APULILO EMBIMBILIYA A TAMBULUIWA
Uvĩ wa tunda pi?
Helie wa vetiya yesu oku linga eci ka ca sungulukile?—Mateo 4:8-10
Omanu va sanjukila oku kala vakuambembua, vakuacili kuenda vakuahenda. Momo lie, tua siatela oku mõla ungangala, ekambo liesunga kuenda umondi? Asapulo a sumuisa a siata. Kuli hẽ umue wa siata oku vetiya vakuavo oku linga ovina ka via sungulukile?—Tanga 1 Yoano 5:19.
Suku wa lulika hẽ omanu lonjongole yoku linga eci cĩvi? Sio, Yehova Suku wa lulika omanu lesetahãlo liaye, lonjongole yoku setukula ocisola caye. (Efetikilo 1:27; Yovi 34:10) Pole, Suku wa lulika omanu lelianjo lioku nõla. Eci olonjali vietu viatete via nõlapo oku linga eci ka ca sungulukile, ovo va likala oku kuama ongangu ya Suku kuenda va linga vakuakandu. Omo liaco, tua piñala kokuavo onjongole yoku linga ekandu.—Tanga Esinumuĩlo 32:4, 5.
Uvĩ u ka amamako hẽ pokati ketu?
Suku o yongola okuti tu likolisilako oku yuvula oku linga eci ka ca sungulukile. (Olosapo 27:11) Omo liaco, eye o tu longisa ndomo tu yuvula oku linga eci cĩvi kuenda ndomo tu sanga esanju liocili. Pole, otembo yilo ka tu pondola oku setukula ocisola ca Suku lonjila yimue yalipua.—Tanga Osamo 32:8.
Ndaño evĩho lia siata calua koloneke vilo pole, Suku o kasi ño oku li ecelela vokatembo kamue oco omanu valua va mole onima yi tunda kevĩho. (2 Petulu 3:7-9) Omo liaco, ndopo vongongo mu keyuka omanu va sanjuka haivo va pokola ku Suku.—Tanga Osamo 37:9-11.