Kuata Uloño Woku Tavisa Koku Longisa Kuove
1. Voku kuama ciwa Ondaka ya Suku kupange woku kunda mua kongela nye?
1 Akundi vana va loñoloha ndupostolo Paulu, va kũlĩha okuti, voku “kunda lesunga ondaka yocili,” ka mua kongelele lika oku tanga ovinimbu Viovisonehua via tukuiwa. (2 Tim. 2:15) Eci tu kunda ondaka ya Suku, tu pondola oku ‘tavisa’ ndati poku longisa kuetu?—Ovil. 28:23.
2. Tu kuatisa ndati omanu oku sola Ondaka ya Suku?
2 Lekisa Komanu Eci Ondaka ya Suku yi Popia: Catete, tiamisila ovisimĩlo viomanu Kembimbiliya lonjila yimue yi lekisa esumbilo, oco va limbuke okuti, mu sangiwa ukũlĩhĩso wa Suku. Ekolelo tu kuetele Ondaka ya Suku, li pondola oku kuatisa omanu oku yevelela lutate eci tu va tangela ovisonehua. (Va Hev. 4:12) Tu pondola oku popia olondaka vimue ndoco: “Nda limbuka esilivilo lioku kuata ovisimĩlo via Suku catiamẽla kondaka eyi. Kũlĩhĩsa eci Ondaka yaye yi popia.” Nda citava, lekisa eci Ondaka ya Suku yi popia poku tanga lomunu Vembimbiliya.
3. Noke yoku tanga ocisonehua cimue, nye o sukila oku linga oco o kuatise omunu oku kuata elomboloko liaco?
3 Cavali, lombolola ocisonehua wa tanga. Komanu valua ka ca lelukile oku kuata elomboloko liocisonehua cimue ci tangiwa onjanja yatete. Olonjanja vimue tu sukila oku va lomboluila ocinimbu tua tanga, oco va kuate elomboloko liaco. (Luka 24:26, 27) Lombolola atosi avelapo vocinimbu caco. Oku linga epulilo komunu, ci ku kuatisa oku limbuka nda o kuete elomboloko liondaka wa sapela laye.—Olosap. 20:5; Ovil. 8:30.
4. Onjila yipi ya sulako yoku tavisa tu sukila oku kuama koku longisa kuetu?
4 Situlula Ciwa Ovisonehua: Catatu, likolisilako oku vetiya utima womunu. U kuatisa oku limbuka ndomo ocinimbu ci tiamisiwila kokuaye. Oku situlula ciwa Ovisonehua, ci kuatisa omunu oku pongolola ovisimĩlo viaye. (Ovil. 17:2-4; 19:8) Eci tu tanga Osamo 83:18, tu sukila oku lombolola okuti, oku kũlĩha onduko yomunu umue, ci kuatisa oku kuata ukamba laye. Noke, pula ndoco: “O tava hẽ okuti, oku kũlĩha onduko ya Suku ci ku kuatisa oku linga olohutililo vi kuete elomboloko liasuapo?” Oku tiamisila ocisonehua kekalo liomunu tua sapela laye, ci kuete esilivilo lialua. Oku tavisa Londaka ya Suku poku longisa, ci vetiya vakuavitima via sunguluka oku fendela Yehova, Suku yocili ukuamuenyo.—Yer. 10:10.