APULILO EMBIMBILIYA A TAMBULUIWA
Anga hẽ ovangelo va pondola oku tu kuatisa?
Ndeci ovangelo va kuatisa Daniele ukuenje wa Suku ukuekolelo kosimbu, koloneke vilo va kuatisavo omanu lolondaka viwa
Yehova Suku wa lulika olohuluwa vialua viovangelo osimbu handi ka lulikile omanu. (Yovi 38:4, 7) Ovangelo, oviluvo viespiritu vi kuete unene koku vumba Suku, okuti olonjanja vimue va enda oku tumiwa oco vi songuile kuenda oku teyuila afendeli vaye palo posi. (Osamo 91:10, 11) Koloneke vilo, ovangelo va kasi oku kuatisa omanu oco va yeve olondaka viwa vi kundiwa lolondonge via Yesu.—Tanga Esituluilo 14:6, 7.
Anga hẽ tu sukila oku pinga ekuatiso liovangelo vohutililo? Sio. Ohutililo onepa yimue yefendelo yi tiamisiwila lika ku Suku. (Esituluilo 19:10) Omo okuti ovangelo afendeli va Suku, va tambula olonumbi vi tunda kokuaye okuti komanu hakoko. Omo liaco, tu sukila oku likutilila lika ku Suku vonduko ya Yesu.—Tanga Osamo 103:20, 21; Mateo 26:53.
Kuli hẽ ovangelo vãvi?
Ovangelo va lulikiwavo lelianjo lioku nõla kuenda oku tepisa eci ciwa leci cĩvi ndomanu. Pole o vangelo vamue va nõlapo oku sinila Suku. (2 Petulu 2:4) Satana eye ungelo watete pokati kavo, noke ovangelo vakuavo va kuamavo ongangu yaye kuenje va linga olondele. Oku sulako va tundisiwa kilu kuenje va imbiwa kilu lieve.—Tanga Esituluilo 12:7-9.
Evokiyo lievĩho kuenda ungangala tunde ko 1914, vi eca uvangi wokuti Suku ndopo o ka malako ovilinga via Satana kuenda violondele. Noke o ka tumbulula ongongo ndeci ya kala kefetikilo.—Tanga Esituluilo 12:12; 21:3, 4.