Elilongiso Liembimbiliya li Lingiwa Lolombangi Via Yehova li Lomboloka Nye?
Olombangi Via Yehova vi kuama onjila yimue yiwa yi ku kuatisa oku lilongisa ovina vi sangiwa Vembimbiliya. Esokiyo lietu lioku lilongisa Embimbiliya, li pondola oku ku kuatisa:
Oku kuata esanju komuenyo
Oku kala ekamba lia Suku
Oku lilongisa ovina Embimbiliya lia likuminya kovaso yoloneke
Ponepa yilo
Nye ci lingiwa velilongiso limue Liembimbiliya?
Ombangi yimue ya Yehova yi ku kuatisa oku li longisa Embimbiliya pocakati colosapi. Lekuatiso lielivulu Sanjukili Omuenyo Otembo ka yi Pui! o pondola oku lilongisa kamue kamue eci Embimbiliya li longisa kuenda ndomo olio li ku kuatisa. Oco o kuate elomboloko ndomo elilongiso liaco li lingiwa, tala ovideo yi kuãimo.
Ndi sukila hẽ oku feta oco ndi lilongise Embimbiliya?
Sio. Olombangi Via Yehova vi pokola konumbi Yesu a eca kolondonge viaye yokuti: “Omo wa tambuli ocali, ecivo ocali.” (Mateo 10:8) Handi vali, ovimalẽho tu longisa lavio, ka vi fetiwa muna mua kongela Embimbiliya kuenda elivulu losapi, Sanjukili Omuenyo Otembo ka yi Pui!
Elilongiso liaco li tumãla otembo yiñami?
Elivulu liaco li kuete 60 kovipama. Omanu valua va sole oku lilongisa ocipama cimosi, ale vivali vosemana, pole, ove o nõla.
Ndi fetika ndati?
1. Soneha vocicapa coku pinga elilongiso ci kasi vo internet. Alomboluilo o soneha vocicapa caco, a ka ecelela okuti ombangi yimue yi sapela love oco yi tambulule epingilo liove.
2. Ombangi yimue ya Yehova yi ka sapela love. Ombangi yaco yi ka ku lomboluiwa ndomo ku lingiwa elilongiso Liembimbiliya kuenda yi ka ku kuatisa oku tambulula apulilo osi o kuete.
3. Kavali kene vu pondola oku linga esokiyo. Elilongiso li pondola oku lingiwa polo la polo, pocakati covideochamada, cotelefone, cukanda, ale vesapulo. Olonjanja vialua elilongiso liaco li tumãla eci ci panda, ale eci ci pitahãla owola. Pole, li pondola oku lingiwa vokuenda kuotembo yalua, ale votembo yimue yitito; cosi catamba ño kesokiyo liove.
Citava okuti ndi lilongisa onjanja yimosi oco ndi tale ndomo ci lingiwa?
Citava. Oco o ci linge, soneha vocicapa coku pinga elilongiso Liembimbiliya ci kasi vo internet. Eci Ombangi yimue ya Yehova yi sapela love, u lomboluila okuti, ove o yongola ño oku kũlĩha ndomo ku lingiwa elilongiso liaco. Ombangi yaco yi ka talavaya lombrochura yi kuete ovipama viatete vitatu vielivulu Sanjukili Omuenyo Otembo ka yi Pui! Kuenje o ka limbuka nda o sole ale sio elilongiso liaco.
Nda nda tava oku lilongisa Embimbiliya, omunu umue o pondola oku ndi kisika oco ndi kale Ombangi ya Yehova?
Sio. Olombangi Via Yehova vi sole oku longisa Embimbiliya komanu vakuavo. Pole, lalimue eteke va kisika omunu umue oku iñila ketavo liavo. Etu tua siata lika oku longisa eci Embimbiliya li popia, tu lekisa esumbilo komoko omunu lomunu a kuete yoku nõla eci a tava.—1 Petulu 3:15.
Citava okuti ndi lilongisa Lembimbiliya ndi kuete?
Oco, citava oku lilongisa Lembimbiliya o yongola. Etu tu sole oku talavaya Lembimbiliya li Kola—Epongoluilo Lioluali Luokaliye omo okuti, lia suapo kuenda lia leluka oku kuata elomboloko lialio. Pole, tua kũlĩha okuti, omanu va nõlapo oku talavaya Lembimbiliya limue likuavo.
Citava okuti ndi lalekavo omunu umue oco a lilongise lame?
Oco. Citava okuti o laleka vosi vepata liove, ale akamba vove.
Nye ci popiwa nda nda lilongisile ale Embimbiliya Lolombangi Via Yehova? Citava okuti ndi lilongisa vali?
Citava. O pondola oku sanjukila oku kũlĩha okuti, kaliye tu kuete elivulu liokaliye lioku lilongisa Embimbiliya. Olio lia sokiyiwa ndomo ci likuata lesukila liomanu koloneke vilo. Olio lia litepa calua lalivulu akuavo tua enda oku talavaya lao. Velivulu liaco, muli oviluvialuvia vialua kuenda olovideo okuti, vi kuatisa kelilongiso.
Citava okuti ndi lilongisa Lembimbiliya lika liange okuti si ci lingi lekuatiso Liombangi yimue ya Yehova?
Citava. Pole, omanu valua va sima okuti, va kuata elomboloko liwa lekuatiso liomunu ukuavo. Ka kuli ocitangi oku fetika oku lilongisa lika liove. Nda wa nõlapo onjila eyi, tala ponepa Ovimalẽho Vioku Lilongisa Embimbiliya. O sangapo ovimalẽho vimue ndeci:
Elilongiso Liembimbiliya vo internet. Elilongiso liaco li ka ku kuatisa oku sanga atambululo apulilo amue a velapo komuenyo ndeci: Suku helie? Momo lie ku kasilili evĩho kuenda ohali yalua? Suku o ka malako ndati evĩho kuenda ohali?
Olovideo Viembimbiliya. Olovideo viaco vitito, vi tambulula apulilo a kuete esilivilo Embimbiliya.
Apulilo Atambuluiwa Lembimbiliya. Ovipama viaco vi tambulula apulilo alua atiamẽla Kembimbiliya.
Ovinimbu Viembimbiliya Via Lomboluiwa. Limbuka elomboloko liovinimbu Viembimbiliya via kũlĩhĩwa ciwa.