APULILO EMBIMBILIYA A TAMBULUIWA
Omãla va li longisa ndati oku sola Suku?
Kuama ovolandu a lekisa ndomo ovina via lulikiwa, oco o kuatise amãla vove oku kũlĩha Suku kuenda oku u sola
Omãla vove va pondola lika oku li longisa oku sola Suku, nda va limbuka okuti kuli Suku kuenda eye o va sole. Oco va sole Suku, ovo va sukila oku u kũlĩha. (1 Yoano 4:8) Ovo va sukila oku kũlĩha ovina ndeci: Cipi ca kala ocipango ca Suku poku lulika omunu? Momo lie Suku a ecelela ohali? Nye Suku a ka lingila omanu kovaso yoloneke?—Tanga Va Filipoi 1:9.
Oco o kuatise omãla vove oku sola Suku, ove muẽle o sukila oku lekisa kokuavo okuti, o sole Suku. Eci va limbuka okuti o kasi oku ci linga, va ka kuama ongangu yove.—Tanga Esinumuĩlo 6:5-7; Olosapo 22:6.
O vetiya ndati utima womãla vove?
Ondaka ya Suku yi kuete unene. (Va Heveru 4:12) Omo liaco, kuatisa omãla vove oku lilongisa catiamẽla ku Suku. Yesu oco a vetiye ovitima viomanu wa linga apulilo, wa yevelela kuenda wa lombolola Ovisonehua. Oco o vetiye utima womãla vove, kuama ongangu ya Yesu yoku longisa.—Tanga Luka 24:15-19, 27, 32.
Handi vali, oku va lomboluila ovolandu a lekisa ndomo Suku a tata omanu kosimbu ci kuatisa omãla oku u kũlĩha kuenda oku u sola. Alivulu a pondola oku ku kuatisa oku ci linga a sangiwa vo www.jw.org.—Tanga 2 Timoteo 3:16.