Ocili Catiamẽla Kovangelo

Ndeci Suku Espiritu, ka tu pondolavo oku mola angelo momo “ka va kuete etimba pamue akepa.” Angelo vakuekolelo va kasi kilu kuenda va talavayela kumosi la Suku.—Luka 24:39; Mateo 18:10; Yoano 4:24.

Kosimbu angelo va enda oku molẽha ndomanu oco va tẽlise ocikele Suku a va ĩhile palo posi kuenje noke yoku tẽlisa ocikele caco va enda oku lipongolola vetimba liespiritu.—Olonganji 6:11-23; 13:15-20.

Ndaño okuti Vembimbiliya ovangelo va tukuiwa okuti alume kuenda eci va enda oku iya palo posi va enda oku iya letimba lialume, pole ka kuli uvangi u lekisa okuti ovo alume ale akãi. Ovo ka va kuela ale oku cita omãla. Omo liaco, ovangelo ka va kaile tete posi ndomanu okuti va kala oloñaña, omãla ale akulu. Angelo va lulikiwa la Yehova kuenje Embimbiliya li va tukula okuti “omãla va Suku.”—Yovi 1:6; Osamo 148:2, 5.

Embimbiliya poku tukula “alimi omanu la-a ovangelo,” li lekisa okuti ovangelo va siatavo oku vangula. Ndaño okuti Suku wa siata oku vetiya ovangelo oco va sapele lomanu, pole, ka ecelela okuti tu va fendela ale oku likutilila kokuavo.—1 Va Korindo 13:1; Esituluilo 22:8, 9.

Kuli ovangelo valua okuti etendelo liavo li pitahãla olohuluwa.a—Daniele 7:10; Esituluilo 5:11.

Ovangelo va kuete ‘unene wa piãla,’ kuenda uloño walua okuti womanu u sule. Ovo va pondola oku linga ungende walua voluali luosi.—Osamo 103:20; Daniele 9:20-23.

Ndaño okuti va kuete uloño walua kuenda unene, ovangelo va kuete ovina va pondola oku linga levi ka va pondola oku linga kuenda ka va kũlĩhĩle ovina viosi.—Mateo 24:36; 1 Petulu 1:12.

Ovangelo va kuete ovituwa ndevi via Suku kuenda va kuete elianjo. Ovo va pondola oku nõla oku linga eci ciwa leci cĩvi ndeci omanu. Ci sumuisa calua momo ovangelo vamue va nõlapo oku sinĩla Suku.—Yuda 6.