Momo Lie o Sukilila Oku Amamako?

1. Ndamupi wamamako oku kuatisiwa lelilongiso Liembimbiliya?

Ocili okuti ekonomuiso lia lingiwa ndeti lialongiso Embimbiliya, lia pamisa ocisola cove ku Yehova. Ocisola caco ci sukila oku amamako oku pamisiwa. (1 Petulu 2:2) Elavoko liove liomuenyo ko pui, lia tamba koku amamako oku kuata ukamba la Suku poku lilongisa Ondaka yaye.—Tanga Yoano 17:3; Yuda 21.

Osimbu wamamako oku vokiya ukũlĩhĩso wove watiamẽla ku Suku, ekolelo liove li ka pamisiwa. Ekolelo liaco li ka ku kuatisa oku sanjuisa Suku. (Va Heveru 11:1, 6) Li ka ku vetiyavo oku likekembela akandu ove kuenda oku linga apongoloko komuenyo.—Tanga Ovilinga 3:19.

2. Ukũlĩhĩso wove watiamẽla ku Suku u pondola oku kuatisa ndati vakuene?

Omo okuti, vosi yetu tu yongola oku kunda olondaka viwa, ove o ka kuata onjongole yoku sapuilako vakuene ovina o kasi oku lilongisa. Osimbu wamamako oku lilongisa Embimbiliya, o ka kũlĩha ndomo o talavaya lalio poku situlula ekolelo o kuetele Yehova kuenda kolondaka viwa.—Tanga Va Roma 10:13-15.

Omanu valua va siata oku fetika oku kunda olondaka viwa poku sapuilako akamba vavo ale vakuepata liavo ovina va lilongisa. Kuata utate poku ci linga. Ku ka va sapuile okuti etavo liavo liesanda, pole, va lomboluila olohuminyo via Suku. Ivalukavo okuti, olonjanja vimue omanu va luluvalela calua kovituwa viove okuti kovina o popia ci sule.—Tanga 2 Timoteo 2:24, 25.

3. Ukamba upi o pondola oku kuata la Suku?

Oku lilongisa Ondaka ya Suku ci ku kuatisa oku kula kespiritu. Kuenje o kuata ukamba uwa la Yehova. O pondola oku tiamẽla kokuaye ndomunu ukuepata liaye.—Tanga 2 Va Korindo 6:18.

4. O pondola ndati oku amamako kespiritu?

Ove o pondola oku kula kespiritu poku amamako oku lilongisa Ondaka ya Suku. (Va Heveru 5:13, 14) Pinga Kombangi yimue ya Yehova oco a lilongise love Embimbiliya lekuatiso lielivulu losapi hati, Embimbiliya li Longisa Nye? Osimbu wamamako oku lilongisa Ondaka ya Suku o ka kuata esanju komuenyo.—Tanga Osamo 1:1-3; 73:27, 28.

Olondaka viwa, vi tunda ku Yehova, Suku yesanju. Ove o pondola oku kuata ukamba laye poku likongela lomanu vaye. (Va Heveru 10:24, 25) Osimbu wamamako oku sanjuisa Yehova, o ka kuata omuenyo wa velapo okuti, omuenyo ko pui. Oku kuata ukamba la Suku, oco ocina ca velapo o pondola oku linga.—Tanga 1 Timoteo 1:11; 6:19.