Vosi Yetu Tu Sukila Elembeleko

Ivailuka eci wa kupukile eci wa kala omõla? Citava okuti wa lilemẽha peka ale oku likuangula polongolo. Wa mola ndomo ina yove a ku lembeleka? Pamue eye wa sukula epute liaco kuenda wa kapapo ovihemba. Ove wa kala oku lila, pole, olondaka viaye vielembeleko kuenda ndomo a ku angata, ca ku kuatisa okuti o liyeva ciwa. Vokuenda kuotembo yaco, olonjanja viosi wa enda oku tambula elembeleko.

Pole, ovina via fetika oku pongoloka osimbu tua kala oku kula. Ovitangi via livokiya kuenda ca tĩla oku sanga elembeleko. Ocili okuti ovitangi viakulu ka vi tetuluiwa lovihemba, ale loku angatiwa la ina. Kũlĩhĩsa ovolandu amue.

• Onjanja yimue wa liyakele ale levalo lioku tundisiwa kupange? Julian eci a tundisiwa kupange wa popia hati, evalo liaco lio kokela esumuo lialua. Eye wa lipula hati: ‘Ndi ka tekula ndati epata liange?’ ‘Momo lie va ndi tendela okuti si kuete esivilo kupange, noke yoku talavayako anyamo alua?’

• Pamue o yevite esumuo omo olohuela viove via nyõleha. Raquel wa lombolola hati: “Eci tua litepa lulume wange vocipikipiki okuti pa pita ale 18 kolosãi, nda yeva esumuo lialua. Ca kala ndu okuti utima wange wa tepiwa muvali. Nda yeva evalo ketimba kuenda vutima. Kuenje ca ndi sakalaisa calua.”

• Pamue o liyaka locitangi coku vela ndu okuti uveyi waco ka u kasi oku kaya. Olonjanja vimue citava okuti o liyeva ndomo Yovi a lisiõsiõla poku popia hati: “Nyehula omuenyo wange. Si yongola oku kala ño lomuenyo.” (Yovi 7:16) Citava okuti o kuata ovisimĩlo ndevi viulume umue o tukuiwa hati, Luis, o kuete ci pitahãla 80 kanyamo, wa popia hati: “Olonjanja vimue ndi liyeva ndu okuti ñasi ño oku kevelela oku fa.”

• Pamue o yongola oku lembelekiwa omo liolofa via umue ngandiove. Robert wa lombolola hati: “Eci omõlange a fa vocilunga cimue combalãu, kefetikilo sia tavele. Kuenje, kueya evalo ndeli Embimbiliya li sokisa loku tomiwa losipata yisõvi.”​—Luka 2:35.

Robert, Luis, Raquel kuenda Julian, va sanga elembeleko ndaño lovitangi va liyaka lavio. Ovo va sanga elembeleko liaco Komunu wa velapo koku li eca okuti, Suku Tõlo. Eye eca ndati elembeleko? Anga hẽ eye o ka ecavo elembeleko o sukila?