Oku Sanda Ombanjaile ya Velapo

Ka ca lelukile oku sanga ombanjaile yimue yiwa yoku eca komunu umue. Momo omunu o yi tambula eye o pondola oku lekisa esilivilo liombanjaile a tambula. Omanjaile omunu umue a tenda okuti yi kuete esilivilo citava okuti, komunu ukuavo ka yi kuete esilivilo.

Umalẽhe umue o pondola oku tenda o telefone a tambula ndombanjaile yimue ya valapo. Pole, omunu umue ukulu, ukuasi a tambula o pondola oku u tenda ndocipiñalo cepata. Kapata amue, ci kaile amalẽhe ale akulu, kokuavo olombongo oyo ombanjaile ya velapo momo, o pondola oku talavaya lavio ndomo eye a yongola.

Ndaño omanu vamue va liyaka lovitangi, vamamako oku sandiliya ombanjaile yimue ya velapo yoku eca komunu o likasi. Citava okuti, ka ca lelukile oku sanga ombanjaile yaco, omo liovina vimue vi pondola oku pongolola ekalo limuenyo. Tu konomuisi ovina vikuãla vi pondola oku vokiya esanju liomunu o yi tambula.

Olonjongole viomunu o yi tambula. Ulume umue kolupale luo Belfast, Konano yofeka yo Irlanda, wa popia okuti osikaleta yoku yoloka a tambula eci a kuata 10 ale 11 kanyamo oyo ya kala ombanjaile ya velapo. Momo lie? Eye wa popia hati, “momo nda yonguile oku kuata osikaleta yimue.” Olondaka evi vi lekisa okuti onjongole yomunu yi situlula calua nda eye o ka sola ombanjaile yaco ale sio. Omo liaco, sokolola komunu o yongola oku eca ombanjaile yaco. Seteka oku sokolola ocina eye a tenda okuti ci kuete esilivilo, momo esilivilo omunu a eca kombanjaile yaco li situlula onjongole yaye. Omunu umue o kuete olonekulu o sanjukila oku kala otembo yalua lepata liaye. Eye o kuete onjongole yoku mõla omãla vaye kuenda olonekulu olonjanja viosi nda citava. Epata limue nda va kala kepuyuko okuti va ambata va inakulu yavo, va inakulu va pondola oku ci tenda ndombanjaile ya velapo.

Ocina cimue ci kuatisa oku limbuka onjongole yomunu umue, oku u yevelela lutate. Embimbiliya li tu vetiya ndoco: “Omunu lomunu a kale ukuanjanga koku yevelela, a livale koku popia.” (Tia. 1:19) Olonjanja viosi o sapela lakamba vove ale olonjali viove, yevela ovina va sole levi ka va sole. Oku ci linga ci ku kuatisa oku sanda ombanjaile yimue ovo va sanjukila.

Ceci omunu o tambula a sukila. Omunu umue citava okuti, o sanjukila calua oku tambula ombanjaile yocina cimue a sukila ndaño citito. Pole o kũlĩha ndati ovina omunu a sukila?

Onjila yimue yi kuatisa oku ci limbuka oku pula eci omunu a sukila ale ceci a yongola. Pole komanu valua vakuakueca, ka va kuata vali esanju lioku ci linga momo va yongola oku eca ombanjaile yimue komunu waco vepuluvi lina eye ka lavokaile. Ndaño omanu vamue olonjanja viosi va vangula ovina va sole levi ka va sole, pole pamue ka va tukula ovina viosi va sukila.

Omo liaco, kũlĩhĩsa lutate kuenda limbuka ekalo liomanu. Nye ci popiwa nda eye umalẽhe, ukulu, ka kuele, o kuele, wa linyala, ocimbumba, o talavaya kupange woku sanda eteku ale ka talavaya vali? Omo liaco, sokolola ombanjaile yi pondola oku kuatisa omunu lomunu vekalo a sangiwa.

Oco o kũlĩhe ovina omunu umue a sukila, sapela lomanu vakuavo va siata oku ecavo olombanjaile. Ovo va ka ku sapuila ovina vimue omunu waco a sukila okuti, ka via kũlĩhĩwile lomanu vakuavo. Nda wa kuama olonumbi viaco, ci ku kuatisa oku eca ombanjaile yimue omunu o yi tambula a sukila.

