Helie o Kuete Eko Omo Liohali Yosi tu Tala?

Nda okuti ohali ka yi tundi ku Suku, helie wa siata oku koka onjala, uhukũi, ovoyaki, ovoveyi kuenda ovilunga? Ondaka ya Suku Embimbiliya, li situlula ovina vitatu via siata oku kokela ohali omanu:

1. Ukuse, Ocipululu kuenda Onya. “Omunu poku kangisa ukuavo o lilinga eye muẽle cĩvi.” (Ukundi 8:9) Olonjanja vialua omanu va tala ohali omo liomanu ka va lipuile, vakuakulisola ovo muẽle ale olongangala.

2. Cosi Ciya ño ci Veta ño. Omanu va talavo ohali omo okuti, “cosi ciya ño ci veta ño.” (Ukundi 9:11) Omnu omo lioku kala pocitumãlo cimue cĩvi kuenda vowola ka ya sungulukile, citava okuti va lipita locilunga cimue, ka va lekisa utate ale va linga ovina ka via sungulukile.

3. Eliapu Lia Viala Oluali. Embimbiliya li lekisa ciwa ono yohali omanu va siata oku tala. Olio liti: “Oluali luosi lu kasi povaka ondingaĩvi.” (1 Yoano 5:19) “Ondingaĩvi” yaco Satana Eliapu, ociluvo cimue cespiritu ci kuete unene okuti, kefetikilo wa kala ungelo wa Suku pole “ka pandikisile vocili.” (Yoano 8:44) Ovangelo vakuavo va likongela ku Satana kuenda va sinĩla Suku oco va tẽlise olonjongole viavo kuenje va linga olondele. (Efetikilo 6:1-5) Omo liesino liavo Satana kumue lolondele viaye, va siata oku koka ombuanja yalua voluali. Ovina viaco via siata oku livokiya calua koloneke vilo. Cilo, Eliapu li kasi lonyeño yalua kuenda li “kasi oku yapuisa oluali luosi,” okuti ca siata oku koka ‘ongongo yalua kilu lieve.’ (Esituluilo 12:9, 12) Satana ongangala. Eye o sanjuka poku mola omanu va tala ohali. Omo liaco, Satana eye o kasi oku kokela ohali omanu okuti Suku hayeko.

KŨLĨHĨSA: Eliapu olio lia siata oku koka okuti omanu va tala ohali. Pole, Embimbiliya li popia ndoco: “Suku eye ocisola.” (1 Yoano 4:8) Omo okuti ocisola ci panga onepa kovituwa viaye, ‘Ci kasi kupãla la Suku oku linga evĩho. Ci kasi kupãla la Tõlo oku limba kakandu!’—Yovi 34:10.

Citava okuti ove o pula ndoco: ‘Toke otembo yipi Suku ukuonene wosi a ka ecelela Satana oku koka ohali?’ Ndomo tua ci kũlĩhĩsa, Suku ka sole evĩho kuenda ohali yetu yu kokela evalo lialua. Omo liaco, Ondaka yaye yi tu vetiya ndoco: “Yeki kokuaye ovilemo viene viosi, momo eye o vu tati.” (1 Petulu 5:7) Suku o tu sole kuenda o kuete unene woku malako ohali yosi kuenda ekambo liesunga, ndomo ci ka lomboluiwa vocipama ci kuãimo.a