Nye o Sukila Oku Linga—Oco o Vokiye Esanju Vefendelo Liove Liepata?

Isia umue wo kofeka yo Brasil wa popia hati: “Vefendelo lietu Liepata, tua siata oku konomuisa ovina vimue vi kuete esilivilo lia velapo okuti, olonjanja vimue tu mala kuteke.” Isia umue wo kofeka yo Japãu wa lombolola okuti, omõlaye ulume o kuete ekũi kanyamo, wa popia hati, ka limbuka ndomo otembo yi pita omo lionjongole yoku lilongisa. Momo lie? Isiaye wa amisako hati: “Momo elilongiso liaco, liu vetiya, kuenda liu nenela esanju.”

Ocili okuti omãla vamue ka va siatele oku sanjukila efendelo liepata. Momo lie? Isia umue wo kofeka yo Togo wa popia hati: “Efendelo liepata ka ci tava okuti, li lingiwa lonjila yimue ka ya sungulukile.” Nda efendelo liepata ka li lingiwa ciwa, ka tu sukila hẽ oku linga apongoloko amue, oco li ende ciwa? Apata alua a siata oku limbuka okuti efendelo liepata, li nena esanju,” ndeci uprofeto Isaya a lekisa hati, va Isareli va enda ‘oku kuata esanju’ keteke Liesambata.—Isa. 58:13, 14.

Olonjali Akristão, va likolisilako oco epata liavo li kuate esanju kuenda oku tiamisila utima kefendelo liavo liepata. Manji Ralf okuti o kuete omãla vatatu vakãi, lomõla umosi ulume, wa popia hati: “Vefendelo liavo liepata va siata oku sapela ovina vialua, kuenda vosi yavo, va linga onepa kombangulo yaco. Olonjanja vimue ka ca lelukile oku kongela epata liosi vovipama vielilongiso. Ina umue wa popia hati: “Olonjanja vimue omo liekavo, si tẽla oku songola efendelo liepata ndeci nda yonguile.” Anga hẽ ove o pondola oku yula ocitangi caco?

LEKISA ESUNGULUKO LOKU KUAMA OLONJILA VIA LITEPA

Isia umue kofeka yo Alemanya, wa popia hati: “Tua siata oku lekisa esunguluko.” Manji Natalia okuti o kuete omãla vavali wa popia hati: “Ocina ca velapo vefendelo lietu liepata, oku kuama olonjila via litepa.” Apata alua, a siata oku sokiya ovipama viefendelo liavo liepata, vi lingiwa volonepa via litepa. Isia umue o tukuiwa hati, Cleiton kofeka yo Brasil okuti o kuete omãla vavali wa popia hati: “Poku ci linga, efendelo liaco li kuata esilivilo lia velapo kuenda vosi va linga onepa kefendelo liaco. Omo lioku tepa ovipama viaco, olonjali vi kũlĩhĩsa ovina omõla lomõla a sukila, nda va kuete utunga wa litepa. Olonjali vi sukilavo oku lekisa esunguluko poku nõla ovipama va ka lilongisa kefendelo liepata kuenda ndomo va ka ci linga.

Apata amue a siata ndati oku kuama olonjila via litepa vefendelo liavo? Vamue va fetika oku linga efendelo liavo liepata poku imbila Yehova ovisungo. “Manji umue londuko Juan, wo kofeka yo Mesiku, wa popia hati: “Ovina viaco vi nena esanju, kuenda vi tu kuatisa oku pongiya ciwa ovipama tu lilongisa.” Epata liaye li nõla ovisungo vi li kuata lovina va ka lilongisa vefendelo liavo.

Apata alua a siata oku tangela kumosi ovinimbu vimue Viembimbiliya. Omo lioku kuama olonjila via litepa, vamue pokati kepata va tanga ovolandu amue omanu va tukuiwa Vembimbiliya. Isia umue kofeka yo Japãu wa popia hati: “Kefetikilo ka ca lelukile oku kuama onjila yaco.” Pole, omãla vaye vavali, va kuata esanju poku limbuka okuti, olonjali viavo vi linga lavo efendelo liepata. Vamue va konomuisa ovina vimue viatiamẽla kovolandu a sangiwa Vembimbiliya. Onjali yimue yi tukuiwa hati Roger, yi kasi ko Afrika do Sul okuti yi kuete omãla vavali, ya popia hati: “Omãla olonjanja vimue va siata oku konomuisa ovina vimue okuti etu tulonjali, ka tua vi kũlĩhĩle.”

