Anga Hẽ Suku Wa Kapako Ekalo Liove?

Ca sungulukile hẽ ku Daviti oku lavoka okuti Suku o u kapako? Anga hẽ Suku wa ku kapako? Omanu valua ka va tava okuti Suku ukuonenewosi wa va kapako. Momo lie?

Esunga limue lieli okuti, ekalo liomuenyo wa Suku lia velapo omanu. Kocitumãlo a kasi, “olofeka via soka ndetosi liovava vociyenjo, kuenje via tendiwa ndoneketela vombalãsa; o yelula ovifuka viosi ndokaneketela.” (Isaya 40:15) Usonehi umue okuti ka kolela ketavo, wa popia ndoco: “Oku tava okuti kuli Suku umue wa velapo okuti o ku kuetele ocikembe haeye wa ku kapako, uveke.”

Handi vali, omanu vamue va sima okuti Suku ka va kapeleko omo liovilinga viavo. Ulume umue o tukuiwa, Jim, wa popia hati: “Nda siata oku likutilila oco ñuate ombembua kuenda esuluviko, pole, noke yokatembo kamue haico onyeño yange yi tiuka. Noke nda kuata ovisimĩlo viokuti nda kala ondingaĩvi kuenje Suku ka tẽla vali oku ndi kuatisa.” Anga hẽ, Suku o kasi calua ocipãla lomanu okuti ka tẽla oku tu kapako? Suku wa tenda ndati omanu ka va lipuile? Nda Suku ka li situluile, lomue omunu nda wa tẽla oku popia catiamẽla kokuaye loku tambulula apulilo ava. Ondaka ya Suku yi sangiwa Vembimbiliya lina lia eciwa komanu, yi tu sapuila okuti eye ka kasi ocipãla letu okuti ka tẽla oku kapako omunu lomunu. Embimbiliya li popia ndoco: “Eye ka kasi ocipãla letu vosi omunu lomunu.” (Ovilinga 17:27) Vovipama vikuãla vikuãimo, tu ka kũlĩhisa eci Suku a tu sapuila catiamẽla kokuaye ndomo a kapako omanu ndomo a siata oku ci lekisa.