“O Pondola Oku Kala Ukundi Wotembo Yosi!”

1. Nye manji umue ukãi a yeva vutima omo lioku litumbika kupange wakundi votembo yosi?

¹ Manji umue ukãi o tukuiwa hati, Kathe B. Palm, wa lombolola ndoco: “Esanju ndi kuete kupange woku kunda, lalimue eteke nda li kuatele kovopange akuavo, kuenda nda siata oku tambula asumũlũho alua.” Eye wa pita anyamo alua oku kundila vofeka yosi yo Chile, yi kasi Kombuelo yo Amerika. Omo liasumũlũho a siata oku tunda kupange wakundi votembo yosi, citava okuti umue oku sapuila hati: “O Pondola Oku kala ukundi wotembo yosi!”

2. Lombolola esunga lieci ovopange atiamẽla kefendelo lia Yehova a nenela esanju lialua.

² Onjila Yimue yi Nena Esanju Komuenyo: Yesu okuti eye Ongangu yetu, wa kuata esanju poku linga ocipango ca Isiaye. (Yoa. 4:​34) Omo liaco, wa longisa olondonge viaye okuti, esanju liocili, li tunda koku linga ovopange atiamẽla kefendelo lia Yehova. Tu sanjuka calua nda tua li tumbika kovopange ana a taviwa la Yehova. Nda tua pesela otembo longusu yetu, kuenda ovokuasi etu oco tu kuatise vakuetu, tu kuata esanju lialua.​—⁠Ovil. 20:​31, 35.

3. Esanju lipi tu pondola oku kuata poku pesila otembo yalua kupange woku kunda?

³ Nda tu pesila otembo yalua kupange woku kunda, tu kuata esanju lioku fetika oku songola alilongiso Embimbiliya. Ndaño vocikanjo cetu omanu ka va lekisa onjongole kolondaka viwa, pole, tu pondola oku kuata onima yiwa, nda tua litumbika kupange wakundi votembo yosi, osimbu tu amamako oku kuata uloño kupange woku kunda. Akundi votembo yosi, va sukila oku kuama olonumbi va lilongisa Kosikola Yoku Pindisa Akundi Votembo Yosi, yina ya siata oku lingiwa noke liunyamo umosi tunde eci va fetika upange waco. (2 Tim. 2:​15) Nda tua pandikisa kupange woku kunda, tu pondola oku kũla ombuto yocili okuti, vokuenda kuotembo yima apako.​—⁠Uku. 11:⁠6.

4. Ovina vipi amalẽhe vana va lavoka oku mala osikola, va sukila oku kũlĩhĩsa?

⁴ Amalẽhe: Osimbu o kasi oku malusula elilongiso liove kosikola, wa siata hẽ oku sokolola ovina o ka linga kovaso yoloneke? Omo okuti o kasi handi kosikola, otembo yove wa siata oku yi pesila kovopange aco. Noke yoku mala elilongiso liove, otembo yina wa siata oku linga ovopange o kosikola, pi o pondola oku yi pesila? Nda wa sanga upange weteke liosi woku sanda eteku, momo lie ku likutilila ku Yehova oco o sange ukuavo u ku ecelela oku litumbika kupange wakundi vavelapo? Uloño o ka kuata poku kundila omanu vakuapata a litepa, oku yula ovitangi, oku lisuluvika, kuenda oku loñoloha koku longisa, vi ka ku nenela esanju lialua komuenyo.

5. Olonjali kuenda vamanji vekongelo, va sukila oku vetiya ndati oku litumbika kupange wakundi votembo yosi?

⁵ Alonjali, u kasi hẽ oku vetiya omãla vene oco va litumbike kupange wakundi votembo yosi? Olondaka viove, longangu yove yiwa, vi pondola oku kuatisa omãla vove oku pitisa kovaso Usoma wa Suku. (Mat. 6:​33) Manji umue ulume o tukuiwa hati Ray, una wa fetika upange wakundi votembo yosi eci a mala oku lilongisa kosikola, wa popia hati: “Ina yange wa enda oku popia hati, upange wakundi votembo yosi, u nena esanju liocili komuenyo.” Vamanji vosi vekongelo, va sukila oku pandiya upange wakundi votembo yosi kolombangulo viavo, kuenda kekuatiso liavo. Manji umue o tukuiwa hati, Jose, wo kofeka yo Espanya, wa popia hati: “Vekongelo lietu, vamanji va siata oku tenda upange wakundi votembo yosi okuti, u kuete esilivilo lialua kamalẽhe. Ombangulo yavo, lesanju va lekisa kupange waco, kuenda ekuatiso va siata oku eca, via ndi vetiya oku litumbika kupange waco.”