Onjila yikuavo epata li sukila oku kuama, poku linga efendelo liepata, oku lingila kumosi upange umue ndeci: Oku setukula oku tunga ocimbaluku ca Noha, ale oku setukula oku tunga onembele ya Salomone. Oku linga esokiyo liovina viaco ci nena esanju. Omõla umue ukãi o kuete anyamo atãlo okuti o kasi lolonjali viaye kumue la inakulu yaye, kofeka yo Asia wa siata oku ci linga. Ovo va linga omapalo yimue yatiamẽla kovongende upostolo Paulu a lingaile kupange waye wumisionaliu. Apata akuavo a siata oku linga olomapalo atiamẽla kovolandu a sangiwa kelivulu Lietundilo. Manji Donald o kasi kofeka yo Togo o kuete 19 kanyamo wa popia hati: “Oku kuama olonjila via litepa, ca siata oku tu kuatisa oku linga efendelo lietu liepata, kuenda ci tu nenela esanju. Anga hẽ o pondola oku sokolola upange umue o ka linga kefendelo liove liepata okuti u ka ku nenela esanju?

OKU LIPONGIYA KU KUETE ESILIVILO

Ndaño okuti oku kuama olonjila via litepa loku lekisa esunguluko ci kuete esilivilo kefendelo liepata, pole, vosi va sukila oku lipongiya ciwa. Olonjanja vimue, omãla omo liekavo, ka va tẽla oku tumala otembo yalua oco va lilongise. Pole, olonjali vi sukila oku nõla lutate ocipama cimue, loku ci pongiya ciwa oco ci vetiye omãla. Isia umue, wa popia hati: “Eci ndi lipongiya ciwa, vosi vopa esilivilo kelilongiso liaco.” Isia umue ko Alemanya, o sapuila selo kepata liaye ovina va ka lilongisa Vefendelo Liepata olosemana viya. Olonjali vimue vi kasi kofeka yo Benin okuti vi kuete omãla epandu, vi linga esokiyo lioku konomuisa o DVD mu sangiwa ulandu Wembimbiliya kefendelo liavo liepata. Poku lipongiya, Isia eca komãla apulilo osimbu ka va talele o DVD. Oku lipongiya ciwa, ci kuatisa oku linga efendelo lietu liepata.

Nda epata li kũlĩha selo ovina va ka lilongisa, ci va kuatisa oku sapela ovina viaco vokuenda kuosemana. Poku ci linga, va kuata esanju kefendelo liavo. Nda omunu lomunu o tambula ocikele cimue, o limbuka esilivilo liefendelo liavo liepata.

LIKOLISILAKO OKU CI LINGA OLONJANJA VIOSI

Apata amue a siata oku kuata ovitangi vioku linga efendelo liavo liepata olonjanja viosi.

Olonjali vialua vi pesila otembo yalua kupange woku sanda eteku. Isia umue kofeka yo Mesiku, o tunda konjo yaye kelivala liepandu komẽle, kuenda o tiukila lika konjo kelivala liecelãla kuteke. Olonjanja vimue olonjali vi sukila oku linga esokiyo liwa Liefendelo Liepata, omo liolohongele vikuavo.

Ndaño okuti olonjanja vimue tua siata oku liyaka lovitangi, pole, tu sukila oku likolisilako oco tu kuate Efendelo Liepata olonjanja viosi. Umalẽhe umue londuko Loïs o kuete ekũi lamosi kanyamo, o kasi kofeka yo Togo wa limbuka esilivilo liaco, poku popia hati: “Ndaño okuti olonjanja vimue ka tu fetika selo Efendelo lietu Liepata omo liovina vimue vi tu tateka, pole, tu ci linga.” O pondola oku kuata elomboloko lieci apata amue a siatela oku linga esokiyo oco va linge efendelo liavo kefetikilo liosemana. Momo lie? Momo nda kuli cimue ci va tateka, va linga efendelo liavo keteke likuavo liosemana.

Ocili okuti, “Efendelo Liepata” eliangiliyo limue li panga onepa kefendelo liove ku Yehova. Omo liaco, vosi yetu tu sukila oku eca ‘ovilumba viovimẽla vietu’ olosemana viosi. (Hos. 14:2) Omunu lomunu vepata o sukila oku sanjukila efendelo liavo liepata, momo, ‘esanju lia Yehova, olio ongusu yetu.’—Neh. 8:9, 10.