Ceci Ohueli Yimue yi Liwekapo Oku Kala Ukuacili

“Nda yonguile oku fa eci ulume wange a ndi sapuila okuti o sandiliya ukãi ukuavo umãlehe okuti ame ci sule. Ca molehẽle ndekambo liesunga, capiãla enene eci ndi sokolola kovina viwa ndolingila.”—Maria, kofeka yo Espanha.

“Eci ukãi wange a ndi siapo, nda liyeva ndu okuti onepa yimue yetimba liange lia fa. Ovina viosi tua likuminyile oku lingila kumosi kuenda elavoko lietu, lia nyõliwa. Olonjanja vimue nda simile okuti sia kuatele vali asakalalo pole, noke ndi yeva vali esumuo.”—Bill, kofeka yo Espanha.

OKU PAKUIWA lohueli yetu, ci koka esumuo lialua. Olohueli vimue vi nõlapo oku ecela ohueli yavo nda ya likekembela kuenje va tumbulula vali olohuela viavo.a Pole, nda olohuela vi amamako ale sio, ohueli yina ya pakuiwa oyo yi talapo vali ohali. Va pondola ndati oku liyaka locitangi caco?

OLONUMBI VIEMBIMBILIYA VI PONDOLA OKU KUATISA

Ndaño va liyaka lesumuo lialua, olohueli vina via pakuiwa via siata oku sanga elembeleko Vovisonehua. Ovo va kũlĩha okuti Suku o lete asuelela avo kuenda o va kuetele ocikembe.—Malakiya 2:13-16.

“Eci atatahãi a nduila vutima, Okulemba kuove okuo ku ñolisa.”—Osamo 94:19.

Bill wa popia hati: “Poku tanga ocinimbu eci, ca kala ndu okuti Yehova o kasi oku ndi lembeleka ndeci isia umue ukuacisola a linga.”

“Ku vakuahenda ove o lilekisa okuti ukuahenda.”—Osamo 18:25.

Carmen okuti ulume waye wa liwekelepo oku kala ukuacili kokuaye vokuenda kuolosãi vialua, wa popia hati: “Ulume wange wa liwekelepo oku kala ukuacili, pole nda kolela okuti Yehova o pondola oku kala ukuacili kokuange. Eye lalimue eteke a ponduile oku njanduluka.”

“Ko ka sakalali locina cimue, pole, kovina viosi lolohutililo . . . apingilo ene a kũlĩhĩwe la Suku; kuenje ombembua ya Suku yina ya piãla olondunge viosi, yi lava ovitima viene kuenda ovisimĩlo viene vu Kristu Yesu.”—Va Filipoi 4:6, 7.

Sasha wa popia hati: “Nda tanga ovinimbu evi olonjanja vialua. Nda likutililavo olonjanja vialua, kuenje Suku wa nyĩha ombembua komuenyo wange.”

Omanu vosi va tukuiwa, olonjanja vialua va yonguile oku liwekapo. Pole, ovo va kolela ku Yehova kuenda va pamisiwa Londaka yaye. Bill wa popia ndoco: “Oku kolela Yehova, ca ñuatisa oku kuata ocimãho komuenyo,eci ovina viosi via kala ndu okuti via nyõliwa. Ndaño okuti vokuenda kuotembo yimue nda kala ndu okuti ñasi vomaka yulembo wokufa” pole Suku wa kala lame.”—Osamo 23:4

a Oco o kuate alomboluilo akuavo atiamẽla kohueli ya pakuiwa nda o ecela ale sio, tanga o Despertai! 22 ya Kupupu 1999 kocipama losapi hati: “Quando o Cônjuge é Infiel.”

Ovina vi Pondola Oku ku Kuatisa Oku Pandikisa

Sokolola Ovisonehua vi Lembeleka.

Bill wa popia hati: “Nda tanga elivulu lia Yovi leli Liosamo, kuenda nda taya ovinimbu vi likuata lekalo liange. Nda limbuka okuti asonehi ava Vembimbiliya, va liyakavo lovitangi ndevi viange.”

Sanga elembeleko vovisikilo.

Carmen ivaluka ndoco: “Eci sia kuatele otulo luteke, nda enda oku yevelela ovisikilo. Ca kala ono yelembeleko.” Daniel wa popia hati: “Nda lilongisa oku sika oviyola kuenje nda limbuka okuti, ovisikilo viaco via ñuatisa oku tumbulula ombembua yange.”

Situlula ovisimĩlo viove.

Daniel wa popia hati: “Nda kuatele ohele yoku situlula ovisimĩlo viange. Pole, nda kuatele akamba vawa kuenda nda enda oku vangula lavo oloneke viosi. Nda enda oku situlula kokuavo ovisimĩlo viange poku va sonehela ovikanda loku sapela lavo. Ca ñuatisa calua.” Sasha wa popia hati: “Epata liange lia ñuatisa calua. Inange olonjanja viosi wa kala lame. Eye olonjanja viosi wa enda oku njevelela. Isiange wa ndi kuatisavo calua kuenda wa ñuatisa oku tumbulula vali esanju.”

Amamako oku likutilila.

Carmen wa popia hati: “Nda enda oku likutilila olonjanja viosi. Nda liyeva okuti Suku ka njandulukile, o njevelela kuenda o ñuatisa. Vokuenda kuotembo yaco yovitangi, nda kuata ukamba uwa la Suku.”