OSAPI YO KOÑOÑO | O YONGOLA HẼ OKU LILONGISA EMBIMBILIYA?

Esokiyo Lioku Longisa Embimbiliya Komanu

Olombangi Via Yehova via kũlĩhiwa omo liupange wavo woku kunda. Pole, ove wa kũlĩhavo okuti etu tu kuete esokiyo lioku longisa omanu Embimbiliya koluali luosi?

Kunyamo wo 2014, ci panda 8.000.000 Kolombangi Via Yehova vi sangiwa kueci ci soka 240 kolofeka, via siata oku longisa Embimbiliya kueci ci panda 9.500.000 komanu olosãi viosi.a Etendelo liavokiya komanu va lilongisa Embimbiliya letu li sokisiwa letendelo liomanu va sangiwa kueci ci soka 140 kolofeka.

Olombangi Via Yehova oco vi tẽlise upange woku longisa,via sandeka eci ci pitãhala ohulukãi yimosi Yambimbiliya, alivulu, olorevista kuenda alivulu akuavo a kuatisa oku lilongisa Embimbiliya kueci—ci panda 700 kalimi! Alikolisilo aco oku sandeka alivulu kalimi alua, a siata oku kuatisa omanu oku lilongisa Embimbiliya kelimi va yongola.

“Lalimue eteke nda solele oku tanga kosikola. Pole nda sola calua elilongiso eli. Kuenda ovina nda lilongisa via mbetiya calua!”—Katlego, Afrika do Sul.

“Velilongiso liaco mua kongela apulilo ange osi kuenda ovina vikuavo.”—Bertha, Mesiku.

“Elilongiso Liembimbiliya lia lingiwa konjo yange votembo ya ndi sungulukila. Eci oco nda yonguile!”—Eziquiel, Brasil.

“Elilongiso liaco olonjanja vimue lia enda oku tumãla 15 ale 30 kakukutu—olonjanja vikuavo lia enda oku tumãla otembo nda panga.”—Viniana, Australia.

“Elilongiso liaco lia—lingiwa ocali kuenda lia ñomohisa!”—Aimé, Benin.

“Ulongisi wange Wembimbiliya wa lekisa epandi kuenda esunguluko. Tua linga ukamba uwa.”—Karen, Irlanda do Norte.

“Omanu valua va lilongisa Embimbiliya, pole ka va lingile Olombangi Via Yehova.”—Denton, Inglaterra.

A TAMBULULO KAPULILO A SIATA OKU LINGIWA A TIAMẼLA KESOKIYO LIETU LIOKU LONGISA EMBIMBILIYA

Esokiyo liaco li kasi ndati?

Tu kũlĩhĩsa atosi a litepa Embimbiliya, kuenda tu konomuisa ovinimbu Viembimbiliya vi lombolola ovolandu aco. Kũlĩhĩsa a tambululo Embimbiliya kapulilo ndeci: Suku helie? Wa tuwa ndati? Anga hẽ o kuete onduko? O kasi pi? Citava oku linga ukamba laye? Pole, ocitangi oku kũlĩha a pa pa sangiwa a tambululo aco Vembimbiliya.

Oco tu kuatise omanu oku sanga a tambululo, tua siata oku kuama elivulu likuete 224 kamẽla losapi, Embimbiliya Lilongisa Nye?b Elivulu eli lia pangiwila oku kuatisa omanu oco va kuate elomboloko lieci Embimbiliya lilongisa. Mua kongelavo ovipama vi lombolola catiamẽla ku Suku, Yesu Kristu, ohali yomanu, epinduko, ohutililo kuenda ovolandu alua.

Otembo yi pi kuenda pi elilongiso liaco li lingiwila?

Elilongiso liaco li lingiwa votembo kuenda kocitumãlo o yongola.

Elilongiso li lingiwa vakukutu añami?

Omanu valua va siata oku sokiya owola yimosi yoku lilongisa Embimbiliya vosemana. Pole omunu eye o nõla akukutu a yongola oku lilongisa. Etu tu kuama esokiyo liove. Vamue va lilongisa ño 10 ale 15 kakukutu vosemana.

Ciñami omunu a sukila oku feta poku lilongisa?

Alivulu kuenda elilongiso liaco, ka vi fetiwa. Eci ci likuata lolondaka Yesu a sapuila olondonge viaye hati : “Omo wa tambuli ocali, oco ecivo ocali.”—Mateo 10:8.

Elilongiso liaco liambata oloneke viñami?

Ca tamba ño kokuove. Elivulu Embimbiliya Lilongisa Nye? li kuete 19 kovipama. O pondola oku lilongisa ovipama viosi votembo o yongola.

Ndi sukila hẽ oku linga Ombangi ya Yehova?

Sio. Momo tua kũliha okuti omunu lomunu o kuete elianjo lioku nõla eci a yongola oku tava. Eci omunu a kuata ukũlĩhĩso Wembimbiliya, eye muẽle o nõla.

Pi ndi pondola oku sanga olonumbi vikuavo?

Vonumbi yo jw.org mu sangiwa olonumbi viwa viatiamẽla kalongiso kuenda kovopange Olombangi Via Yehova.

Ndi kuata ndati elilongiso Liembimbiliya?

Linga epingilo liove vo www.jw.org.
Soneha vonumbi yi sangiwa kemẽla liavali liorevista eyi.
Sanda Olombangi Via Yehova vi kasi posongo yove. Tala ponumbi yokuti “Olombangi Via Yehova” kulala watendelo o telefone o pocitumãlo.

a Elilongiso Liembimbiliya, lia siata oku lingiwa komunu umosi ale kovimunga vitito viomanu.

b Lia sandekiwa Lolombangi Via Yehova. Kua pangiwa eci ci pitahãla 230 kolohuluwa vialivulu kueci ci pitahãla 260 kalimi.

EKUATISO KAPATA

“Eci ukãi wange a fetika oku lilongisa Embimbiliya nda limbuka a pongoloko a kala oku linga. Ekalo lietu vepata lia mioñoloha. Omo lionjongole yoku mõla eci eye a kala oku lilongisa, nda fetikavo oku lilongisa. Eci nda lilongisa ca ñuatisa oku kala omunu uwa. Oku lilongisa Embimbiliya ca kuatisa epata liange oku likuata omunga.”—Eziquiel.

“Eci nda fetika oku lilongisa Embimbiliya nda siapo ocituwa cange colodroga, oku nyua calua, kuenda nda lilongisa oku likandangiya konyeño. Onjo yange ya yela kuenda ovikuata via kapiwa apa vi sesamẽla. Nda sanjukila epata liange kuenda ndi sole oku linga ovina vi va sanjuisa. Cilo ñuete esanju lia lua.”—Karen.

“Omanu vamue va siata oku ndi sepula omo lioku lilongisa Embimbiliya. Pole ulume wange wa ñuatisa konjila nda nõla, poku popia hati: ‘Si lisakalaisa leci omanu va kasi oku popia. Ca velapo kokuange oku mõla epongoloko liwa o—kasi oku linga. Amamako leci o kasi oku linga.’ Epata lietu lalimue eteke lia kuatele esanju nda cilo!”—Viniana.