OSAPI YO KOÑOÑO | O PONDOLA OKU KUATA UKAMBA LA SUKU
Ka Kuli Ocina Cikuavo ca Velapo Komuenyo
Nye o sukila oku linga oco o kuate ukamba la Suku? Tu kũlĩhisa atosi amue o pondola oku kuama oco o kuate ukamba laye:
Kũlĩha loku tukula onduko ya Suku, Yehova.
Sapela laye olonjanja viosi poku likutilila kuenda oku li longisa Embimbiliya.
Likolisilako oku linga ovina vi sanjuisa Yehova.
Linga ukamba la Suku poku tukula onduko yaye, likutilila kokuaye, lilongisa Ondaka yaye, linga ovina vi u sanjuisa
Anga hẽ poku linga ovina via tukuiwa ndeti, ci lekisa okuti o kasi oku linga eci ci sukiliwa koku kuata ukamba la Suku? Kuli hẽ olonepa vimue o sima okuti o sukila oku vi mioñolola? Ocili okuti, ci sukila oku likolisilako, pole kũlĩhisa onima yi yililako.
Jennifer wo ko Estados Unidos, wa popia hati: “Oco omunu a kuate ukamba la Suku, ci sukila elikolisilo lialua. Pole, elikolisilo liaco, li nena asumũlũho alua ndeci: oku kolela ku Suku, oku kũlĩha ciwa ovituwa viaye, kuenda oku u sola. Ka kuli ocina cikuavo ca velapo komuenyo!”
Nda o yongola oku kuata ukamba la Suku, Olombangi Via Yehova vi ka sanjukila oku ku kuatisa. Ovo va ka linga eliangiliyo lioku ku longisa Embimbiliya ocali. Handi vali, wa lalekiwavo oku enda kolohongele Vonjango Yusoma muna o ka sanga omanu va kuete ukamba la Suku.a Poku ci linga o ka liyeva ndukualosamo wa popia hati: “Ame puãi, ciwa oku kala ocipepi la Suku.”—Osamo 73:28.
a Oco o kuate elilongiso Liembimbiliya ale oku sanga Onjango Yusoma yi kasi ocipepi, vangula lomunu wa ku ĩha o revista eyi ale kũlĩhisa vonumbi yetu yo Internet www.jw.org, kuenda tala pondaka EFETIKILO vonumbi VANGULA LETU tioka kemẽla.