Ombajaile Yimue ka yi Sokisiwa

JORDAN o kuete peka ocimalẽho cimue coku songa ololapi ca pangiwa lesetãhalo liowato kuenda ci kasi ndu okuti ka ci kuete esilivilo. Pole, oco ocina cimue a sole calua pokati kovina viosi a kuete. Jordan wa popia hati: “Russell ekamba limue liepata, eye wa ci nyĩhile eci nda kala omõla.” Eci Russell a fa, Jordan wa limbuka okuti Russell wa kuatisa calua sekulu ya Jordan kuenda olonjali viaye eci va enda oku liyaka lovitangi. Jordan wa amisako hati: “Cilo okuti nda kũlĩha ovina vialua viatiamẽla ku Russell, ombanjaile eyi yi kuete esilivilo lialua kokuange okuti kosimbu ci sule.”

Ndomo ca lekisiwa vulandu wa Jordan, citava okuti ombanjaile yimue ka yi tendiwa ndocina cimue ci kuete esilivilo komanu vamue. Pole, komunu o yi tambula yi kuete esilivilo lialua. Embimbiliya li lombolola ovina viatiamẽla kombanjaile yimue yi kuete esilivilo lia velapo, volondaka via kũlĩhiwa ciwa hati: “Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.”—Yoano 3:16.

Ombanjaile yaco yi pondola oku nena omuenyo ko pui komunu o yi tambula! Kuli hẽ ombanjaile yimue yi kuete esilivilo lia velapo okuti eyi ya tukuiwa ndeti yi sule? Ndaño okuti omanu vamue ka va limbukile esilivilo liombanjaile yaco, pole Akristão vocili va yi tenda ndocina cimue ci kuete “esilivilo lialua.” (Osamo 49:8; 1 Petulu 1:18, 19) Momo lie Suku a ecela omuenyo Womõlaye ndombajaile koluali?

Upostolo Paulu wa lombolola esunga liaco volondaka vikuãimo poku popia hati: “Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi.” (Va Roma 5:12) Ulume watete Adama, wa linga ekandu poku lueyela Suku ocipango kuenje eye wa tambula onima yoku fa. Omo lia Adama, oku fa kua sambukila komanu vosi voluali.

“Onima yekandu oku fa, pole, ongavelo ya eciwa la Suku omuenyo ko pui vu Kristu Yesu Ñala yetu.” (Va Roma 6:23) Oco Suku a yovole omanu kolofa, wa tuma Omõlaye Yesu Kristu palo posi oco a ece omuenyo waye wa lipua ndocilumba voluali. Lekuatiso liocilumba caco ca kũlĩhĩwa okuti “ocisembi,” omanu vosi va kolela Yesu va ka kuata omuenyo ko pui.—Va Roma 3:24.

Catiamẽla kasumũlũho Suku a eca kafendeli vaye lekuatiso lia Yesu, Paulu wa popia hati: “Pandu pandu ku Suku omo liocali caye ca piãla.” (2 Va Korindo 9:15) Ocili okuti, ocisembi ombanjaile yimue yi komõhisa okuti, ka tu tẽla oku yi lombolola lonjila yimue ya suapo. Pole, pokati kolombanjaile viosi Suku a eca komanu, momo lie ocisembi oyo ombanjaile ya velapo? Momo lie ca litepela lolombanjaile vikuavo Suku a eca?a Kuenda tu eca ndati olopandu omo liombanjaile yaco? Tu ku laleka oco o tange atambululo Embimbiliya kapulilo aco vovipama vikuãimo.