti tu sukila oku lekisa epandi. Eci tu ivaluka okuti tu pondola oku lueyela vakuetu, ci tu kuatisa oku yuvula oku linga ovina vi nyõla ombembua yi kasi pokati ketu. Nye tu linga nda umue wa tu lueyela?

‘Amamiko oku liecela pokati.’ Ndomo ulongisi umue a ci popia, ondaka yo Helasi ya pongoluila hati, “lieceli pokati,” ka yi lomboloka lika oku ivalako, pole ndomo ca lomboluiwa velivulu likuavo, ci lomboloka ongecelo.” Elivulu likuavo li popia ndoco: Ondaka oku liecela, yi lomboloka oku “linga ocina cimue ciwa oco ci kuatise omunu umue.” Tu pondola oku lekisa okuti tu kuete onjongole yoku ecela “ndaño tu likuetele olondaka.” Momo lie tu yonguila oku lekisa ocituwa caco? Momo tu yongola okuti una wa tu lueyela, hẽla o tu ecelavo.

‘Eceli vakuene, ndeci Yehova o weceli.’ Eli olio esunga lieci tu sukilila oku ecela vakuetu, momo Yehova Suku wa tu ecela. (Mika 7:18) Sokola ndomo Yehova a siata oku lekisa ohenda ku vana va likekembela. Yehova wa litepa letu, kuenda ka lueya. Pole, o kuete onjongole yoku ecela akandu etu ndaño wa kũlĩha okuti lalimue eteke a ka lueya. Yehova eye wa velapo koku ecela vana va likekembela!

Ohenda ya Yehova yi tu kuatisa oku kuata ukamba laye kuenda yi tu vetiya oku kuama ongangu yaye. (Va Efeso 4:32–5:1) Omo liaco, tu sukila oku lipula ndoco: ‘Nda Yehova ecela akandu ange, momo lie si ecelavo akandu a vana va ndi lueyela okuti, va pinga ongecelo?—Luka 17:3, 4.