Ekuatiso Kapata
1. Esambata lia kuatisa ndati apata a va Isareli?
1 Esambata lia kala eliangiliyo liocisola ca Yehova okuti lia kuatisa calua apata. Keteke liaco va Isareli va enda oku puyuka kovopange avo, loku sokolola ovilinga via Yehova kuenda kukamba wavo laye. Kapuluvi aco olonjali via enda oku longisa omãla oco Ocihandeleko ci kale vovitima viavo. (Esin. 6:6, 7) Esambata lia kuatisa afendeli va Yehova oku pitisa kovaso ovina viespiritu osemana losemana.
2. Esambata li tu longisa nye catiamẽla ku Yehova?
2 Koloneke vilo Yehova ka kisika apata oku lava Esambata. Pole, ocihandeleko caco ci tu longisa ovina vimue viatiamẽla ku Suku yetu. Olonjanja viosi eye o lekisa esakalalo kekalo liafendeli vaye konepa yespiritu. (Isa. 48:17, 18) Koloneke vilo, Yehova o lekisa okuti wa kapako afendeli vaye poku sokiya Efendelo Liepata koñolosi.
3. Cipi ocimãho Cefendelo Liepata koñolosi?
3 Cipi Ocimãho Cefendelo Liepata Koñolosi? Tunde kosãi ya Susu yunyamo wo 2009, Elilongiso Lielivulu Vekongelo lia kongeliwa kohongele Yosikola Yupange Wakristão kuenda Kohongele Yupange. Ocimãho caco oku eca kapata epuluvi lioku pamisa ukamba wavo la Yehova poku linga esokiyo liokuti osemana losemana ku lingiwa efendelo liepata. Apata osi va vetiyiwa oku linga elilongiso liavo liepata vuteke kua enda oku lingiwa elilongiso lielivulu vekongelo, oco va lilongise Embimbiliya kuenda oku konomuisa ovina vi kuatisa epata.
4. Anga hẽ efendelo liepata li lingiwa lika vokuenda kuowola yimosi? Ci lombolola.
4 Kosimbu, oco tu ende Kelilongiso Lielivulu Vekongelo, tua sukilile otembo yoku wala, yoku linga ungende, kuenda ovina vikuavo. Valua pokati ketu oco tu ende kohongele yaco tua enda oku pesela ci pitahãla owola yimosi. Omo liepongoloko lia lingiwa kolohongele, cilo uteke waco tu u pesila koku fendela Yehova kumue lepata. Ka tu sukila oku sokiya Efendelo lietu Liepata koñolosi vokuenda kuowola yimosi lika. Pole, oku nõla otembo kua tiamẽla ño kekalo liepata lietu kuenda kovina va sukila.
5. Citava hẽ oku pesela otembo yosi loku lilongisa? Ci lombolola.
5 Citava hẽ Oku Pesela Otembo Yosi Loku Lilongisa? Ci kale olohueli vina ka vi kuete omãla kuenda vina vi kuete, eci vi konomuisila kumosi Ovisonehua, va li vetiya pokati. (Va Rom. 1:12) Va pamisa ukamba wavo. Efendelo Liepata koñolosi li tiamisiwile Kovisonehua. Kuenda omunu lomunu vepata o sukilavo oku linga elilongiso liaye lio pokolika. Noke lielilongiso liepata vosi te va kala pamosi osimbu omunu lomunu amamako oku lilongisa lika liaye, ndeci poku pongiya ovipama violohongele ale oku tanga olorevista. Apata amue a nõlapo oku yika o televisãu koñolosi.
6. Ndamupi elilongiso li lingiwa?
6 Ndamupi Elilongiso li Lingiwa? Ka ci sukila okuti olonjanja viosi elilongiso li lingiwa lapulilo kuenda atambululo. Oco Efendelo Liepata li ende ciwa kuenda lesanju, apata amue a siata oku ci linga ndeci ku lingiwa olohongele vokati kosemana. Ovo va tepa elilongiso volonepa vialua kuenda va ci linga volonjila viñi viñi. Pamue va tangela kumosi Embimbiliya, oku pongiya ovipama violohongele, kuenda ovindekaise vi va kuatisa kupange woku kunda. Kemẽla 6 ku sangiwa olonumbi vimue.
7. Ovituwa vipi olonjali vi sukila oku lekisa?
7 Ovituwa Vipi Olonjali vi Sukila Oku Lekisa? Epata liove li kopa esilivilo kelilongiso nda lia lingiwa locisola kuenda esanju. Olonjanja vimue citava oku lilongisila posamua nda vonjo mu linga owuya. Citava oku puyukapo kamue nda ci sukiliwa. Apata amue va siata oku nyua ovinyua vimue ka vi koluisa noke yelilongiso. Olonjali vi sukila oku yuvula oku pisa ale oku pindisa omãla vokuenda Kuefendelo Liepata kuenda vi sandiliya otembo yikuavo yoku tetulula ocitangi cimue ca votuiwa. Pole, ciwa okuti ocitangi caco ci tetuluiwa pokolika kepuluvi likuavo vosemana oco o yuvule oku kutisa osõi omõla kovaso a vakuavo vepata. Efendelo Liepata koñolosi ka li ka kale epuluvi limue liesumuo pole, tu sukila oku lekisa ocituwa ca Suku ukuesanju una tu fendela.—1 Tim. 1:11.