Otembo. Embimbiliya li popia hati: “Oku popia ondaka ya sesamẽla otembo yaco ku sanjuisa u wa yi popia.” (Olosapo 15:23) Ocisonehua eci ci lekisa okuti, olondaka tu vangula votembo ya sesamẽla vi pondola oku eca ekuatisa. Eci ca li soka lovina etu tu linga. Ndeci olondaka viwa vi vanguiwa votembo ya sokiyiwa vi pondola oku sanjuisa u wa viyeva, cimuamue haico okuti, ombanjaile yeciwa votembo ya sokiyiwa yi pondolavo oku sanjuisa omunu o yi tambula.

Ekamba limue likuela. Umalẽhe umue o ka tambula ocicapa coku mala oku tanga. Ohueli yimue va lavoka oku citiwa kuoñaña yimue. Apuluvi ava o-o okuti omanu valua va siata oku tambula olombanjaile. Vamue va soneha oloneke ku ka lingiwa ovipito vilikasi vokuenda kunyamo. Oku ci linga ci va kuatisa oku linga esokiyo lioku eca ombanjaile yimue yi kuete esilivilo lia velapo va puluvi aco.a

Omo liaco, ku sukila oku eca lika ombanjaile veteke limue lilikasi. O pondola oku eca ombanjaile vapuluvi osi. Pole, kuli ocina cimue o sukila oku kuata utate. Nda ulume umue eca ombanjaile yimue kukãi nda ka kuli esunga lioku ci linga, ukãi waco o pondola oku sima okuti eye o yongola oku namulãla laye. Ndaño okuti ombanjaile yaco o yeca locisimĩlo ca sunguluka, pole yi pondola oku vetiya omunu oku kuata ovisimĩlo ka via sungulukile. Eci ci vetiya oku kũlĩhĩsa ocisimĩlo cikuavo ci kuete esilivilo okuti, onjongole yomunu eca.

Onjongole yomunu eca. Ndomo ca lekisiwa vulandu wa tukuiwa ndeti, ciwa oku kũlĩhĩsa ovisimĩlo omunu o tambula ombanjaile yaco a ka kuata. Omo liaco, omunu eca o sukila oku kũlĩhĩsa ciwa onjongole yaye. Osimbu okuti omanu valua va sole oku sima okuti onjongole yavo yoku eca yi sukila oku pandiyiwa, omanu valua va eca olombanjaile vokuenda kuateke amue unyamo momo va kisikiwa oku ci linga. Pole vakuavo va eca olombanjaile lelavoko liokuti, va tatiwa ciwa ale locisimĩlo cokuti va ka tambulavo ombanjaile yimue.

Nye o sukila oku linga oco o kũlĩhe nda o kasi oku eca ombanjaile yimue locisimĩlo ca sunguluka? Embimbiliya li popia ndoco: “Ovina viosi vu linga, vi lingi locisola.” (1 Va Korindo 16:14) Nda onjongole yove yoku eca yi vetiyiwa locisola cocili kuenda lonjongole yoku kuatisa omunu o ka yi tambula, olombanjaile viove vi ka tambuiwa lesanju kuenda o ka limbuka esanju li tunda koku eca lutima wosi. Nda weca lutima wosi, o ka sanjuisa Isiove wokilu. Upostolo Paulu wa pandiya Akristão ko Korindo eci va eca lutima wosi kuenda lesanju oco va kuatise Akristão va kala ko Yudea. Paulu wa va sapuila hati: “Suku o sole u eca lesanju.”—2 Va Korindo 9:7.

Omo liaco, oku kapako olonumbi tua kũlĩhĩsa, ci tu kuatisa oku eca ombanjaile yimue yi sanjuisa vana va ka yi tambula. Olonumbi evi kuenda vikuavo vi kuete esilivilo lia velapo kesokiyo lia Suku oco omanu vosi va tambule ombanjaile yimue ya velapo. Omo liaco, tu ku laleka oco o konomuise ombanjaile yaco ya velapo poku tanga ocipama ci kuãimo.