6. Nye tu sukila oku linga nda ka tu kuete onjongole yoku kala akundi votembo yosi?

⁶ Oku Yula Ovitangi: Citava okuti o popia ndoco: ‘Si kuete onjongole yoku litumbika kupange wakundi votembo yosi.’ Nda o kuete ocisimĩlo caco, likutilila ku Yehova catiamẽla kocitangi caco, loku popia ndoco: ‘Sia kũlĩhĩle nda ndi pondola oku litumbika kupange wakundi votembo yosi, pole, ndi yongola oku linga upange u nena esanju kokuove.’ (Osa. 62:8; Olosap. 23:​26) Noke, kuama olonumbi vi sangiwa Vondaka yaye, kuenda vocisoko caye. Osimbu handi omunu ka litumbikile kupange wakundi vavelapo, tete o ‘fetika’ lupange wakundi va sokamo, kuenje, esanju a kuata kupange waco, liu vetiya oku li tumbika kupange wakundi votembo yosi.​—⁠Osa. 34:⁠8.

7. Tu pondola oku yuvula ndati ovisimĩlo viokuti, ka tu tẽlisa 70 kolowola?

⁷ Nye o sukila oku linga nda wa limbuka okuti, ku pondola oku tẽlisa 70 kolowola vi kisikiwa? Momo lie ku sapelela lakundi votembo yosi va kasi oku liyakavo lovitangi ndevi viove? (Olosap. 15:​22) Noke, linga esokiyo li ku kuatisa oku tẽlisa upange waco. Nda otembo yina wa siata oku pesila kovina ka vi kuete esilivilo o yi pesila kupange woku kunda, ci ku kuatisa oku tẽlisa esokiyo liove.​—⁠Va Efe. 5:​15, 16.

8. Momo lie olonjanja vimue tu sukilila oku konomuisa ekalo lietu?

⁸ Kũlĩhĩsa Ekalo Liove: Olonjanja vimue ekalo liomunu li pongoloka. Omo liaco, o sukila oku kũlĩhĩsa ekalo liove olonjanja viosi. Anga hẽ, o lavoka oku liwekapo oku talavaya kupange woku sanda eteku? Manji umue o tukuiwa hati Randy, okuti wa liwekapo selo oku talavaya kupange woku sanda eteku, wa popia hati: “Onjila nda nõlapo ndeti, ya ndi kuatisa oku fetika oku litumbika kupange wakundi votembo yosi, kumue lukãi wange, kuenje ca siata oku tu kuatisa oku ilukila kovikanjo ku sukila ekuatiso liakundi. Nda siata oku tambula asumũlũho omo lionjila nda nõlapo, pole, asumũlũho a velapo vali a tunda koku kuata utima wa yela.”

9. Ovina vipi olohueli vi sukila oku kũlĩhĩsa?

⁹ Olohueli vimue noke yoku kũlĩhĩsa ciwa ekalo liavo, va siata oku limbuka okuti, ka va sukila oku talavaya eteke liosi kupange woku sanda eteku. Oco va tẽlise ocimãho caco, epata li sukila oku likolisilako loku leluisa omuenyo wavo. Manji umue o tukuiwa hati John okuti ukãi waye wa liwekapo oku talavaya eteke liosi kupange woku sanda eteku oco a litumbike kupange wakundi votembo vosi, wa popia hati: “Ndi sanjuka calua poku limbuka okuti, vokuenda kueteke ukãi wange o litumbika kupange wa Yehova.”

10. Nye ca siata oku vetiya Akristão oku li tumbika kupange wakundi votembo yosi?

¹⁰ Oku Lekisa Ocisola Lekolelo: Yehova o yongola okuti upange woku kunda owo tu velisapo komuenyo wetu. Oluali lulo ndopo lu nyõliwa, kuenje, vana va tukula onduko ya Yehova, ovo lika va ka popeliwa. (Va Rom. 10:​13) Ocisola tu kuetele Yehova, kuenda olopandu tu eca omo liovina a siata oku tu lingila, vi tu vetiya oku pokola kocikundi Comõlaye, coku lekisa ombili kupange woku kunda. (Mat. 28:​19, 20; 1 Yoa. 5:⁠3) Handi vali, oku limbuka okuti tu kasi koloneke via sulako, ci tu vetiya oku lekisa ombili kupange woku kunda. Osimbu tu kuete epuluvi liaco, tu yuvuli oku sakalala calua lovina violuali.​—⁠1 Va Kor. 7:​29-31.

11. Nda manji umue wa tu sapuila hati, tu kuete epondolo lioku litumbika kupange wakundi votembo yosi, tu ci tenda ndati?

¹¹ Upange wakundi vavelapo, u kuete esilivilo liocili, okuti olowola tu pesila kupange waco vi sule. Momo oku linga upange waco, ci lomboloka elitumbiko lietu ku Suku. Nda manji umue wa ku sapuila hati, o kuete epondolo lioku kala ukundi wotembo yosi, ci tenda ndepandiyo. Likutilila eci catiamẽla kondaka yaco, oco o likongele la vana va li tumbika kupange waco u nena esanju.

[Olondaka vielitalatu kemẽla 4]

Alonjali, u kasi hẽ oku vetiya omãla vene oco va litumbike kupange wakundi votembo yosi?

[Olondaka vielitalatu kemẽla 5]

Yehova o yongola okuti upange woku kunda owo tu velisapo komuenyo wetu.