8, 9. Ovina vipi ovitue viepata vi sukila oku pongiya?
8 Ndamupi Utue Wepata a Pongiya Ovipama? Epata li kopa esilivilo Kefendelo Liepata koñolosi nda utue walio o pongiya ciwa ovipama vi ka lingiwa, loku nõla atosi a sukiliwa oku konomuisiwa. (Olosap. 21:5) Ulume o sukila oku sapela lukãi waye catiamẽla kovipama vi ka lingiwa. (Olosap. 15:22) Ene avitue viepata, momo lie olonjanja vimue ka vu pulisila omãla vene catiamẽla kovisimĩlo viavo? Nda wa ci lingi, vu ka limbuka ovina ovo va sukila kuenda evi vi va sakalaisa.
9 Vokuenda kuolosemana vialua utue wepata ka ka pesela vali otembo yalua yoku pongiya. Epata li ka sanjuka oku kũlĩha okuti va kuete ovipama vimue va siata oku konomuisa osemana losemana kuenda utue wepata ka ka sukila oku pongiya ovipama viokaliye olonjanja viosi. Eye o kuata onima yiwa nda noke Yefendelo Liepata wa pongiya ocipama celilongiso likuavo osimbu a ivaluka ciwa ovina epata li sukila konepa yespiritu. Ovitue viapata amue va siata oku soneha vokapapelo ovina vimue epata li sukila kuenje va vi kapa pocitumãlo cina okuti ci muiwa la vosi, ndeci konjilela. Eci ci ecelela okuti epata li lavoka epuluvi liaco lesanju loku sanda otembo yoku pongiya nda ci sukiliwa.
10. Vana va kasi vepata lina okuti ovo lika Olombangi Via Yehova, va linga ndati Efendelo liavo Liepata koñolosi?
10 Nye ci Popiwa Nda Ame Lika Ndimbangi ya Yehova Vepata? Vana va kasi vepata lina okuti ovo lika Olombangi Via Yehova, eteke Liefendelo Liepata koñolosi, li kala lielilongiso lio pokolika. Velilongiso liaco citava oku tanga Embimbiliya, oku pongiya olohongele, kuenda oku tanga Utala Wondavululi lo Despertai! Akundi vamue velilongiso liavo lio pokolika va siata oku kongelamo ovina via tukuiwa ndeti. Olonjanja vimue ovo va pondola oku laleka ukundi ukuavo ale epata limue oco va lilongisile kumosi Ovisonehua.
11, 12. Asumũlũho api eyilila koku kuata Efendelo Liepata koñolosi olonjanja viosi?
11 Asumũlũho Api Eyilila Koku Linga Efendelo Liepata Olonjanja Viosi? Vakuavitima via sunguluka okuti va litumbika kefendelo liocili, va kuata ukamba la Yehova. Kuenda apata ana a fendelela kumosi, va pamisa omunga yavo. Olohueli vimue via lombolola asumũlũho va kuata hati: “Omo tuakundi va velapo okuti ka tu kuete omãla, tua siata oku kuata esanju keteke Liefendelo Liepata koñolosi. Tua limbuka okuti ukamba tu likuetele pokati kuenda la Isietu wo kilu, wa pamisiwa. Eci tu pasuka keteke lina tua sokiya oku lilongisa kumosi, tu lipulisa ndoco: ‘Ivaluka eci tu linga kuteke wetaili? Tu linga Efendelo Liepata koñolosi!’”
12 Esokiyo lioku kuata efendelo liepata koñolosi li kuatisavo apata oku pitisa kovaso ovina viespiritu. Manji umue o kasi oku tekula omãla vavali lika liaye haeye o talavaya ndukundi wa velapo wa soneha hati: “Kosimbu tua kuata ovitangi poku linga elilongiso lietu liepata. Elilongiso liaco ka lia lingawaile olonjanja viosi, kuenda omo liekavo liange ka tua kuatele esokiyo liwa. Sia tẽlele oku limbuka ndomo ocitangi caco ci tetuluiwa. Omo liaco, ñasi oku vu sonehela oku eca olopandu omo liesokiyo Liefendelo Liepata koñolosi. Tua siata oku lingainga Efendelo Liepata koñolosi loku upako esilivilo lialua.”
