APULILO EMBIMBILIYA A TAMBULUIWA
Nye omanu va lavoka kovaso yoloneke?
Olofa via yesu via angiliya ndati ekalo limue okuti omanu va ka li sola pokati?
Ocili okuti, uloño womanu u ka amamako oku li vokiya. Anga hẽ va ka tẽla oku sokiya ekalo limue okuti omanu va ka likapako? Sio. Koloneke vilo, oluali lua vialiwa lepela kuenda ocipululu. Pole, ocipango ca Suku, oco ocina ca velapo kepata liomanu.—Tanga 2 Petulu 3:13.
Ondaka ya Suku yi lombolola ekalo limue voluali kovaso yoloneke okuti, omanu va ka li sola pokati. Omanu va ka kolapo kuenda lomue o ka va lingisa usumba.—Tanga Mika 4:3, 4.
Epela li ka nyõliwa ndati?
Suku ka lulikile omunu lonjongole yoku lekisa epela. Pole omunu watete poku nõlapo oku sinĩla Suku, wa pumba oku li pua kuaye. Etu tua piñala ocituwa caco kokuaye. Suku o ka tuma Yesu oco a tumbulule ekalo liomanu lioku lipua.—Tanga Va Roma 7: 21, 24, 25.
Ndomo ci li kuata locipango ca Suku, Yesu wa fa ndocilumba kuenda wa imula ovina via tunda kesino liulume watete. (Va Roma 5:19) Omo liaco, Yesu wa linga eliangiliyo li komohisa liokovaso yoloneke eci omanu va ka yovoka konjongole yoku linga eci civĩ.—Tanga Osamo 37:9-11.