13. Nye ci lekisa nda epata liove li kasi oku kuatisiwa lesokiyo eli?
13 Efendelo Liepata koñolosi, ombanjaile yimue ya eciwa la Isietu wo kilu okuti yi pondola oku kuatisa apata, ndeci ca kala Esambata. (Tia. 1:17) Onjila apata a va Isareli va kuama poku lava Esambata, ca lekisile ndomo va kuatisiwa konepa yespiritu. Cimuamue haico okuti, ndomo tu litumbika koku linga efendelo liepata ci lekisa ndomo epata lietu li pondolavo oku kuatisiwa. (2 Va Kor. 9:6; Va Gal. 6:7, 8; Va Kol. 3:23, 24) Nda wa kuama ciwa esokiyo liaco, epata liove li pondola oku popia ndukualosamo wa soneha hati: “Ame puãi, ciwa oku kala ocipepi la Suku. Nda nola Yehova Suku ha lingi ocikolo cange.”—Osa. 73:28.
[Okakasia kemẽla 5]
Efendelo Liepata koñolosi ka li ka kale epuluvi limue liesumuo pole, tu sukila oku lekisa ocituwa ca Suku ukuesanju una tu fendela
[Etosi lia velapo kemẽla 6]
YI SELEKIWE
Olonumbi Vimue Vioku Linga Efendelo Liepata Koñolosi
Embimbiliya:
• Tangeli kumosi ovipama vimue vioku tangiwa Kuembimbiliya vosemana. Poku ci linga, umue a tange olondaka via tukuiwa lomunu umue vulandu waco, kuenda vakuavo va tange olonepa viomanu vakuavo.
• Lingi ovindekaise viovina via tangiwa Vembimbiliya.
• Omunu lomunu vepata a li pongiye oku tanga ocipama cimue Cembimbiliya kuenda a sonehe epulilo limue ale avali a nõla voku tangiwa kuaco. Noke konomuisili kumosi apulilo aco osi.
• Osemana losemana soneha ovinimbu vimue Viembimbiliya kuenda likolisilako oku vi patekela loku vi lombolola. Seleka otupapelo wa soneha kuenda pitulula ovinimbu viaco osemana losemana oco o kũlĩhĩse etendelo liovisonehua o tẽla oku ivaluka.
• Osimbu o yevelela olokasete mua ngalavaliwa oku tangiwa Kuembimbiliya, kuama Vembimbiliya liove.
Olohongele:
• Pongiyili kumosi olonepa vimue violohongele.
• Imbili kumosi ovisungo Viusoma via sokiyiwila ohongele yosemana yi kuamamo.
• Nda umue vepata o kuete onepa Kosikola Yupange Wakristão ale ocindekaise Kohongele Yupange, sapeli ndomo yi ka lingiwa kuenda lingi ocindekaise kovaso epata.
Ovina vi Sukiliwa Vepata:
• Konomuisi ovipama vimue velivulu Os Jovens Perguntam, ale elivulu Aprenda do Grande Instrutor.
• Lingi ovindekaise vi lekisa ndomo ku tetuluiwa ovitangi vimue vi votuiwa kosikola.
• Lingi ovindekaise vina okuti olonjali vi linga ocikele comãla kuenda omãla va linga ocikele colonjali. Omãla va konomuisa ocipama cimue noke va lomboluilako olonjali.
Upange Woku Kunda:
• Pongiyi ovindekaise vi ka lingiwa kesulilo liosemana.
• Sapeli eci catiamẽla kovimãho epata li pondola oku tẽlisa oco va vokiye upange wavo woku kunda vokuenda Kuonjivaluko ale koloneke viepuyuko.
• Ecelela okuti omunu lomunu vepata vokuenda kuakukutu amue a konomuise ndomo a tambulula apulilo a votuiwa kupange woku kunda, noke lingi ocindekaise cimue.
Olonumbi Vikuavo:
• Tangeli kumosi ocipama cimue colorevista viokaliye.
• Omunu lomunu vepata a tange ocipama a sola vali vorevista yokaliye, kuenda a lombolole ulandu waco.
• Olonjanja vimue laleka ukundi umue ale olohueli vimue Kefendelo liene Liepata konõlosi, kuenda nda citava lingi apulilo amue kokuavo.
• Taleli kumosi ovideo yimue kuenda sapeli esilivilo wopiko.
• Konomuisili kumosi olonepa vi sangiwa vo Despertai! losapi hati, “Os Jovens Perguntam” ale “Para Considerar em Família.”
• Konomuisili kumosi olonepa vi sangiwa Vutala Wondavululi losapi hati, “Longisa Omãla Vove” ale “Kamalẽhe Vetu.”
• Tangeli kumosi kuenda lombololi ovinimbu vimue vio Anuáriu ale elivulu liokaliye lia sandekiwa kohongele yofeka ya sulako.
• Noke yohongele yofeka ale yimbo, pitululi atosi a velapo.
• Tali oviluvo via Yehova kuenda vanguli eci tu lilongisilako catiamẽla ku Yehova.
• Lingili kumosi ovina ndeci, oku linga oviluvialuvia, o mapa, kuenda ográfico.